•°•💖HMANGAIHNA MAK💖•°•
❣Tabitha Malsawmkimi Infimate.
💞 Hmangaihna chu enge ni? Hmangaihna chu mi pakhat ah chauh a lang chhuak thei lova, mi pahnih inkara thil awm ṭhin chu a ni, hmangaihna chuan hlimna chauh a thlen lova, lungngaihna leh ṭahna hmunpui min thlen tu pawh ani nghal ani, chu hmangaihna chuan mi pahnih thinlung phurkhawm tu ani a, hmangaihna chu thil chi hrang hrang tamtak in a par chhuak ṭhin,
💞 Ṭawngkam a han sawi fiah mai sen tur chi ani lova, mithiam mifing te chuan a indawt tlap in an sawi thei a, nufa in hmangaihna, pafa in hmangaihna te leh nula leh thlangval te kar in hmangaihna, te zawng zawng min sawi ṭhensak ṭhin, mahse, a sawi zo thei leh a sawifiah em em, tih tur an awm thei chuang in ka hre lo, chuvangin chatuan nunna tura misual chhandamna tura "Isua thisen chhuak" ang em kha ni lo mahse, eng ti khawng zawnga kan lo sawi pawn, kan thupui 'Hmangaihna mak' tih hian kan khaikhawm vek mai dawn ani.
💞 Mi tamtak in an lo sawi tawh ṭhina, sawi pawh an lo sawifiah thawkhat tawh hle in ka hria, mahse kawlni chhuak anga ni tinin a thar a thara lo lang chawp zel ani si a, an sawi hnem ang hian, an sawi fiah zo thei in ka hre chuang lo ani, hringnuna belh tlat ani a, mi puitling lam pan tawh te phei chuan pumpelh theih rual ani si lo, kan hringnun a thil lo thleng te zingah min ti barakhaih tu leh min khawih na tu ber ania, a chak ber bawk a, khawih theih leh teh theih ni lo mahsela, hun reilo te hnu a hringnun ti danglam leh vek thei khawpa chakna nei ani a, khawvela rosum kan chhuanvawr te ai pawh a hlimna min pe hnem zawk tu ani bawk.
💞 Hmangaihna hi a hlutna hriat a ṭul hle a, Hmangaihna hi awmin lang thei tawh miah lo sela chuan, hringnun hi lungngaihna in akhat anga, kan neih ro thilhlu leh thil mawite zawng zawng pawh hian, hlutna leh mawina an nei tawh bawk lovang, Hmangaihna der ni lo, hmangaihna thluantling leh mawi kan neih tawh chuan thildang mamawh dang kan nei tawh lo tihna ani, sawi mai mai ani lo, Hmangaihna tello chuan maw....., mipui sang tam tak zingah pawh, lungleng takin a awm theih a, mahni chauha awm anga hringnun hman theih ani, thinlai hnemtu tur awm lo chuan khawvel hi a ruak ani tawp mai ani,
💞 khawvel ah hian mihring tam tak awm mahsela, chung te pawh chu takchanglo, milem awmkhawm ang mai mai an ni, a ti mawitu leh a hluna hmu lo tu tan chuan, an thu sawi leh an thawm te pawh thawnthu ang mai in a ral leh zung zung mai ṭhin, mitin in hmangaihna kan pawimawh a, thuhril leh hla chang zawt anga zawt zo mai chi ani si lo, khawvel mi fing ropui leh thiltithei tak tak te pawh an nun in a mamawh ber zawk chu hmangaihna thiltihtheihna ani tho ṭhin, mi'n khawvel hi a pumin nei sela, a nunna chan si sela, a tan enge sawt ang? a tih ang khan, a hlutna chen tu tur leh a kawchhung lama anunna phur mawi tu tur ber hmangaihna a dawn si loh chuan engmahlo mai a chang zo ṭhin ani.
