ISUA NISE...

(Ka rilruah awm ka rawn share leh lawk)
           
Isua nise engtin nge a tih ang tih tawngkam hi kan hre fo tawh awm e. A ni taka he thu kamkhat te mai hi a pawimawh hle mai. Ringtute nun kawng hruaitu tur dik tak pawh niin a lang. Kan thil tihna kawng tinrengah mahni inhmangaih tak leh hmasial taka hun hman mai pawh a awl hle mai. Chumi hunah chuan he thu tawi te hi ringtu tan chuan a pawimawh hle awm e.
           
Khawvel a cheng kan la nih miau avangin dik, fel famkim erawh a har hle ang tih chu a hriat theih a. Mahsela Lal Isuan min chhandam khan mifel famkim Amah Isua nun ngei nei tura chhandam kan ni bawk si. He khawvela kan chen chhung hian felna kawng chu zawh tur a buatsaih ringtu kan ni tlat si. Isua kan tisa mizia ang pu khan felna dan a zawh famkim tlat si a, chumi hnung zuitu kan nih avangin Isua tih ang ti thei tura siam, buatsaih leh chhandam mihringte kan ni tlat ani.
           
Kan thenawmte chunga kan rilru put hmang te hi Isua nise a pu ve kher ang ngem? Khawtlang leh ram kan hmangaih dan ah Isuan khawvel a hmangaih angin kan hmangaih ve em? Pathian rawngbawl kan in tih na kawngah Isuan a Pa rawng a bawl angin kan bawl ve chiah em? Kan hna a kan rinawm danah hian Isua nise kan rinawm ang tho hian a rawn ni ve a ngem? Mahni țheuh in zawt ila, in siamthat kan ngai a ni chuan in siamțha ang u. Isua nise engtin nge a tih ang ti chungin nun i zir ang u.

_____________________________________