"Unaute u, manah ka inngai lo. Amaherawhchu he thil pakhat hi ka ti ṭhin, hnunglama thil awm te chu theihnghilh a, hmalama thil awmte chu banin, Isua Kristaa chunglam Pathian koh chhan lawmman hmu turin tiam chin lam chu ka pan ṭalh ṭalh a ni.." (Phil 3:13-14).
Inchhir ngawih ngawih nun neiin hun i lo hmang ṭhin em? "Khatia ka lo ti lo kha chu aw, khatiang anga ka lo awm lo kha chu aw..." etc....vawiina i hlimna tur kha i hun kal tawh thil thleng avang khan tihchhiatsakin i awm em le? A awm anih chuan i hun kal tawh kha theihnghilh daih rawh. (I sawi tur ka hria..."Dik chu a dik, mahse a har a ni).
"Ka hun kal tawha ka thil tawn te kha engmah i hre lo.." i ti deuh lo maw? Paula kha ngaihtuah teh, Paula beih let nan Setana hian engpawh a hmang thei anih chuan Kristian tam tak a tihduhdah te, mi tam tak a tih hlum te, Stephana Isua Krista rawngbawltu chhuanawm a denhlum tir te kha a hmanrua ber a ni ve khawp ang. Chungte chu hriatchhuah tirin a thinlung vih sak nan a hman ber a ni ngei ngei ang.
Paula hian theihnghilh mai harsa a tih tur thil ṭhalo tak tak a ti ṭeuh tawh a sin. Nimahsela Pathian khawngaihna leh ngaihdamna ropui tak a dawng tlat mai a, chuvang chuan heihi a lo sawi thei a sin, "Hnunglama thil awm te chu theihnghilhin, hmalama thil awm te chu banin...tiam chin lam ka pan ṭalh ṭalh a ni.."
Ka ṭhian, Pathian chuan i thiltih tawh leh sualna zawng zawng te kha a bo a bang awm lovin a ngaidam vek tawh che a, a ngaihdamna che chu a famkim a, hmaih a nei reng reng lo. Chuvangin amah ngeiin, "An sual leh an bawhchhiatna te ka hre reng tawh lovang..." tiin a lo puang tawh a. Chuvangin amah berin i sualte a theihnghilh chuan i sualte hre rengin sawi chhuakin, Pathian chu a hriat tawh loh leh a theihnghilh tawh chu han hrilh leh fo tawh suh (Heb 10:17).
Paula ang khan i thil tih sual tawh te, mi i lo tih nat tawh te, thil dik lo i lo tih tawh te kha i theihnghilh ve thei a, Pathian chuan vawiina i mittui tla kha naktuk atan thilmak ah a chantir thei a ni. I hloh tawh te kha a leta rul chein a ṭhatna in a vur thei che a, thil engpawh, i hun hluia mi rilru nat thlak ber pawh kha i ṭhatna turin a thawhtir thei a ni (Rom 8:28).
Pathian chuan he thu hi a hrilh che a sin, *"Lalpa ropuina chu i hnu daltu a ni ang..." (Isai 58:8).* A ropuina chuan i hun kal tawhte kha a hliahkhuhsak dawn che a ni. Khawiah pawh kalin awm la, a ropuina chuan i hun hluite chu a hliah khuhsak ang chia, i hre reng tawh lovang, i hun kal tawh te lah i hriat reng ṭhin kha an ni tawh hek lovang, Lalpa ropuina chu i hnungah a lo chhuk thla tawh si a.
Theihnghilh sakin i awm tawh a, phiahfai a ni tawh e, chuvangin vawiina i hlimna turin i hun kal tawh a mi kha in vuak nawn tir tawh suh ang che.
No comments:
Post a Comment