SAWMTUTE HNAR NGAI LO ISUA

      SAWMTUTE HNAR NGAI LO ISUA

       
Tin, kain an chelh a, “Kan hnenah awm ta che; khua a tlai dawn ta a, ni pawh a tlak dawn tawh hi,” an ti a.                                                                                             Luka 24:29
       
Lal Isua Krista a thiha a thawhleh hnu khan Emau khaw pana țhian dun kal hnenah khan a inlar a. Kha țhian dun kal khan Lal Isua a ni tih an hre miah lova, an kal  an kalna tur khua an thlen dawn chuan khua a lo tlai ta hle mai a, ni pawh a tla dawn ta a. An hnenah chuan hla tak kal tur niin Isua chu a in sawi a. Chutia khua a lo tlai tak hleah chuan țhian dun chuan Lal Isua chu an hnena cheng ve mai turin an sawm ta a. Tichuan an hnena cheng tur chuan a lut ve ta a.
       
Lal Isua an chelh dan hi chanchin țha Luka hian *‘Tin, kain an chelh a’* a ti kher a. Ka ngawt pawhin an chelh a, an hnena cheng turin Lal Isua a lut nghal mai hi a ni tih chanchin țha Luka ziakah hian chiang tak in a lang a ni. Lal Isua hi ka ngawt pawha chelha an hnen a lut mai hian Lal Isua khan an hnena chen/chenpui a chak hle a ni tih a lang chiang viau awm e. Tin, sawmtute hnar ngai lo leh ti beidawng ngai lo a nihzia pawh a hriat theih a ni.
       
Lal Isua hian min chenchilh a, kan hnena awm hi a thlahlel em em reng a, ka ngawt pawha chelhtute pawh a ti beidawng ngai lo. Kan hnena cheng atan kan duh leh duh loh a ni mai. Kan hnena cheng tura kan duh anih phawt chuan englai pawhin eng hunah pawh amah lam hi chu a in peih reng. Khawi hmunah pawh awm ila, eng hun pawh ni sela, keimahniah hian min chenchilh se kan ti anih chuan sawm mai tur a ni. *“Ngai teh u, kawngkhar bula dingin ka kik hi, tupawhin ka aw hria a kawng a hawn chuan a hnenah ka lut ang a,”* ti reng tu kha a nih avangin kan hnena cheng tur hian kan sawm a, kawng kan hawn hun hi a nghak a, min ngaichang reng țhin a ni. Ka ngawt pawha an chelh pawhin, chenpui nghal duhtu kha anih miau avangin. Kan hnenah hian chen chak a, thlahlel taka min thlir rengtu Lal Isua hi kan nunah hian cheng turin a inpeih reng.
       
He khawvelah hian lungngaihna leh manganna kan tawrh zawng zawng, hlimna leh lawmna kan dawn zawng zawngah hian min țawmpui vek turin Lal Isua hian kan hnena cheng turin a inpeih reng a, kan sawm hun hi a nghak mai a ni. Ka ngawta an sawm pawha chenpui nghaltu kha kan hnena cheng tur hian kan sawm ve hun hi a nghak reng a ni.


______________________•_____________________