Isuan a hnenah, "Philip, hei leh chen hi in hnenah ka awm a, chuti pawhin min hrelo maw? Tupawh mi hmu chu Pa hmu a ni. Pa chu keini mi hmuhtir rawh, engti tiha i ti nge ni? Kei paa ka awm leh Pa keimahah a awm tih i awih lo vem ni? In hnena thu ka sawi hi keima phuahchawpin ka sawi lo. Pa keimahah a awm reng a, a thil a ti zawk ṭhin a ni (Joh 14:9-10).
Isuan a zirtirte hnenah engkim a hrilh hnu khan Philipa chuan, "Lalpa, Pa chu keini mi hmuh tir ta che, chutichuan kan tan a tawk ang.." a lo ti hram a ni. Awmzia chu "Isua i thiltih leh i thil sawite hi a la tawk lo, thildang Pa hriat theihna vision pakhat min hmuh tir rawh a tihna a ni.
Isua kha a lung a chhia a nih kha, Isua khan tihian a chhang a, "Philip, hei leh chen hi in hnenah ka awm a, chuti pawhin mi hre lo maw? Tupawh mi hmu chu Pa hmu a ni. Pa chu keini mi hmuhtir rawh engti tiha i ti nge ni? Kei Paa ka awm leh Pa keimahah a awm i awih lo vem ni? In hnena thu ka sawi hi keima phuahchawpin ka sawi lo. Pa keinahah a awm reng a, a thil a ti zawk ṭhin a ni (Joh 14:9-10) a ti a ni. Awmzia chu Philip kei hi ka tawk lo vem ni? Min hmu tawh a, ka hnathawh zawng zawngte pawh i hmu tawh a, ka thil sawi zawng zawngte pawh mahse thil dang i la phut cheu maw? a tihna a ni.
Philipa khan Isua rilru a ti na hle a ni. Philipa hi dem mai tur kan ni bik em ni?
Vawiinah pawh tam tak chuan Krista inpuanna chhandamna hi Bible ah kim chang taka hrilhfiah leh pek kan ni a, chumi chu duhtawk lovin Philipa ang maiin, engtin emaw taksa lam vision danglam tak hmuh kan tum tlat mai hi Lalpa hmusittu leh a inpuanna Bible hi a tawk zo lo ve, ka tan awmzia a awm lo, ka ring lo kan tihna zawk a ni. Chhandam nih kan tum dan te hi thinlungah engtin emaw taka danglam vakna thleng turte in kan ngaihtuah a, Camp na ah te midang an ṭah laia ṭah ve theih loh avang tein chhandam ni ve lo turah kan inngai a, engtin emaw experience kher, vision danglam awm kher loh chuan kan awih duh tlat lo te hi, sim a hun ta.
Bible in heti zozai hi Krista chanchin a chipchiarin chhandamna thlengin min hrilh vek a, inthup pawh a awm lo va, mahse tinge a la tawk lo Lalpa tia Philipa ang maia Vision dang dila kan awm le? Pathian inpuanna Bible hi a tawk zo lo vem ni? Eng taksa chetna hmang khera Pathian chu hriat tum nge i nih le? Bible a Pathian inpuanna hi a tawk zo lo vem ni? Bible ah engkim a awm a, chu chu pawm mai zawk ta che. Philipa ang kan awm chuan sim a hun ta...nge eng in a chhun thluk tawp che i nghak zawk dawn. Bible hi pawm mai zawk la, Chu chu i nunna tur a ni.
===================•=================
No comments:
Post a Comment