I DAWN ṬHIN EM ?

.
Thih hnu chuan nangmah hriat rengna a awm si lo va: Seol-ah tuin nge lawm thu hrilh dawn che? (Sam 6:5)
.
Hringnun zinkawng hi i dawn ṭhin em? Khawi ah nge a tawp ang a, engtik ah nge i hringnun a tawp ang?
.
Pathian thaw avanga nung ve i thlarau tan eng In nge i sak sak ve tawh?
.
Mi tam tak chuan kan mamawh ai a lian zawk In leh lo kan din a. In ropui leh zau tak tak kan sa a. Kan thih hnu ah erawh darkar hnih chhung vela YMA etc ten a an lai thlankhur bak In kan nei dawn si lo!
.
Kan dam laiin ram leh In lian pui pui kan duh a, khum nalh tak tak kan duh a. Kan thih hnu ah erawh chuan feet 8x3 bak ram kan mamawh tawh dawn si lo.
.
Chutiang ang mihring, chhum reilote lo langa ral leh thuai ang hi kan ni si a. Damchhung khawsakna a lungkham aiin kan thlarau tana lungkhama, Kuta saklo In, Vana Lal Isuan min sak sak In ropui tak mai chu luah ve ngei turin hawh u, thih thlenga rinawm in Lalpa thu i zawm zel ang u.
.
In ropui leh nalh tak tak ah mu ṭhin mahla, i chhunga thlarau khan i tisa a chhuahsan hunah chuan thlan khurthim bak mutna tur i nei tawh dawn lo a nia.

I THLARAU I THLAH HUNAH KHAWIAH NGE I AWM ANG ?

.
Mahse, mihring chu a thi a, a riral a. A ni, mihring chuan a thlarau a thlah a, khawnge a awm tak? (Joba 14:10)
.
Mihring hnara a thaw Lalpan a lak let leh chuan Tisa chu mitthi a ni nghal mai a. Mihring taksa pawh chu 'ruang' tih a ni leh nghal bawka.
.
A chhungte pawh 'mitthi chhungte' tiin an ko nghal mai a. A In hming ah 'KUANG' tih an sa a, a mutna tur khum pawh 'THLAN' a ni a.
.
An vuiliam hnu chuan a chhungte chu 'lusûn chhungte' ti a ko an ni bawka.
.
Engvanga minute khat lek chhunga chutiang a thil a danglam thut ṭhin nge ni ang?
.
Kan hmangaih leh duhber te pawh Pathian thaw in a chhuahsan tawh chuan kan khuma muttir reng te, kan hnena awm tir reng te kan duh tawh lo (?)
.
Tisa hi chuan hlutna a lo va nei tlem tak em ! Tisa hmelṭhatna hi chu a lo va hlu tak tak lo em ? A hmelṭha pawh, a pian nalh pawh, a duhawm ber ber te pawh Lalpa thlarau in a chhuahsan hun ah chuan an Tisa nalh leh mawi tak tak te chu tuman an duh tawh ngailo.

A chhanchu, mitthi an ni tawh tlata, an taksa pawh RUANG a ni tawh si a. Tunge mahni In a RUANG dah reng duh ang?
.
Chumi avang chuan chhum reilote lo langa ral leh thuai ang mihring nunna hi i dawn chiang leh zual ṭhin ang u.
.
Nimin mai a kan hmuh te, nimin mai a kan len chhuah pui te, nimin maia kan titipui ṭhin ten FAM KHAWPUI an lawi thut thut ṭhin si a.
.
Kan thlarau kan thlah ve hunah khawiah nge kan awm ang? I thlarau i thlah ve thut hunah khawi ah nge i awm ang?

KAN IN NGAIHTUAH LET NGAI EM ? .

