“Kei atan zawng nun hi Krista a ni si a, thih pawh hlawkna a ni.” (Philppi 1:21)
Sual avangin hliam i tuar a, natna hrehawmna leh manganna te, sawi chhiat leh hmuhsitna tinreng nen, chu mai ni lovin i nunhlui kalsanin Lal Isua Krista nun thar tho leh nun i țawmpuia chin khawvel i thlir a, tam tak chân ah i inngai tiraw? A dik alawm khawvel kan thlir chhung chuan kan tih țhin te kan lo ti leh țhin, mahse Lalpa avangin ti thei tawh lo dinhmunah kan lo awm tawh si a, mahse chan ta viauah kan inngai a ni thei, tichuan rethei leh malsawmna dawng ta lo ah kan inngai țhin.
Mahse i chân lo asin, sual i bawiha i tang Lalpa’n a chhanchhauk che a, chatuan hremhmun a kal tur chu chatuan nun i lo nei zawk a ni lawm mi? Engatinge chân ah i la inruat, thlir tur dik Lal Isua Krista hi thlir la lawmna hlirin i lo khat ang. A hmangaihna nasat em avanga a neih chhun pawh ui lo tu Lalpa hi thlir zawk zel ang che aw. Kan hmangaih ten min kalsan a, khawvel sum leh pai kan hmuh țhin Lalpa duh lo dan te kan tih a lo rem tawh lo a, kan kalsan a, mahse maw chânna a ni lo. Nunna kan neihna tur zawkin a ni lawm mi chungte chu kan kalsan ni?
Lalpa’n kan tan hun min buatsaih sak a, chatuana nunna lallukhum ngei chu kan tan min pek a tiam asin, a ropui zia hi mihring finna hian a sawiin a ngaihtuah chhauk zo lo, chu hmun chu i ta a ni asin. Engtik lai pawhin chu hmuna lut thei turin a sawm che a, i lo chhang ta a, Lalpa lawm dan tur leh a hlim tur zia i lo ngaihtuah ngai em? Chuti chung chuan khawvel thil te chu chânah i la inngai dawn chauh em ni? Saul avanga i hliam tawrh te natna leh hrehawmna te awm tawh lohna hmun zawk chu thlirin chân ah i la inngai thei dawn em ni? I nu pum chhunga i awm hma pawh a hre tu che Lalpa hian i tana țha tur chu a hria asin, amahah engkim hlanin nghat la, aman a ti vek dawn asin.
Khawvelin nun hlimna thuruk a pe thei lo che a, sum leh pai leh khawvel hausakna zawng zawng pawhin a lei theih loh chatuan nunna Lalpa’n a pek che hi ropui i ti lo vem ni? Lal Isua nun nei tluka hausakna dang a awm dawn chuang em ni? Thingzaina in an zai bung, meipui leh khandaih an hmachhawn, mahse an zam lo asin, an tan chatuan nunna zawk chu thlirin an natna te chu Lalpa’n a lo ti dam tawh zawk dawn tih an hri a, huaisen takin an kal a, Setana chu Lalpa zarah an hneh zel țhin.
Saruakin i lo piang a, Lalpa hnenah saruak vékin i let leh dawn, chânna tur a awm lo asin, i tan thih pawh hlawkna rangkachak khawpuiah tlantu Lal Isua Krista fakin nunna lallukhum khumin chânna ni lovin nunn neiin i fak kumkhua tawh zawk ang.
Kei atan zawng nun hi Krista a ni si a, thih pawh hlawkna a ni’. Phil 1:21
Nangma tan nun hi enge anih ve le?
