Piantharna awmzia hi hrilhfiah kan mamawh ber pakhat chu a ni. Isua ngeiin "I pianthar loh chuan Pathian ram i hmu thei lo vang" a ti a.
Piantharna chungchangah Bible sawi dan lam en lo a mahni pianthar dan anga mahni pian thar thu sawi ta mai kan tam ta hle a, a awmzia sawifiah a țul phah ta a ni.
Piantharna chu danglam emaw ti ta mai lah kan tam. Danglamna inhriat veleh pianthar inngai ta an awm țhin. Danglamna tak anmahniah an hmuh hma loh chuan piangthar lo va inruat tlat lah bo lo. Anmahniah thil an hriat ngai loh an hriat tal avanga piangthar inti ta mai an awm bawk. An mumang lama hrilh awm nia hriaa pianthar inti ta mai mai lah an awm. Camping, Campaig leh Crusade te a mipui hmaa ding chhuaka inhlan ta ten pianthar ta emaw an lo inti rawl vei nen. Mitthla a Lal Isua Kros lam an hmuh avanga phur ta hlu, pianthar ta maia inngai an awm reng bawk. țawngțaina avanga dam ta te, mi thusawi avanga dam ta ten pianthar emaw an lo inti bawk a.
Sakhaw ngaihsak avanga inkhawm thlah lo, sual anga lang laka insumten piangthar emaw an inti fo bawk. Ram thuthlung, hnam thuthlung, Israel hlui leh thar, hun rukna leh hun sarihna buaipuituten an piangthar ta emawn an inti bawk țhin. Pathian fakna hla saka lam ta mai ten an lam avang chuan piangthar emaw an inti bawk a. Inlarna belhchian dawl lo tak tak, tuk hnih khata a dik lohna lo lang leh mai tur buaipuia phili tam tak ten piantharna kawng zawh emaw an inti bawk țhin. An tih tel lo va piangthar thei hauh lo an awm bawk.
Kan sawi tak zawng zawng bakah pawh hian Mizo Kristian zingah piantharna maksak pui pui pawm an tam mai. Heng zawng zawng te hian țanchhan an neiin piangthar an inti vek țhin. Kan pawng dem mai thei lo va, thudik leh Bible zirtirna kan kawhhmuh chu a dik hria apiangte mawhphurhna a ni.
Bible in piantharna chu engtin nge min hrilh tih chu kan hriat chian tur pawimawh tak a lo ni ta a nih chu.
Piantharna chu Pathian hrin tiin min hrilh. Lal Isuan,' Mi a pianthar loh chuan....,' a tih awmzia hi engnge ni ta ang ? Piantharna chu chunglam ațanga pian tihna a ni. Chu chu Pathian hrin tihna a ni. Mipa duhzawng pawh ni lo hmeichhe duhzawng pawh ni lo Pthian hrin anih thu Bible in min hrilh.
Kan nun neihsa pangngai tihdanglam emaw tihthar mai a ni hauh lo. Mumang leh pawn lama boruaka hmuhfiah chi a ni hek lo. Kan awmdan pangngai tih danglam hi pianthar na a ni lo tih kan hrechiang bang tur a ni.
Nun thar pek a ni piantharna chu. Nunna pangngai tihdanglam ni lovin NUN THAR pek a ni. Nunna pangngai tihdanglam ni lovin NUN THAR pek a ni. Chu nun chu Krista nunna nun danglam neia awm a ni zawk e.
Piantharna awmze pakhat leh chu thil siam thar a ni. Thil hlui siamthar (repair) a ni lo va, thil siam thar (new creation) a ni. Chumi awmzia chu kan nun neihsa siam thar a ni lova nun thar pek a ni zawk tihna a ni.
Mi tam tak chuan an nun neihsa tihdanglam/tih thar an duh a, an chak a, an tum ber a ni fo. Hei vang hian piangthar da leh, hnungtawlh, bo leh țhin ang chi an tam em em țhin a ni. Pathianin kan nunna hi a chhe tawh em a, min rawn tuai tharsak leh a ni lo va, eng chen pawh kan nunna hmang hian dam ila, misual nunna anih reng avang zawkin ama nunna lo chuan a hnen kan thleng zo lo tih min hriatsak a, Krista nun hlu tak chu kan nun thar atan min hlan ta a ni, amah Isua ngeiin,'Nangmahniin nunna nei hek lo che u', min ti a.
Kan neihsa nun chu rintlak a nih loh hria apiangin Pathian nun thar pek chu an ring țhin. Pathian rin chu mahni remchan hun hunah a ni mai lo. Keimahnia nun rin tlak, rinchhan tur reng a awm lo tih hriain Krista nun hlu chu chatuan nunah miin an ring ta țhin a lo ni.
Tin, Pianthar awmze dang min hrilh leh chu mitthi kaih thawh, thi lai thunun tiin min hrilh leh bawk. Bawhchhiat leh sualte avanga mithi Pathianin thihna ata a kaitho leh tihna a ni. Bawhchhiat leh sualte avanga thi nih inhre tlo tan chuan a ngaihna a awmlo hle thung ang le.
Bung hmasa lam kan sawi tawh ang khan Pathian lamah chuan mitthi, nun nei lo kan ni tih Pathian thuin min hrilh tawh kha. Piantharna chu thihna ata nunna tihna a nih chu. Kan nun neih ve hi Pathian lam atan chuan nun a lo ni hleinem, nun thi a lo ni reng zawk e tih hria apiangten nuin thar petu Krista chu an nunah an rinchhan a, piangthar an lo ni ta a ni.
Pianthar awmze engemaw chen kan sawi ta a, sawi leh zel tur pawh Bible changah a la tam mai. A pawimawh ber chu Nun Thar neih a ni. Nun Thar nei turin kan neihsa hi Pathianin nun tak takah min pawmsak tawk lo va, nun thi mai a lo ni tih hriat a țul phawt a. Kan neihsa tihdanglam emaw tihthar lam ni lovin Krista Nun Thar min pek chu kan piantharna a ni tih kan hre tur a ni ang.
_______________________________________
No comments:
Post a Comment