Engtin nge nupui leh pasal chu tê ber anga an inngaih ve ve ang a, chu chuan engtin nge an inneihna a nghawng theih?
Inneihnaah. Tûn laia mi tam tak chuan an mi mal dikna neih chu an ngaih pawimawh êm avângin, mi dangte dikna tihchhiatsak hial pawhin neih an phût ṭhîn. Mahse, Paula’n Rom khuaa mite hnêna nei tûra a tih miziate chu mi inngaitlâwm chuan an nei a ni. Rom mite hnêna a lehkhathawnah heti hian a ziak a: “Inremna tûr leh intihsâwt tawnna tûr thilte chu i ûm ang u,” tiin. (Rom 14:19) Tê ber anga inngaitu chuan mi zawng zawng nêna inrem a tum a, a bîk takin a kawppui a hlut tak nêna inrem chu a tum lehzual a ni.
Intihhlimna chungchâng hi ngaihtuah teh. Nupate’n intihhlimna an ngainatzâwng a inang lo mai thei. Pasal chuan a hun âwl chu ina awm a, lehkha chhiar nân hman a duh mai thei a. Nupui erawh chuan chaw ei a kal chhuah emaw, ṭhiante tlawh emaw a duh mai thei thung. A pasalin inngaihtlâwmna lantîr a, ama duhzâwng ringawt ngaihtuah lo va, a nupui duhzâwng leh duh loh zâwngte a ngaihtuah tel tih a hmuh chuan nupui tan a pasal zah chu a awlsam sawt dâwn lâwm ni? Tin, nupuiin ama duhzâwng chauhva thil tih tum lo va, a pasal duhzâwng a ngaihtuah tih a hmuh chuan pasal chuan a nupui chu a hmangaihin, a ngaihlu ngawt ang le! Nupate chu tê ber anga an inngaih ve ve chuan an inneihna chu a nghet sawt ṭhîn a ni.—Philippi 2:1-4 chhiar rawh.
Sâm 131-ah Davida’n eng rilru put hmang nge neih atâna ṭha a tih a, chutiang rilru put hmang chu engtin nge kohhranah kan neih theih ang?
Kohhran chhûngah. He khawvêlah hian, mi tam tak chuan an thil duhzâwngte tihpuitlin nghâl vat an duh ṭhîn a. Anni chuan dawhtheihna an nei lo va, thil engmah nghah an duh lo bawk. Tê ber anga inngaihna rilru put hmang neihna chuan Pathian beisei, a nih loh leh nghâk tûrin min ṭanpui a ni. (Sâm 131:1-3 chhiar rawh.) Inngaihtlâwmna leh Pathian nghahna chuan muanna leh malsâwmna, hahdamna leh lungawina min thlen a. Chuvângin, Davida’n a Israelpuite hnênah dawhthei taka Lalpa Pathian nghâk tûra a fuih pawh kha a mak lo ve!
Inngaitlâwm taka Pathian i nghah chuan chutiang bawk thil chu i tawng thei a. (Sâm 42:5) “Hnathawh ṭha” i duh avângin “kohhran hotua ṭan” i tum pawh a ni thei. (1 Tim. 3:1-7) Chutiang i nih chuan, hotu ni tûra mize neih ngaite i neih theih nâna thlarau thianghlimin i chunga hna a thawh theih nân i theih apiang i tih a ngai dâwn a ni. Mahse, hotu i nih nân mi dangte aia rei zâwk daih i nghah ngai ta se engtin nge ni ang? Rawngbâwlna chanvo pe tûra dawhthei taka Pathian nghâk a, tê ber anga inngaitu chuan hlim takin Pathian rawng a bâwl chhunzawm zêl ang a, a chanvo chan apiang chu lâwm takin a pawm ang.
Thil tihsual kan neih huna ngaihdam dîl leh mi dangte ngaihdamna chuan eng hlâwkna nge a thlen? Thufingte 6:1-5-ah eng fuihna thu nge chuang?
Mi dangte nêna inlaichînnaah. Mi tam tak tân chuan thupha chawi chu thil harsa tak a ni. Mahse, Pathian chhiahhlawhte chuan an thil tihsual pawm a, ngaihdam dîlin, tê ber nihna rilru put hmang an nei a. An chunga mite’n thil an tihsual pawh ngaihdam an inpeih bawk. Chapona chuan kohhranah inṭhen hranna leh inhnialna a awmtîr laiin, inngaihdamna erawh chuan remna a awmtîr thung.
Kan thunun phâk loh dinhmun engemaw avânga kan intiamna kan hlen theih loh hunah mi dangte hnêna thupha chawina hmanga ‘kan intihhnuai,’ a nih loh leh kan inngaihtlâwm a ngai mai thei a. Mi dangte thiam loh ni tel ve tho mah se, Kristian inngaitlâwm chuan ama tlin lohna anga ngaiin, pawm a inhuam ṭhîn.—Thufingte 6:1-5 chhiar rawh.
Engvângin nge kan za hian Bible-in tê ber anga awm tûra min fuihna chu kan ngaihhlut ṭheuh ang?
Tê ber rilru put hmang ang nei tûra Pathian Lehkha Thu min fuihna chu kan va ngaihlu tak êm! Chutiang rilru put hmang lan chhuahtîr harsa tih châng chu nei ṭhîn mah ila, min Siamtu dinhmun laka kan dinhmun engmah a nih lohzia kan hriatna leh a inngaihtlâwmna kan ngaihhlutna chuan chu mize hlu tak chu nei tûrin min chêttîr thei a. Chutianga kan tih chuan, Pathian chhiahhlawh hlu lehzual kan lo ni dâwn a ni. Chuvângin, kan zain tê ber angin i awm ṭheuh ang u.
_________________________________________
No comments:
Post a Comment