Thil ṭha kan dawn ni ah te chuan kan hlim in kan lawma, Pathian fak leh a hnena lawmthu sawi pawh nuam kan ti a, harsa kan ti ngai lo.
.
Chhiatna lam thil kan chungah a lo thlen chang erawh chuan kan vuivai a, phunna tur kan zawnga, sawisel tur kan zawnga. Pathian lakah kan vui a, kan phuna, a chang leh kan hau a. Engvanga he chhiatna hi kan chunga lo thleng nge tih reng reng mi tam tak chuan kan ngaihtuah ngai lo niin a lang.
.
"Chhiatna" tia kan sawi tam tak hi ka ngaihtuah ṭhina, "CHHIATNA ti a sawi tur a ni vek lovang a" tiin ka ngaihtuah fo ṭhin.
.
Lalpa chuan A fa diktak te chu Hmangaihna avang zawkin a changin a thunun ṭhin tih te kan hria a. An ngaihzual thei nan a changin a bihruk san ṭhin tih thu te kan hriaa. Lalpan min bihruk san chuan kan thla aphanga, kan bei pawh a dawng fo ṭhin.
.
Chutiang hunah chuan eng nge kan ngaihtuah ang ? Eng nge kan ti ang ? Rinnaa mi fel tam tak te chuan an chunga thil lo thleng ṭhin te chu an ngaihtuah a, an in let a. Chutiang harsatna etc te chu Pathian hmangaihna TIANG angin an pawma.
.
Lalpa lam hawiin sualthupha te chawiin Pathian hma ah an inpumpek (surrender) a. Felna kawng zawh leh turin an nunna ngei chu an siamthar leh ṭhin.
.
Eng vanga hetiang harsatna te, buaina te, natna te, beidawnna te, manganna etc te hi kan chunga lo thleng ṭhin nge tih te hi kan ngaihtuah fo a ṭul tak zet a ni.

CHHANDAMNA SILHFEN TE MI BEL A .

Fapa tlanbo chuan duhamna silhfen te, itsikna silhfen te, tisa chakna silhfen te, hlimhlawpna silhfente, zu leh sa silhfen te, Sex silhfen etc te a in bel a.

Tichuan, a hringtu a nu leh pa te, a piantir ata hmangaih bertu te chu khawvel ropuina hmangaih zawk in a kal san ta a.

Mahse, reilote hnu ah a lo rethei ta a. Ei leh in tur a lo tlachham ta a. Chenna tur In a nei lova, țanpuitu leh hmangaihtu a tawng lova. Vawk chaw pek leh vawk chaw ei bak chanpual a nei tawh lo.
.
A silhfen mawi leh man to tak tak te kha a thler zo taa, lal leh mi hausa fapa mah nise a Pa nen inzawmna an nei tak lo avangin a silhfen te chu a thler zo ta a.
.
Tichuan, a vawk chaw pekna hmun ațang chuan a tho a. A Pa hnenah a haw leh ta a. A Pa'n a lo hmuh chuan, a rethei zia, thawmhnaw a nei chhiat zia te a lo hmu nghala.
.
A fapa'n a dil ni miah lo silhfen thar te, pheikhawk thar te, zungbun thar te a pe ta zung zung a. A vawkchaw pekna silhfen hlui chu hliptla in LAL FAPA SILHFEN MAWI LEH DUHAWM TAK TE CHU A PE TA A.
.
He lei silhfen te, tisa chakna silhfen te, lerhna silhfen te, duhamna silhfen te, Sex hman sualna sihfen te, eirukna sihfen etc te zawng KAN PATHIAN MIT ah a nalh in a mawi lova.
.
Chuvangin, tupawh simna dik tak nena sima A hnena kir leh te chu Lalpan a lo lawm anga. Chhandamna silhfen te a lo hak tir anga, Felna kawrfual in a lo tuam dawn a ni.