💞 Chutichuan, hmangaihna bat ang meuh a ruat kan ni si a, Hlimna chuai theilo chên a, in hmatawn a kan mawina neih ang te te a inhlan tawn tura siamtu kut chhuak te kan ni, Hmangaihna phurchhuak tu leh a dawngtu chuan, chhiar a fiah lo, ziak a fiah chuang bawk lo, a pâr tlan tur awm bawk si chu, a taka changin an chên tawh ang, chuta ṭang chuan hrungnun kawng tinreng ah hlimin a bul an ṭan tawh bawk ang, engkim takna bul chu Hmangaihna hi anih vang ani,
💞 Tuna kan sawi hmangaihna hi, mi pahnih ṭha bikriau, dem kai lo, engkim a tling te leh ro-sum tam tak neih vanga inkawp te tan ani lova, mi tlinglo ve ve te'n kan thlin lohna in hriatthiam pui theih a, an lungngaihna leh an harsatna indawmkang theihna hmuna an hlimna in chên tawnna chu ani, chuvangin, hmangaihna Hmangaihna thluantling chu mi pakhat chauhva a famkim theih loh avangin mi pahnih pum khata in siam te nunin a phur chhuak naah chuan a famkim thei chauh ani.
💞 Hringnun chanchhung reilote ah hian, siamtu'n Hmangaihna ziareng tam tak min thuhruk sak a, chu hmangaihna chu mita hmuh mai theih chu ni lo mahsela, thinlung ngaihtuahna erawh chuan thlir phak loh anei ngai si lova, damchhung ni thlakhlelh na tur leh, mihring te ti hlimtu tana ruat ani tlat, chuvangin he thil hi hreh tur ani lova, Hmangaihna chungchang ah phei chuan thilpek pawh hian a lutuk a nei si lova, Ṭawngkam, chetzia leh thil engkim hi thil hlu in a chantir a, mi pahnih inkar hlataka awm pawh a hnaih tir ṭhin, kum upat hnu pawn pahnih chu inlaichinna ṭha a siamsak a, phutletna nei lovin hriatthiamna leh finna a siamsak a, amaherawhchu, he kawng hi harsatna palthlang lova thlen theih erawh ani lo, harsatnain a chenchilh reng zawk ani..
💞 A chenchilh tih vanga lungngaia in dawmkun reng mai hian awzia erawh a nei chuang lo, Harsatna lo thleng te hian Hmangaihna chu a ti hlu thei chauh ṭhin zawk a ni, khuaizu in tur chuan tuar angai, tih anih si avangin, hmangaihna vanga thik na leh thikthu a lo awm te hi alo ava ṭha em! He thil hian mihring te a ti hlu zual a, kan kar a ti hnai tlat, lo awm lo ta sela chuan, nun thlahzal leh ho lutuk in kan awm dawn si a, mihring in kan tuar loh tur thil kan ti chhuak anga, chhuak thei tawh lo in chhiahhlawh ah kan in siam vek mai dawn ani, chuvangin, Hmangaihna hi thlir a chhut chet chet hi a ṭul ṭhin., vervekna tello hmangaihna dik leh mawi neih loh chuan khawvel leh a kawchhunga thil awm zawng zawng te, chân theih anih tlat avangin.
💞 Entirna'n, hmangaihna thluantling chên theilo te chu, minute reilote chhung ṭawng theihna hun nei sela, thinrimna thu leh lumgawilohna na thu in an rawn ti tawp anga, hmangaihna thluantling nei leh inngaidam tawn thei te erawh chuan, hmangaihna thu thlum takin an ti tawp ve thung ang, hmangaihna chuan hun a tlakhlelh tir theia, thinurna chuan hun a neih chhun pawh tlakhlelna a neih tir chuang lo, hmangaihna aia chak zawk mihring ah hian eng thahrui mah a awm chuang lova, hmangaihna thahrui chuan khawih phak loh a nei ngai lo, a thuk zia leh a sanzia, a thiltihtheih zia, a chakzia leh a zau zia hretu chuan, a tan khawvel thar a êng ani tih a pawm tlat a, famkim lohna khawvel ah hian famkim theihna awm chhun hmangaihna chu a pawm tlat tawh ṭhin.
