MAHNI TA KAN NI LO

A nih leh, in taksa chu,in chhunga awm Pathian hnen atanga in hmuh Thlarau Thianghlim in a ni tih in hre lo em ni le? Mahni ta pawh in ni lo va, Mana lei in ni tawh asin, chuvangin in taksaah chuan Pathian chawimawi rawh u.                     I Kor 6:19-20

           
Kan Pathian thu chuan mihringte hi ama ta kan nih zia bible chang kan han tarlan ațang khian a lang chiang hle. Bible chu a daw dawn si lo, chuvang chuan Pathian ta kan ni tih hi kan awih mai a țul awm e.
           
Bible bul lam kan chhiar chuan mihring te hi Pahian siam kan nih thu kan hmu a, ama anpui ngeia a siam kan ni tih pawh a lang chiang hle, chumai bakah a thilsiam dang zawng zawng ai pawha kan ropui bik zia te, a thilsiam dang te chungah pawh thunei tur leh enkawltu tur kan nihzia pawh kan hre țheuh awm e. Chumai pawh a la ni lo, nitin Amah nen an lengdun a; an in pawl țhin a ni. Chutianga Pathian nena lengdun țhin ama nunna thaw ngeia nung mihring te chuan sual bumna hnuaiah tluin Pathian fa kan nihna ațangin kan bosan ta a, fa kan nihna ațanga bosan in sual fa kan lo ni ta. Hrem tuar tur mihring kan lo ni.
           
Sual bumna avanga Pathian hremna kan tawh tur chu amah Pa Pathian ngei chuan phal lovin a fapa mal neih chhun Isua Krista chu kan sual thawinan amah leh amah in tihlungawi nan a fapa ngei nunna chu keini misual te min tlan nan min rawn pe ta ani. Tichuan Pathian thisena lei ama nunna a tlan chhuah kan ni a, keini in kan hriatloh lai leh kan pian hma kum engemaw zat kal tawh ațang khan sual bawih atangin min lo tlan tawh a tuna kan awm ang hian Pathin fa nihna hlu tak chu kan lo chang der tawh a Lalpa ka lawm e tih mai lo chu tihtheih kan nei lo.
           
Kan tih ve tel lo chhandamna kan chan avang erawh chuan tih tur kan nei ve ta, awm mai mai tur kan ni lo a, kan taksa peng te Pathian hman atana felna hriamhrei ah kan hlan ve a ngai a ni. Mahni duhzawng leh chak zawng a awm tur kan ni lova min lei tu Pathian ta kan ni a; a thu thu a awm tu kan ni, chuti ni lo a, mahni duh ang anga kan awm chuan kan taksa leh thlarau neitu hian kan chungah ro a la rel anga thiam kan chang hauh lo ang.
            
                      
_____________________________________