Tunlaia ringtute kan awm dan luih luih avanga rilru buai tam tak kan awm ka ring. Eng ber hi nge rin tur? Tu sawi hi nge thlawp ber tur hre lova awm tam tak kan awm ka ring. Rin dan hrang hrang a awm nuai zel tawh mai si a, hriat lohna hi chuan mihring hi min lo ti â teh a sin.
Thuthlunghlui hunlai ah kha chuan tun hun anga ban phak maia Bible chhiar tur an nei ve lo va, lehkha zial ang ah hian pakhatin chhiarin mikhualte pawn an ngaithla ṭhap zel mai a ni. An ngaihthlaka te kha an fate thlengin an inhrilh chhawng ve zel a, chutiang chuan Pathian lehkha thianghlim hi an lo chhiar ṭhin a ni. Keini hunah ve chuan kan vannei a, duh hun huna chhiar tur leh zir tur kan nei a, kan vannei em em thung a ni. Mahse thil pawi tak mai chu heihi a ni "Pathian thu Bible chhiar leh zir chian kan peih loh hi.." a ni.
Thuthlungthar ah hian entawn tlak tak Beroi khaw chanchin kan hmu thei a, anni chuan Pathian thu an ngaihthlak apiang mai kha Pathian lehkha thianghlimah a awm em? tiin an zawng a, an zir bawk a, fak pawh an hlawh a nih kha (Tirh 17:11). Tirhkoh Puala khan Timothea hnenah pawh Pathian lehkha thianghlim zirna lamah a fuih nasa hle a, zirtirna dik thutak chu venghim turin a fuih nasa hle bawk.
Engvangin nge Beroi khaw ringtu ten Pathian thu an ngaihthlak apiang Bible ah a inziak nge ziak lo tia an zawna zir chianna an neih bik zel? Pathian an hmangaihna chu dah ṭha rih phawt ila, zirtirna dik lo ata an fihlimna tur leh thutak Pathian thu chu a nihna ang anga hriat an duh vang a ni. Hetianga Bible nena endik zeltu nunah chuan thil mak tak tak lo thleng thut thil avangin an nun a buai pha ve ngai lo va, zirtirna dik anih leh nih loh pawh an thliar hrang thei vek nghal zawk a ni. Nang leh kei hian kan thliar hrang ve thei em le?
An hnen aṭangin enge zir tur kan neih ve? Mi thusawi nazawng hi pawng pawm leh zawm tum ve ngawt tur a ni lo va, Pathian thutak kan ngaina a, kan duh takzet anih chuan Bible ah kan zawngin kan zir chiang ve ngei ngei tur a ni tih hi kan zir tur awm chu a ni. A hniak tam lam lam zui ve ngawt chi pawh a ni lo. Bible chang pakhat leh lak vawng vaka a bung pumin a sawi tum loh dan anga mahni ngaihdana sawi fiah ve vak rawngbawltu te hi an tam tawh em em a, mipui te kan fimkhur a ngai em em a, mahni ngeiin Bible hi kan zir chian ve a ngai tawh takzet a ni.
Bible ah hian Pathian thlarau hnathawh dan leh a mizia nen lamin a inziak vek a, Isua pawn a lo sawi hnem viau bawk a, chungte chu Beroia ringtute angin kan zir chian ve a hun tawh takzet a ni. Chuti anih loh chuan bumin kan awm palh mai ang. Bible study neih hi mahni tan vek anih avangin taimak pawh a ngai bawk a, zirtirna dik lo ata kan himna awmchhun a ni. Thlarau dik lo leh zirtirna dik lo ata kan him theih nan Pathian lehkha thu Bible hi chhiar mai lovin a zirin zir ve tawh zawk ang u. Lalpan hriatfiahna min pe zel ang.
PATHIAN LEHKHABU THIANGHLIM HI PATHIAN ÂW A NI
Krista ringtu inti tawh zawng zawngah chuan Pathian lehkhabu thianghlim Bible hi Pathian thu a ni tih kan pawm vek a rinawm a, mahse hriat hmaih kan neih fo pakhat erawh a awm a, chu chu "hmun dang aṭanga Pathian âw hriat tum tlatna.." hi a ni.
Pathian ngaina hnam kan nih avangin Pathian âw hriat duh avangin camping ah te, crusade ah te, eng eng emaw tih ho na ah te kan kal a (Camp, crusade na ah kal loh tur tihna lam a ni lo) Pathian âw a lo thlen takin tiin kan phar kual nasa ṭhin hle a nih kha. Pathian âw kan zawnna hmun hi a dik teh meuh em le? Bengah engtin emaw ni lo awm turah kan ngai a, Pathian âw ka hre ve theilo reng reng tiin nun buai nan hial hman phah pawh kan awm ṭhin.
Pathian âw/ thu chu khawiah nge a awm? A Bible ah hian a ni a awm ni. Pathian hian i bengah thusawiin a rawn au lawng lawng dawn lo che a, a thu thianghlim Bible aṭang zawk hian a be ṭhin zawk dawn che a ni. Bible pawh kan chhiar ngai siloh chuan engtinnge Pathian âw/ thu chu kan hriat theih ang? Bible chhiar ngai lo Pathian âw hriat tum ṭhinte hian Setana âw an hre ṭhin a sin.
Pathian min biakna Bible kan chhiar chiah hian chu kan thu chhiarte hmang chuan Pathianin min pawlin min be zawk ṭhin a ni. A hranpaa âw anga min rawn be tura ngaihna kan neihna hi Setana bumna a ni. A thu thianghlim Bible chhiarna aṭangin Pathian âw/ thu chu kan hre thei a ni. Pathian âw hriat tumin ka bei a, eng thu mah a thleng lo kan ti maw? A Bible kha chhiar mai rawh. A lo pawl mai ang che.
Pathian kan ringa a thu awiha pawmtute kan nih chuan a thu thianghlim Bible hi Pathian min biakna, a âw/ thu ngei a ni. Hmun dang aṭanga lokal tur anga kan ngaih tlatna hi sim tawh ang u. Bible kaltlangin min be zawk a ni tih hi i hre thar ang u.
2 Timothea 3:16 "Pathian lehkha thu zawng zawng hi Pathian thawkkhuma pek a ni a, zirtir kawngah te, thiamloh chantir kawngah te, zilh kawngah te, felna zirtir kawngah te a sawt bawk a ni.."
=====================================
=====================================
No comments:
Post a Comment