💞 Amak chu anih hi, ziak a fiah lo, chhiar a fiah bawk lo, sawi tawh tih pawh awm thei lova sawi nawn fo ngai, en tawh sa tih awm thei lova en nawn reng atana duh awm, hmangaihna mit tih thu hi ka la belh leh lawk ange😇 hmangaihna chuan mit meng mawi a hre hle a, mit leh mit in tawk a, mit chhir a en te, chiang lo ruaia en thlengin, a hlimna tawk a hmu ve thei tlat, duhthusama fiah tawk a en a, in hmuh tawh hnu phei chuan, eng thu mah sawilo pawha a famkim thawk khat tawh ah a ngaih thei tlat, hringnun hian beidawnna a tawk a, dan rual loh thihna thlan khur thim luh thlengin, hmangaihna chun nun sawifiahna nung reng ani si a.
💞 He khawvel ah hian tu fa mah a piang nawn tur an awm si lova, chuvangin, Hmangaihna mak chanchin hi tu te karah mah a teh ateh theih chi ani lo a, ramri kham sak a, hei chen bak i pelh tur a ni lo, tih chi anih si loh avangin, hmangaihna teh theih loh, a ramri kham sak theih ni bawk lo chu, hreawmna leh tuarnain a chhem reng a, ṭah na leh nuih na te pawn an kiansan chuang lo, mi zawng zawng chuan hmangaihna chu an pumpelh lova, a hmun ah a chiang a, a bawihah tang vek kan ni ti ila, kan sawi sual kher lovang, hmangahna bawih ata chhuak tawh te chu, beidawng chunga nui a, beidawn na leh lungngaihna khawvel in hmalam a pan pui mek te an ni si a.
💞 Chu hmangaihna chu pangpar mawi tak angin a lang chhuak ṭhin a, a chheh vel ah chuan nun harsatna leh phurrit na ten a phuar vel a, a laiah thildang tibuaitu awm lovin amah chauh in a awm a, Beisei na in ahma a hruai a, a hnung lamah hriat fiah na in a um zui reng bawk a, hmalam ah thluang tak leh zalen tak kawng zawh tur awm mahse, hmun chhep na leh bumboh tak tak ah a tla lut fo ṭhin, a hnuai lam aṭangin hreawm na leh thlamuanna in a dawmsang reng bawk a, mahse hlauhthawnna leh thlaphanna, rinhlelhna ten a chungah thla an zar reng bawk. a mit ah chuan thil engkim te hi mawi tak in hmu vul reng mahse, mit khap khar chauh pawh in chu thil te chu a hmu chuai leh thei vek bawk, hmangaihna chuan nihna tamtak anei a, a luhchilhtu te mak tih a hlawh a, hringnun zawng zawng ti danglamtu ah a ṭang ṭhin, mi tamtak in, thil hlui te hnuchhawna, damlai nun bul an ṭan thar leh na ani fo ṭhin.
💞 Chutiang zel chuan hmangaihna chu hringnun tana hun ṭha tamtak khawhral sak tu ah a ṭang ṭhin a, nimahsela, beiseina bawm anih zia a lan na turin, thil tamtak tih kiang sak tu turin a ring nawn leh fo ṭhin, hmangaihna chuan pianpui unau ngah hle mahsela, a zawn ber hmangaihna bul ah lo chuan thlamuanna tak tak a hmu ngailo ani, hmangaihna chu hringmi za tam in insem dar ṭhin mahsela, muanna leh thil thluantling chen theih na tur chuan, mi pakhat tan chauh a nun pumpekna ani.
💞 Awle, hmangaihna lan chhuah dan kawng tam tak kan sawi tawh a, kan sawi hnem apiangin a thuk zia kan sawi pha lo tulh tulh bawk, eng tina sawi in nge a thil tih dan kan sawi fiah theih ang le? Hringmi te zingah hian, hmangaihna hna thawh dan a in ang vek ngai si lo, sawi zo theih lo ani ber in ka hria, mahse, mi zawng zawng mihring taka min siamtu hmangaihna hna thawh ani miau si, eng ti ang kawng a sawi pawn a hna thawh lan dan hi chuan, thling a pawn tho a ngai ta ani, Hmangaihna vang chauh hian ani, hringnun kawng chhuk leh chho, retheih lai leh hausak lai, bawrhsawm lai leh hrisel lai pawn nuam taka hringnun lamthluang kan zawh theihna chu.