KAL LA, TUN HNUAH TISUAL LEH TAWH SUH - ISUA

.
Pawna naupang infiam chu chirah a tlu a, a kawr a berh nuai mai a. A nu'n a hmuh chuan rang takin a thlak saka, a taksa pawh a bual fai nghala.
.
Tichuan, kekawr leh kawr fai a la chhuaka, a hak tir ta a. A lu ah hriak a thi a, a hmai ah lotion te a hnawih saka. A fapa rim chu a tui ta hle mai a. A hmel pawh a ṭha sawt niin a lang.
.
A tluk zawh khan naupang khan a Nu pan nghal lo selang chuan rei tak bal deuhvin a awm anga. Mi'n mak an ti anga, a kawm duh tu pawh an vang ang.
.
Nimahsela, pan tur dik tak a Nu a pan nghal avangin a bal zawng zawng chu SILFAI nghal a ni a. A hak tur kawr fai leh silfen rimtui tak te chu pek in a awma. A tluk lai hmel chu a lang tawh lova, a lo thianghlim ta!
.
Khawvel lamah kal in, sual ah i lo tlu thei e. Suala tluk hi i tan thil thar a ni lova, i pianpui a ni. Mahse, i tluk pawh in tho na chang i hre tur a ni.
.
I tluk avangin lei ah mut reng tum lo la, i bal tak vek avangin i tih bal belh zel tum lo la, i silfen hak te a țawpa a rim zawng zawng a chhiat vek tak avangin chutiang silfen te chu hak reng tum lo la.
.
Naupang in a Nu a pan nghal ang khan, i thlarau damna turin Lal Isua pan nghal la. A ni'n Kawr thar te, silfen mawi leh rimtui tak tak te a lo hak tir dawn che nia.
.
Isua pan tu te tumah INCHHIR AN AWM NGAILO. Chuvangin, i khawvel nun te, kekawr te, kawr te, silfen te, thinlung te, rilru leh ngaihtuahna hlip tla la, A HUN LAI HIAN LALPA PAN LA, A NIN I SUAL TE A LO NGAIDAM DAWN NIA.
.
Tin, lehkhaziaktute leh Pharisaiten hmeichhe pakhat a uire lai an man an rawn hruai a; tin, a laiah an dintir a, Isua hnenah, “Zirtirtu, he hmeichhia hi a uire lai an man a ni, a uire lai takin.
.
Dan Lehkhabuah, Mosian hetiang mi hi lunga den hlum thu min pe a; nangin engtin nge i ngaih?” an ti a. Chu thu chu amah fiah nan an ti a, a hekna tur an hmuh theih nan. .
.
Chutichuan Isua a kun a, a kut zungin leiah a ziak a. Tin, an zawh sek sek avangin ani chu a tho va, an hnenah, “In zinga sual nei lo apiangin amah chu lungin deng hmasa rawh se,” a ti a.
.
Tin, a kun leh a, a kutzungin leiah a ziak leh a. Tin, anni chuan a thusawi chu an hriatin, upa berin a tan a, a tawp thlengin, pakhat khatin an relh chhuak ta zel a; chutichuan Isua chauh a awm ta a, hmeichhia a laia a awmna ngaia awm nen khan.
.
Tin, Isua a tho va, a hnenah, “Hmeichhia, khawiah nge an awm tak? Tuman thiam loh an chantir na che nge?” a ti a.
.
Tin, ani chuan, “Lalpa, tuman mi chantir lo ve,” a ti a. Tin, Isuan, “Kei pawhin thiam loh ka chantir lo va che; kal la, tun hnuah tisual leh tawh suh,” a ti a. (Jn 8 :3-11)

KAN HMEL ȚHATNA ISUA .

Thlalakna dawr ah ka in hlawh lai khan thla la turin mi tamtak an lo kal țhina, an thlalak an rawn lamin an mahni thlalak ngei kha faktu an vang khawp mai a.
.
A fuh lo, a țha lo, in la thiamlo a ni ang. Ka khul duh lo etc te ... tia mahni thlalak ngei mai duhlo tu tam tak zu han awm a !!!
.
Digital khawvelah kan cheng tawh a, kan hmai bawlh te, a duk etc te tih reh nan (edit nan) mi tamtakin #beautyplus leh photo editor app kan hmanga. Hmelțha kan tam sawt hle mai😂😂😀
.
Nula hmelțha i duh chuan FB ah zawng țhin ru tiin fiamthu in ka sawi fo țhin. A taka țha lem lo te pawh edit tawh chuan kan NGO in kan țha em em mai a ni. Mi tam tak chu kan BUM chiang  a lawm ! 😉😊😊😂😁
.
Lal Isua ah mi a awm erawh chuan FAK a hlawh țhina, mi'n an ngaisanga, a thusawi an ringa, thlarau thianghlimin a hruai țhin mi te phei chu an zûnah mi an uai sup sup mai țhin a ni a !!!😁😂😊😉
.
An mahnin an in EDIT ve lova, Isuan a EDIT țhin. Mahnia in edit hi chu a tlo lova, rei a dai lova, faktu pawh an tam ngai lo.
.
Isuan a EDIT te erawh chu hmelchhe deuh pawh nise an hmel a țha chungchuang a, mi rethei tak pawh nise mi hausa te ngaihsan an hlawh țhin.
.
Kei zawng khawvel makeup avanga hmelțha nih hlawh ai chuan, Isua Krista make up avanga hmelțha nih ka thlang zawk e.

IN DAM TLANG EM ?

