Pathian hmaa kan lan chang hian kan tlangnelin a tih tura kan duhte hi kan hrilh zung zung a, hetiang taka ngam tlak leh tlangnel thei si hi a hming ṭan tura han chet chhuah a ṭulna hmunah te, a thuawih a ngaih viau na hmunah te, chawimawina hlan a ṭulna hmunah te hian kan zumzuk leh viau lawi bawk sia, ngaihtuah chian deuh chu a ngai ṭhin hian ka hria.
Engatinge Pathian hian kan thil dil hi kan duh anga min chhan loh ṭhin? Engatinge kan mangan em em na hmunah hian Lalpa chetna reng reng kan hmuh theih loh ṭhin? Bible chuan, ".......in dil loh avangin in nei lo va; in dil a, in dil dik loh avangin in hmu lo, in nawmsak nan hman in tum si a....." (Jak 4:2-3) a ti.
Lalpa hmaa kan inlan dan hrim hrim aṭang hian Kristian tam tak hi chu in enfiah kan ngai hle. Pathianin a kaltlang leh inpuan nan, thil ropui tihna atana a hman ho reng reng te nun hi uluk taka kan zir chuan heihi chiang takin a lang ṭhin. (hawrawppui ngatin kan sawi teh ang, a pawimawh emai) "LALPA HMAAH AN IN NGAITLAWM NGAWIH NGAWIH A, LALPA TANA AN PENCHHUAHNA AH ERAWH AN HUAISEN EM EM THUNG.."
Mosia kha Lalpan a koh khan tlinglo leh tlaklo a va han inti tehlul em..! Mahse a koh miau avangin Lalpa hna a thawhna hmunah khan a in ngaitlawm duai reng lo. Lal hmaah meuh pawh a zam ngai lo. Hmuh theih lohva kha engkimah a ngaichang zawk.
Isaia kha Lalpa hmaah chuan a bawlhhlawh zia inhriain a tuiral a ni ber mai. Lalpa tana a dinna ah erawh a nun a tlawmin a tlanchhe lo, Lalpan sawi tura a tih chu Lal lawm zawng a nih leh nih loh lam a ngaihtuah hek lo. Lalpa tan huai takin a ding zel mai.
Gideona kha Lalpan a mite chhanchhuak tura a thlan khan khawngaihthlak khawpin Lalpa hmaah a tlawm a. Lalpa tana a chetchhuahna ah erawh Lalpa leh Gideona ngunhnam ti chunga hnehtu huaisen a ni. An tam lutuk....Davida, Josefa, Petera, Paula an ni vek....Lalpa hmaah tlawm takin an inlan a, Lalpa tan erawh huaisen takin Lalpa engkimah dah hmasain an ding ṭhin.
Keini ve zawng Lalpa hmaah tlangnel takin kan ri bawrh bawrh thei zel a, rilru chapo ar chungin Lalpa kan bia a, kan ri bawrh bawrh thei zel a. Tlawm hunah hian kan huaisen riau thei zel a, a hming ṭan a hun, huaisen hun a lo thlenin Ar khual an sawi ang maiin kan khup leh zul zul lawi si.
Lalpa hmaah hian tlawm tak leh thuhnuairawlh takin inlan ila, a hming ṭan a ṭulna hunah hian a chakna rinchhanin huai takin ding ngam ila chuan Lalpa hi kan mamawh tinreng chhanna hi a ni ang.
Mahni nawmsak nana amah kar tlut tlut tu nun ai chuan na thuawih thei mite nun hi Lalpan inpuan nan a hmang fo ṭhin a, kei leh nang ai chuan a rawngbawl hna hi Lalpan a ngaihlu daih zawk fo.
I duh leh i beisei ang i chungah a thleng lo fo ṭhin a, Lalpa âw i hre hleithei lo anih chuan amah lam ringhlelin dem buai suh. Nangma nun lam in enfiahin Lalpa hmaah inlan dan dikin i inlan em? A tana i inpekna ah Lalpa a ropui em? tih hi inzawt rawh.
Lalpa hmaah in ngaitlawm a, a hmaah tlawm takin inlan la, Lalpa tan erawh huaisen zel rawh.
=====================================
No comments:
Post a Comment