💞 Chutichuan, hmangaihna vang bawk chuan hringnun hi tlakhlelh na leh beiseina thuk tak min neih tir phah bawk ṭhin a, hmangaihna hna thawh tello chuan nun ruak, nun khawharh ah a chang ṭhin si, chuvangin, hmangaihna hna thawh dawng ngailo mi phei chuan, nun thlaler, nun rou a nei fo tur reng ani, mihringte an phu tawk ang zela mawina pe tu leh parmawi chhuah sak tu hmangaihna hi ani ṭhin a, puitling tawh te pawh lawma hlimna avangin, ding chen pawh a ke akhai tir theih tlat, a hna thawh hi ngaihsam mai theih che ani lo a, hmangaihna hna thawh avangin khaw ropui tak tak a lo tlu chhe tawh ṭhin a, ram tam tak pawh a din chhuak tawh bawk, milian leh mi te pawh a thlir hrang lova, mi zawng zawng angkat a kan leng dun theihna ber a ni. Lal ropui tak hmangaihna aiin mi rethei tumah hriat phak loh hmangaihna pawh a ngainep thei bik chuang lo a, harsatna leh hringnun bui tur lakah pawh a hringnun a kai hruai thei tlat.
💞 Chawlhna hun nuam ah chuan hringnun a hruai ṭhin a, sal tanna hmun tinreng ata pawh a hruai chhuak fo ṭhin, hmangaih leh hmangaih inkar nun inpek tawnna, lawmna hna thawh chuan an lalṭhuttleng pawh aui an awm ngai lo, an chan phah hial ṭhin reng ani, chu mai bakah, mi tamtak nun a ti buai a, nun thluanglam ti bovin thinlung a ti danglam a, duh loh ram thlengin a nun a chan phah hial ṭhin, heng hmangaihna avnga fam chang tawh te hian, hmangaihna ropuizia an ti lang a, nun martarna hmun an pel zo tlawt lo a ni, chutiang hmangaihna hna thawh chu sel a, hnawl sak vek bik mai thei tur ani lova, hmangaihna hna thawh chu a diktak leh a diklo ber ṭhen fel theih anih loh tlat vang ani, hmangaihna chuan a mawi a mawi lo a thlir hrang lova, a lan dan phawt chu a tan chuan a mawi hlei hlei vek zawk ani.
💞 Chutichuan, hmangaihna chuan mi chak chakna chu a lak sak a, mi huaisen a ti tlawm ṭhin a ni, lipui thuk tak ai pawn a thuk zawk a, khandaih hriam tawn eng eng ai pawn a hriam zawk a, an duh duh loh thu dawn lovin mi a ti țap a, ṭap lai a ti bang thei bawk, ei leh in pawh zawng peih lovin mi a awm tir reng thei bawk a, zan mut tuah lovin suangtuahna'n ruam tin a fan pui ṭhin, hmangaihna chu thilhriam chi hrang hrang angin a lang chhuak ṭhin a, in dona hmanrua leh, remna silhfen a tling reng bawk a ni.
💞 Hmangaihna chu zawhna in a khat a, chhanna pawh chuan a kalsan chuang lo, amahah chuan hnamtin in zalenna an chang thei a, amahah bawk chuan mitin in an in leh lo, an nunna hial pawh an chan ngam bawk ani, chungtichuan, hmangaihna chu lei leh van ti mawitu a ni a, kan ngaihdan leh duhzawng te lo la chhuak ṭhin tu a ni bawk, mihringte hlutna ti langtu ani a, hmangaihtu leh hmangaih te karah hmun ruak luah khat tu a ni, hmangaihna chu tihchilh nun a tih lan a ni fo ṭhin a, in thihchilh ringawt kha ni lovin, hmangaihtu in a hmangaih tana hmangaihna a tih lan laia a hmuh leh a ngaihdan tak kha a ni, khatiang thihchilh ngam na leh duhna rilru kha hmangaihna tih lanna hmanrua a ni ve tho ṭhin si, a duhsam leh a chan a duh ngawih ngawih a chang pha tawh si lo avangin, a tan tih ngei ngai a ngaih ani ṭhin a, a tih dan chu a tan chuan a dik hle tho ṭhin ani.