.
Amah hmuak tûrin va tlan la, a hnênah, "I dam em le? I pasal a dam em? Naupang kha a dam em? 'lo va ti tawh khai," a ti a. Tin, ani chuan a lo chhang a, "Dam e," a lo ti a.
(2 Lal 4:26)
.
Khing zawhna 3 te khi chhangin Sunam Nu chuan Elisa chhiahlawh Gehazia chu "DAM E" tiin a lo chhang a. Mahse, an dam si lo a, a fapa chu a thi reng si a.
.
I țha em ?, i dam em ? In dam tlang em ? "Ka dam a lawm, kan țha lawm" tiin kan chhang mai țhina. A tak takah chuan Dam lo na ruk, natna ruk, buaina ruk, manganna ruk, thlaphanna ruk etc kan nei țhin.
.
Elisa hnenah erawh chuan Sunam Nu chuan an damlo thu leh naupang a thi thu a sawi ta. Chuveleh, Sunam Nu in lam panin Pathian mi Elisa chu a kala, naupang tan a țawngțai saka, Lalpan a fapa chu a kaithova, a pe leh ta a ni.
.
Kan natnate, kan buainate, kan manganna te, kan rilru hahna te mi nazawng bulah kan sawi tur a ni lova, kan phurrit te min chhawk zangkhai pui thei tu tur te bulah erawh zep miah lova kan sawi chhuah vek hi a țha a ni.
.
Sunam Nu pawn chhiahlawh Gehazi hnenah chuan a sawi duh lo. "Kan țha, kan dam e" tiin a sawi ve mai a. Pathian Mi hnenah erawh chuan a zep thei tawh lova, an natna a sawi ta. Zep tlat se'ng chuan a fapa thi tawh kha Lalpan a kaitho leh kher lovang.
.
Kan taksa dam mahse kan rilru a na mai thei, kan pawm lam nun hlimin lawm țhin mahse kan thlarau nun erawh a nguiin a mangang mai thei. Unau duhtak, pan tur dik tak pan na chang i hre thar teh ang u.
.
"Tupawh ka hnena lo kal chu ka hnawtchhuak tawp lovang " tia sawitu Hmangaih Isua pan ila, tichuan min lo tidam dawn a ni a.

PATHIAN HNENAH KIR LEH RAWH .

1. Inkhawm in....
I inkhawm fo ṭhin ti raw ? I ti ṭha e. Ringtu chuan a Nun chawmna turin Biak In kawng a zawh fo tur a ni. Mahse, i inthlahdah a, inkhawm i thatchhe tul tul tawh si a, karkhatah vawikhat/hnih bak i inkhawm pei tawh si lo.... Chuvangin, INKHAWM TAIMA IN i Pathian hnenah kir leh rawh.
.
2. Ṭawngṭai in....
I pianthar tir chuan ṭawngṭai te nuam i ti a. Tawite leka ṭawngṭai i thiam lo fo ṭhin ti raw ? I hmangaih ber Isu (Pathian) biak aia nuam tih reng reng i nei ngailo ti raw ?

Mahse, tunah zawng, ṭawngṭai i peih tawh lova. I tui lova, minute khat lek ṭawngṭai pawh i pei tawh lova. I ro tul tula, Pathian nen in in biak khat em avangin i thlarau nun a chau nitin zel bawk si a. Chuvangin, chakna thar i lo nei thei nan ṬAWNGṬAIIN Pathian hnenah kir leh rawh.
.
3. Bible chhiar in.....
Lehkhabu dang zawng zawng aiin Bible i ngai hlu a, i hmangaih a, i duat a, i chhiar ngun ṭhin ti raw ? I thlarau Nun chawmtu Chaw ṭha ber chu nitin zantin in i chhiara, i ngaihtuah a, chhiar nawn leh i chak fo ṭhin ti raw ?
.
Mahse, tunah chuan Changkar 5 lek pawh i chhiar pei tawh lova. Bible i keu loh na pawh a rei tawh ti raw ? I chhiar hnuhnung ber Ni/Zan i la hria em ? Bible i chhiar khan Lalpan a bia che tih hria la, Lalpa biak reng mi, nula, tlangval, nu/pa nih i duh chuan i bul hnai maia awm reng Bible kha la la, chu chu CHHIARIN Lalpa Pathian hnenah kir leh rawh.
.
4. Sim in .....
Lo kal ve rawh, keiman ka khilai ang che. Pawisa chu ka nei a lawm. Kan in ho/dun dawn nia. Damdawi te mai mai, a rim pawh a awm si lova. Ei ṭeuh mah la e, tu man an hre chhuak chuang lovang che.... tia dawt thiam taka sawi ṭhintu setan thlemna chu a tak tak emaw tiin i lo zawm mai tawh si a !
.
I kal thu telh telh a, i buai tulh tulh a. I hlim dawn emaw i ti a, i lungngaihna a zual zel zawk si a. I hah a dam dawn emaw i ti a, i phur a rit tul tul zawk si. I mang a anga, tih ngaihna reng reng i hre si lo. Unau duhtak, i tan Lalpa a la rinawm renga, a lama i hawi kir hun nghakin beisei takin a lo thlir reng che a sin !
.
Chuvangin.... SIM in.... Lalpa Pathian hnenah kir leh rawh.

