PATHIAN NENA LENDUN

(Ka thu dawn thar pakhat)
.
Aw mihring, tha chu a entîr tawh che a ni; LALPAN a phût che chu eng nge ni? Dik taka tih leh khawngaihna ngainat leh i Pathian nena thuhnuairawlh taka #lendun a ni lo vem ni ?
(Mika 6:8)
.
Bazar lam pana kan tlan lai chuan, "NILENGIN I THLARAUVIN MIN PAWL LA" tiin kan sawi fo ṭhina, a chang leh, 'MIN PAWL LA' tiin kan dil fo ṭhin bawka tiin ka ngaihtuah a.
.
Nilenga titi te, ni leng lenga han inkawm te chu a va buaithlak dawn ve, Nileng lenga IN PAWL chu a ṭha dawn mi ? Hna pawh kan thawk hman dawn si lova. Kan hna a pending mai dawn a sin ! tiin ka ngaihtuah a.
.
Tichuan nula pakhat hian a ṭhiante hnenah, 'En teh, vawiin chu nuam ka ti lutuk a, ka hlim tawp mai a ni' a ti a. Eng nge i hlim chhan ti a an zawh chuan, 'Ka star deuh nen khan kan in hmuh a, thingpui te kan in duna, kan titi a' tiin a chhanga.
.
A star deuh nena an in tawn avang khan a hlim nileng ṭhak mai a. A star deuh nen khan an awmdun/lendun nileng si lova. Mahse, nuam a ti a, a hlim nileng ṭhak mai a ni.
.
Engnge a chhan kan tih chuan, "A star deuh thu sawi te kha a bengah a cham renga, a star deuh Sakhmel mawi tak mai kha a mitthla ah a cham reng a, a star deuh kha tisa in a kiangah awm lo mahse, A THUSAWI khan nilengin A PAWL tlat a !
.
A takin (Tisa in) Pathian nen kan lengdun thei lova, a takin kan titi thei tawh lo. Mahse maw, Thlarau ah kan titi dun thei a, Thlarau ah vek chuan NILENGIN KAN LENGDUN thei a sin !
.
Pathian thusawi te, lal Isua zirtirna te, Lal Isua thlamuanna thu te, a ngilneihzia te, a khawngaihna ngah zia te, a rinawmna te, a lainatnate, a zahngaihna thu te, A RINAWM ZIA te hi KAN BENGAH A CHAM VE RENG ṬHIN EM LE ?
.
Pathian nen kan in be reng hman kher lovang, Bible pawh kan chhiar hman reng kher lovang. Mahse, a thu zawm reng emaw, a thu sawi ngaihtuah chhun zawm zel erawh kan hnathawk pah pawh in kan ti thei a ni.
.
A thu ngaitla la, a thu ngaihtuah la, a thu chu ring la, a thu chu nunpui la, a thu chu puang chhuak la, a thu chu sawi zel la. Chutianga i tih phawt chuan NITIN IN, ZAN TININ PATHIAN NEN IN LENGDUN MAI DAWN A NI.