💞 Chutichuan, a mihring pui te lakah mahni in that mi ṭhalo a hlawh a, a hmangaihna pawh chuan hmangaihna nunrawng a hlawh phah bawk ṭhin, kan thlahtu Adama leh Evii chungchang ah pawh kan hmu a, Adama chu, Evii-in Pathian thupek a zah zo loh avangin ânchhe ram ah a kalsan tawh tih a hriat loh pawh ni lo, a hrelo der ngam tlat vangin hmangaihna vangin thihna ah a lutchilh ve tawp anih kha, chu hmangaihna chu tunge ramri hman sak thei kan awm ang? Chuvangin Adma leh Evii pawh kha hmangaihna tak tak chang hmasa tu an ni a, an hun tawpna pawh hmangaihna tih lanna ala nih tho kha, a dik zawk nia hriat vanga engkim a ṭul anga zela tuar ngam, nunna hial pawh ui zo lo khawp in hmangaihna hian mit alo nei ani, chuvangin tun lai hun thleng ah pawh, chungang hmangaihna tuipui a tuk em vang leh lipui a lian em avanga raltiang thleng pha tawh lo nun nei hmuh tur an awm fo reng a ni, chutiang hmangaihna lana leh thihchilh nun nei te chu an che mawi hman lova, hmangaihna avangin mahni hma ansial a, an dawn kim hman tawh ngai bawk lo ani.
💞 Phutlet neilo hmangaihna chanchin tawi han belh leh lawk ang u, Titanic lawng lian, tuipuia a pil dawn khan, chhanhimna lawnga ṭhuthmun rem tawh hnu pawh, a chang pha ve lo te hmangaihna avangin, an ṭhutna te kalsan in, tuipuia thi turin an zuangtla sep sep tih kan hriat kha, tiang hian ka ngaihtuah ṭhin, an chhanhim te lak ah phutlet nei miah lovin, hmangaihna ah luangral an ni tawp mai tiin, sawitur ava tam duh em! Lal Solomona rorel laia hmeichhe pakhat ṭawngkam pawh kha le! Thinlaiah a cham reng ṭhin, Samari ram ṭam nasat laia hmeichhe pahnih fa an in chuh a, 'Naute chu a thih aiin ani'n nei mai rawh se, tia sawi na aw kha, damkhawchhuah na tura hmangaihna aw mawlh kha, ngaihtlak ava hahdam tak em! Amawi ka ti tawp thei lo.
💞 Chutiang bawk chuan, hmanlai a Lalnu Estheri pawh kha, a Juda chanpui te thih aia thi ngam khawpa phut let neilo hmangaihna luhchilh in, Lal Ahasuera hma ah a lan meuh chuan, a thiltum ber a sawi hma pawn, rangkachang hmawl khaikang in a lo hmuak a, a ram chanve meuh pawh pek phalna in a lo lawm lut anih kha, hmangaihna feh chhuak pui tu chuan, hmangaihna bawk a lo hawn leh a, khawvel a dam phah ṭhin a ni, chu chauh pawh ani lo, lal ropui tak Solomoa pawh kha a hmangaih, Sunam nula zawngin zan ah a lal silfen phelh in, Jerusalem kawtthler a fang vel a, 'aw Jerusalem fanute, Ka duhtak chu in hmuh chuanin Hmangaihnaah ka uai zo tih rawn hrilh r'u.a ti tawp mai ani, aw...Pathian thiltlawnpek ropui lutuk ringawt mai, hmangaihtu in ahmangaih tana a inpumpekna hlut zia leh ropuizia, hmangaihna thil tih hi tu in nge sawi zo thei reng ang,? HMANGAIHTU LAWMMAN CHU HMANGAIHNA ANI SI A.
The End.....
____________________________________
No comments:
Post a Comment