TINRENG DAMDAWI ṬHA BER !!!

Hmanna țanga vawiin thlenga Pathianin a mite tihdam nanna a hman țhin damdawi awm chhun chu Bible, Pathian thu a ni.
.
Thlarau dam nan hei lo hi Lalpan damdawi dang a nei lova, hei bak hi damlo te a chaw ve ngailo.
.
He damdawi țhatna em em chu, ei țeuh pawn Over-dose a awm ve lova, side effect a awm miah lo bawk. Cancer vei tan pawh a țhaa, TB vei tan pawh a țhaa, HIV vei tan pawh a țha a, eng natna vei pawn ei se an dampui zel țhin.
.
A țhat lehna dang chu, he damdawi hi a EXPIRE ve thei lova, mithianghlim lawr hma chuan mi zawng² tanna TINRENG DAMDAWI ȚHA BER a ni zel dawn a ni.
.
A țhat leh zualna chu hei hi a ni. Tisa leh Thlarau damna a ni a. Zu nghei theihna te, eiruk rehna te, thinrim tih rehna te, thatchhiat tih reh na te a ni a.
.
KS damna te, ler nun paih thei na te, sex hmang sual tan inchhirna leh simna te, huaisenna te leh tlawmna nun DAMDAWI ȚHA em em a ni bawk a ni.
.
Tin, sual dona damdawi țha ber a ni bawka, finna damdawi te, felna damdawi te, rinawmna damdawi te, hriatthiamna damdawi te, dikna damdawi te, hmangaihna leh khawngaihna DAMDAWI ȚHA BER a ni bawk.
.
A țhat berna nia ka hriat chu "Thlarau Damna Damdawi" a nih hi a ni. Thlarau a damna changte chuan chatuan nunna an nei nghala, Vanram kai theina DAMDAWI a nia, Chatuana Vanrama awm thei na DAMDAWI a ni.
.
He Damdawi bak hi damdawi dang Lalpan min pe lo. Thlarauva damlo ten hei bak hi DAMDAWI ei tur kan nei lo. Chuvangin, tinreng damdawi BIBLE, Pathian thu, Lalpa nunna thaw a, A thawkkhum ngei mai hi unau, ni tinin lo ei la, engtik lai pawn i hrisel mai dawn a ni a.
.
Lalpan mal sawm che rawh se.

DIL LA, DIL NAWN RAWH. .

Sakeibakneipuk aṭangin Danielan Pathian a chettir a. Sangha pumchhung aṭangin Jonan Pathian a chettir a, Sadraka te ṭhian zaho ten Meipui rapthlak tak hmaah Pathian an chettir bawka.
.
Chu Pathian chu zanin/vawiina kan biak mek Pathian hi a ni a. Chettir thamin kan au em ? Cettir thamin kan ṭawngṭai tak tak em ? Chettir thamin Lalpa hi kan be tam tawk em ?
.
Kan ringtupui ten Lalpa an au eih thei chuan engahnge keinin kan au eih theih loh bik ang ? I beiseina bo suh se. I beiseina tihbo/tawp tumin setanan i rilru control a tum ang.
.
I rilru leh ngaihtuahna thinlung te kha Lalpa pe la. Anin a control chuan engtik lai pawh in BEISEINA NUNG i nei ang. Chuvangin, Lalpa a eih hma loh chu DIL LA, DIL NAWN LEH RAWH.