Kei atan erawh zawng nun hi nawmchenna ani: Thuhriltu 11:9 ah chuan ‘thalai te u, in thatlai chen ula, in la naupan viau lai hian hlim rawh u’ tih kan hmu a, kan phak tawk a sang emaw a hniam emaw, keimahni leh keimahni kan inhria emaw hre lo emaw, engemawti kawng theuh chuan kan thatlai hi kan chen a, a pawi lo ve. Mahse nawmchenna maiah kan inhmang zo anih chuan ‘Amaherawhchu Pathianin in chungah ro a rêl dawn tih hre reng ang che u.’ tih hi kan rin loh hlanin kan tawngbua ang.
Kei atan erawh zawng nun hi hausaknan ani: Mahni tawka neih ve am hi kan duhthusam ani. Kan han sawi tak nawmchenna kan thlahlel vang te pawh ani mahna! Hausak te chu kan tum leh thlahlelh ani fo a, chutih avang chuan kan kawng zawh pawh kan chhut ngun hman lo a, a dik leh dik lo thlu lo in kan kal hlawk hlawk a, thenkhat te chuan kan hlawhtlin pui pawh ani thei e. Mahse engti zawngin nge ka hlawhtlin a, engti zawngin nge ka hlawhchham tih erawh chhut fo a pawimawh khawp mai. Thufing pakhat chuan ‘thil tih eng pawh hian tlukpui sawhkhawk pangkhing lehlam a nei țhin’ a lo ti a, a Bible țawngkam ah chuan ‘miin khawvel hi a pumin nei se la, a nun chan si sela, a tan enge sawt ang?’ tih te pawh a awm kha.
Thenkhat tan chuan nun hi cho na a ni a, thenkhat tan chuan mahni ta ang maia duh ang zawng zawng a hman theih, mahni chu thuber leh lalber nihna ani a, țhenkhat tan erawh chuan nun hi awmze neilo, phurrit, hreawmna leh buaina in a hual vel ani. Kan hre kher lo ani thei e, mahse, engti kawng zawng zawng emaw chuan mahni chan theuhah kan nun hi a hrilhfiahna kan siam vek mai. Chu chu kan nitin nun danah a lang chhuak thin. A tam ber hi chu a chunga kan han sawi tak pahnih huangah kan nung tih hi phat rual ani lo.
‘Khawvelah engmah kan luhpui lo va, engmah kan chhuahpui dawn bawk hek lo’ tihte chu a thu in kan hre bel viau a, neih nei tur hian kan hmanhlel viau lawi si. He khawvel atanga kan neih theih thil tam tak zingah hian eng hi nge kan ta tih ngaihtuah chet chet chuan mahni ta nia kan lo hriat ve thin ngei ngei pawh hi kan ta tak tak chu ani lo ani ang kan thih huna kan chhawm theih lah ni suh. Mahse chumi hnunga tlan chuan kan in ham buai a, a tam thei ang ber chhek hman tumin kan nitin hun kan hmang a, Bumin awm suh u’ tih zawng zawng chu mi dang chanah kan dah a, keimahni leh keimahni kan inbum nitin thung si.
Thih hi kan hlawk pui ve chiah ang em?: Chutiang reng renga hun hmang ta chuan ‘thih’ hi enge ka tan anih ve tih te pawh hi kan ngaihtuah hman lo. Kan nun chu kan hlawkpui viau lai hian thih hi kan hlawkpui ve ang em le?. Khawvel thlirna ațanga hlawkpui nazawng hian thih hi an hlawkpui kher ang em? Thenkhat tan chuan thih hi hlohna nasa tak ani thei tlat. An kalsan tak khawvel hausakna leh ropuina zozai te hi tunge chang ta ang? Thenkhat in mahni nun ngei chu ningin thih an lo tlahlel ve tumhrang bawk nen. Chungte chuan an lei taksa kalsana thihna a an inbarh luh hian an hlawkpui reng ang em? He hringnun ah hian zirtur kan va ngah em! Tupawh ‘mahni tana nung lo a, kan thih aia thi a tho leh Krista tana’ kan nun hunah chuan thih pawh hlawkna hi kan zir thiam ve mahna.
_____________________________________________
_____________________________________________
No comments:
Post a Comment