TLAI NGAI LO PATHIAN

                TLAI NGAI  LO  PATHIAN

Mihringte  hi  Pathian  in  kan  chunga  ro  a  relnaah  hian  kan  hmanhmawh  fo  țhin  a. Keimahni hamțhatna leh nawmsakna kan thlakhlelh luat avang hian Pathian hi tlai țhinah kan ngai fo țhin. Pathian hnathawh leh thiltihte kan nghah hman loh avangin keimahni duh danin chak takin kan kal a, kan dai phelh pheng phung reng a ni.

Amaherawhchu Pathian hi a  tlai ngai lova, a hun takah a ropuina leh thiltihtheihna a lanchhuah tir zawk țhin. Amah beiseia A chunga rinna nghat țhin tute hi a tithlawn ngai lo a ni. Huaisen taka Amah țantu leh Amaha rinna zawng zawng nghattute tana a rinawmzia chu Daniela leh a țhiante chungchangah pawh chiang takin kan hmu a ni. Daniela  Bung 3 kan  chhiuar  chuan  Lal  Nebukadnezzara’n  rangkachak  milim  a siamthu leh chu milim chu mi zawng zawngin chibai buka be turin thuchhuah a siam a ni tih kan hmu a. Amaherawhchu Daniela țhiante  pathum Sadraka, Mesaka leh Abednego te chuan Pathian nung hawisan duh lovin lal thu pek anga milim hmaa kun chu an duh ta lova, chu chuan lal Nebukadnezzara thin a tirimin a milem chibai buk duh lote hremna tura dan a lo siam tawh angin rawhtuina meipuiah Daniela țhiante chu an paih ta a ni tih kan hmu a.

Mihring rilru ațanga kan ngaihtuah chuan Sadraka, Mesaka leh Abednago te rawhtuina meipui, a let sarih laia an tih sat leh nghal chhunga an paih thlenga Pathian a che lo kha a mak a, a tlai tawh lutuk a ni. Engkimtithei Pathian chuan meipui sa tak chu a tihlum thei awm si a, meipuia paihtu tur sipai hote tha pawh a ti zawi vek thei ang tih a rinawm a, Daniela țhiante kha  meipuia  paih  an  nih  hma  khan  chhahchhuah  an  ni  thei  a  ni.

Amaherawhchu  chu  chu Pathian thiltum leh ruahman dan a ni lova, Amah leh Daniela țhiante ho tana hlawk zawka Nebukadnezzara hremna chu hmang turin tum dan dang a lo nei daih a ni. Chu a thiltum ang ngei chuan a hun takah Daniela țhiante chu meipui chhungah ngei chuan chhanchhuah in an awm a, engmah na hre lovin an awm a ni. Tlai deuh tawk leh engmah tih theih tawh loh hnu ni a langa mihringin a tawrh tur ang hun thlen tawh a Pathian thiltihtheihna lang chhuak chu Daniela țhiante tan malsawmna a ni a, an hna atanga kaisan tir an nih phah ta a ni.

Daniela  sakeibaknei  puka  paih  a  nih  pawh  khan  mihring  ngaihtuahna ațang chuan Pathian kha tlai hlein a lang a. Sakeibaknei  puk thleng lovin Daniela harsatna kha sakeibaknei puk kotlangah khan chinfel mai awm tiin keini chuan kan ngaihtuah ngei ang. A puk kotlang thlenga Pathianin a thiltihtheihna a lantir lo a nih chuan Sakeibaknei puk a lut lova Pathian thiltihtheihna leh a ruahmanna nghak hman lova keimahni thua chet lak mai kan tum ngei ang. Mahse, Pathian tana rinawm Daniela chuan Pathian a ring tlat a, a hun takah Pathianin hna a thawk  ta  reng a ni. Daniela  kha  thi  ngei  tura  kan  ngaihna  tur  hmun Sakeibaknei ko ham tak tak te pukah Pathian chuan a mut tir thei tlat si a ni. Daniela’n rinna nena Pathian thil ruahmanna a nghah avang khan Nebukadnezzara khan Daniela Pathian, kan Pathian nung ngei chu a biak ve phah ta a nih kha. Kan rin Pathian hi a van tlai ngailo tak em! A hun takah thil a lo ti țhin zawk a ni.

Ringtu inti tamtakte hian Pathian hi kan ring zo lo fo țhin a, Amah kan rin loh avang hian a hnathawh lo thlen hmain kan lo phatsan fo țhin. A malsawmna kan dil a, a chhanna kan hmuh hmain hmanhmawh takin kan duh angin kan lo chet khalh a, nupui pasal te pawh kan dil a min pek hmain kan lo inru fo țhin a nih hi. Hei hi kan rinna duap lutuk vang a ni. Amah ringtute chunga Pathian hnathawh kan hmuh hian Pathian tlai ngai lohzia kan hmu a, keimahni kan hmanhmawh lutuk avang hian a tlai țhinah ah kan lo ruat mai mai thin zawk a lo ni. Hawh u Daniela leh a țhiante ang hian Lalpa hnathawh lo thleng tur chu rinawm takin nghak țhin ang u, ‘min chhanchhuak dawn lo mahsela milem chibai ka buk lovang’ ti ngam khawpa Amah ringtu leh beiseitu hi Pathian hian a ensan mai mai ngai lo. Tlai ngailo Pathian hian kan țhatna turin kawng engkim min ruahman saka, kan  dilna leh ngennate min chhang tur hian a tlai ngai lo ve.


________________________•_____________________