HMANGAIHNA DIK CHU A THIKTHU A CHIA

.
Tehkhinthu in ka ka ka ang leh ang ! Bialnu ka han nei ve dek deka, mi dang nena an lendun ka phallo nghal hmak mai a, ngatinge ? Ka duh in ka hmangaih em vang a ni.
.
Ka bialnu chuan mi dang a biak tam ka phallova, a biak tam chuan ka hau fo ṭhin. A chhan chu ka hmangaih em vang a ni.
.
Ka nupui chuan mi dang a biak tam ka phallova, abiak tam chuan kan in hau nghe nghe ṭhin. A chhanchu ka hmangaih em vang a ni.
.
Mi hmangaih bertu Lalpa hian mi dang nena kan len dun fo te, kan inzui fo te, kan inkawm fo te hi a phal bik ka ring lo. A chatuan hmelma setana nena inzui leh inkawp tlat te phei chu a huat hian a haw ngawih ngawih ang tih hi a lang chiang si a !
.
Amah biak aia mi dang han biak tam zawk te, a hnena lawmthu sawi aia mi dang hnena lawmthu sawi tam zawk te, amah rawn aia mi dang han rawn tam zawk te hi A LAWM KA RING LO !
.
Chumi avang chuan a thikthu a chhiaa, a hmangaih fate a hrem fova, a vaw fova, a ti na fo ṭhin. Lalpan a hmangaih fate a thunun fo ṭhin tih kan hria,a chhanchu, A HMANGAIH EM VANG A LO NI.
.
Hmangaihtu chuan a zilhau ṭhin ang chenga, a hmangaihtu che chuan a sawisel che anga, i suahsualna ah a zilh fo ang che. Hmangaihtu diktak RILRU AH CHUAN THIKTHUCHHIATNA hi automatic in a pianga.
.
Thikthuchhiatna ṭha chuan kawng dikah mi a hruai ṭhina. Thilthuchhiatna diklo chuan kawng bumbo ah mi a hruaia, atawpah chuan an nunna hial pawh a lak sak ṭhin.
.
Thilṭhalo kan tih apiangin Pathian rilru a na zia a, thil sual kan khawih te hian lungawilovin Pathian kan siam bawk ṭhin. Sual kawng kan zawh te hian Pathian rilru kan ti na a, a hmangaih fate chungah thununa TIANG a lek ṭhin.
.
Chutiang Pathian thikthuchhiaa chu kan Pathian hi a ni a. Min hmangaih em avangin a thikthu a chhia a ni.

KHAWVEL HNEHNA DAMDAWI ṬHA BER CHU RINNA A NI .

Pathian hrin tawh phawt chuan khawvel a ngam zel si a; hei hi a ni, khawvel hneha ngamna chu, kan rinna hi. (I Jn 5:4)
.
Lal Isuan eng thu nge a sawi kha ? "Thlamuang takin awm rawh u, keiin khawvel ka ngam ta" tiin Lalpan min thlamuan a nih kha.
.
Chukchu mai mai te chu kan hlau lova, kan rap sawm vek ngam. Rannung te chi te pawh kan hlau lova, kan rap sawm vek ngam bawk. Taivang te pawh kan rap tawp tawp mai ṭhin ti ru ? Kan hlau reng reng lo.
.
Ram hnuai ah i kal a, rul i hmuh chuan i rap mai mai kher lovang. Ngatinge ? I hlau tlat a lawm. Khuaivanrial i hma ah lo fu ta se, i rap sawm mai mai lovang. A chhanchu, a zuk/seh pal che i hlau a lawm ti raw ?
.
Ka cousin hmaichhe pakhat hi a mak ve khawpa, khawvela a hlauh ber chu CHANGPAT a ni awma. Kawnga changpat lo tawl vel mai mai a hmuh chuan a haw leh tawp mai ṭhin a ni. Ka tan chuan engmah a ni si lova..... Kan ngam loh apiang mihring in kan hlau ṭhin.
.
Lal Isua chuan Khawvel leh a chhunga sual (setana) chu a hlau lova, a ngama, a hneh bawk a. Chuvangin, a ringtu te hnenah he thu ropui tak hi an rinn turin a sawi a ni.
.
Thlamuang takin awm rawh u, keiin khawvel ka ngam tawh si a tih hi.
.
Khawvel i hlau chhung chuan i ngam ngai lovang. Khawvel i dah chungnung zawk chhung chuan a thu hnuai ah i kun reng anga, I PHUR A RIT TUL TUL ANG.
.
Khawvel hi in hneh sak thei a ni lova. Hneh leh ngam bawk i duh chuan RINNA , Isua Krista rinna i nei angai. Chumi RINNA chu a ni, Khawvel hneh a ngamna Damdawi awm chhun chu........

ENGKIM TAN PATHIAN HUN RUAT A AWM .

Engkim tan hian hun ruat a awm a, van hnuaia thiltih zawng zawng tan hun remchâng a awm: (Thuh 3:1)
.
A hun lo mange aw, a la hun lo, damlo hun a ni lo etc tiin kan sawi fo țhina. Kan sawisel fo na chhan chu HUN RUATTU KAN NIH LOH VANG a niin alang.
.
Engkim tana Hun ruattu chuan a hun ruat ang zel a thil zawng zawng thlen tir vek a duh a, a thlen tir zel bawk țhin. Van leh khawvela engkim hun ruattu hian a la ruat sual lova, a tih sual ngai bawk lo.
.
Lalpan mihring hi thi turin a ruata, chuvangin, kan hmangaihte an thi mai a ni. Lalpan țah hun min ruatsaka, chumi hunah chuan kan țap mai țhin a ni.
.
Lalpan hlim hun min ruat saka, chu mi hunah chuan kan hlim em em mai țhin a ni. Lalpan damlo hun te min ruat saka, kan dam lova, amah vekin dam hun min ruat saka, kan dam leh mai țhin.
.
Lalpan harsat leh mangan hun min ruat saka, chu mi hunah chuan kan harsa in kan rilru pawh a mangang hle țhin.
.
Lalpan ni thlak hun a ruata, a thla mai a, chu ni vek chu a chhuah hun a ruatsak leh a, a chhuak leh mai țhin. Lalpan pian hun a ruata, thih hun pawh a ruat țhin.
.
Damlo hun Lalpan a ruata, Dam hun pawh a ruat bawk ṭhin. Hausak hun a ruata, rethei hun pawh a ruat bawk țhin.
.
Unau duhtakte u, Engkim tana Hun ruattu Lalpa hian i tan ni țha leh ni țhalo a ruat ve ve a. Eng ni pawh lo thleng se, a remruata in nghat ngam RINGTU NUNNAH CHUAN VUINA TUR RENG RENG A AWM NGAI LOVE.

BIBLE QUIZ TOPIC:- 1 & 2 PETERA LEHKHA THAWN

9/10/WEDNESDAY

⏰TIMING:- 8:00-9:45PM

👩🏻‍🔬Q/M:- TABITHA INFIMATE

HENG ZAWHNA TE HI CHHANG RAWH.

Q1.  Nova dam laia tuia chhandama awm te kha mi engzat nge an nih.?
Ans: Pariat (I Petera 3:20)

Q2. Lalpa hmel chu tute chungah nge a awm țhin?
Ans: Thil tisualtute chungah a awm thin,” (I Petera 3:12)

Q3. Peteran ka unaupa rinawm tak ka ruat a tih kha tunge a hming?
Ans: Silvana  (I Petera 5:12)

Q4. Tu ten nge thil an tihsual lai khan Pathianin a zuah lo va, a tih te kha?
Ans: Vantirhkohten (II Petera 2:4)

Q5. Enge in tih tlat chuan Sari fate in ni ang a tih kha?
Ans: Sarin Abrahama chu “Lalpa” tiin a thu a awih ang khan. Engmah hlau lova thil tha in tih tlat chuan, (I Petera 3:6)

A KARAWL DAH KHAT RAWH.

1.  nimahsela ani chu a bawhchhiatna avangin zilhhauvin a awm ta a; ...................... chu mihring tawngin a lo tawng a, zawlnei atna chu a khap a ni.
Ans: sabengtung tawng thei lo (II Petera 2:16)

2.  kan Lalpa Isua Kristan mi hriattir ang khan .............. dah bo hun chu a thleng thuai ang tih ka hre si a.
Ans: ka bawkte (II Petera 1:14 )

3. nimahsela tunah vante leh lei awmte hi chu mi thu avang vek chuan Pathian ngaihsak lo mite ................... atana dahin hal tura khek a ni.
Ans: rorel leh boral ni (II Petera 3:7)

4. Tupawh chung thil nei lo chu ....... ........ a ni a, hnai tea mi chauh a hmu thei a, a hman lai ................. chu a theihnghilh ta si a.
Ans: mitdel, sualte tlenfaisakna, (II Petera 1:9)

5. Krista hming avanga hau in nih chuan in eng a thawl e; .................., Pathian Thlarau chu in chungh a awm si a.
Ans: Thlarau ropui tak, (I Petera 4:14)

A BUNH LEH A CHANG ZIAK RAWH.

1. Lalpa chuan amah ngaihsaktute chu thlemna ata chhan chhuah dan leh fel lote chu rorel ni atan chuan hrem chunga khek dan a hria;
Ans: II Petera 2:9

2. bawlhhlawh kai lo thisen anga Krista thisen hlu chuan tlan in ni zawk tih in hre si a;
Ans: I Petera 1:19

3. Tin, khawngaihna zawng zawng Pathian, a chatuan ropuina chang tura Kristaa kotu ngei che u chuan rei lo te in tuar hnuan a siam tha famkimin, a tinghetin, a tichak ang che u.
Ans: I Petera 5:10

4. mi hauhva a awm laiin a hau ve thung lo va, a tuar laiin a vau lo va; fel taka ngaihtuah thintua hnenah chuan a inpe zawk a.
Ans: I Petera 2:23

5. chi chhe thei lakah ni lovin, Pathian thu nung reng leh awm rengah chuan chi chhe thei lo laka piang thar in ni zawk si a.
Ans: . I Petera 1:23

1 & 2 PETERA LEHKHA THAWN GK

1. Petera lehkhathawn pakhatna ah hian bung engzat nge a awm?
Ans: ( 5 )

2. Petera lehkhathawn pahnihna ah hian bung engzat nge a awm?
Ans: ( 3 )

3. Petera lehkhathawn 1&2 inkawp hian chang engzat nge a awm?
Ans: 166

.              Sam 119:140
I thu hi a thianghlim êm êm a ni; Chuvangin i chhiahhlawh hian a ngaina a ni.

_______________________________________________

ISUA LAM ENIN

Heb 12:1

Isua lam a en chhung chuan tui chungah Petera chu a kal thei mai a, mahse Isua lam en lova khawvel tuifawn a en chuan a pil dawn ta mai si a. Isua lam a en leh vata, Lalpa a auva, Isuan a chhanhim leh ta a ni.

ISUA LAM EN CHU KHAWVEL TUIPUI FAWN LEH RAPTHLAK TAK AṬANGA CHHANDAMNA NI TIH A LANG CHIANG HLE.

Isua en chung zelin Puithiam lalber in hual chhung kawtlai thlengin kha mi zan khan ava kal ve a. Reilote hnu ah khawvel lalte leh mi dangte hmaah a Lalpa chu a phatsan a. Mahse, Isua lam a en leh a, Lalpan a sualna a ngaidama, a zitirte zinga hming langsar ber leh hruiatu ropui ber anga sawi ngam a lo ni ta a ni.

KHAWVEL MITE HMAAH LALPA PHATSAN ṬHIN MAH ILA, SIMNA THINLUNG DIKTAK NENA A LAM KAN HAWI LEH CHUAN KAN SUALTE NGAIDAM TURIN KAN LALPA HI A RINAWM TAWK A NI TIH A LANG CHIANG HLE.

A thawnthu an sawi dan chuan Petera chu a tlan chhiaa. Mahse, kawngah Isuan a lo tawka. Khawpui ah chuan a haw/lut leh ta a. "Ka Lalpa anga khaikhan chu ka phu lova, kei chu a letling zawngin min khaikang rawh u' a ti e an tia.

ISUA EN CHUNG ZELIN A LETLINGA KHAIKANA MARTARA THIH A THLANG ZAWK TA NIIN A LANG.

Khawiah pawh Lal Isua nen chuan awm ila,
Amah ka Lal a ni, ṭhian dang ka ngai lo'ng;
Lungngaihna kawngah pawh min hruai mah sela,
Isua nen chuan lawm takin ka kal zel ang.

Hrehawm taka thimin min rawn vel pawhin,
Isua nen chuan muang takin ka chhing thei ang;
Harh hunah pawh ka bo tawh lo'ng tih hria in,
ISUA NEN CHUAN IN NUAM TAK A CHANG ZEL ANG.

Lal Isua nen chuan him takin ka kal zel ang.

BIBLE QUIZ 📖🖋 TOPIC:- JEREMIA 21-30

⏰TIMING:- 8:00-9:45PM

👩🏻‍🔬Q/M:- TABITHA INFIMATE

HENG ZAWHNA TE HI CHHANG RAWH.

Q1. LALPA'N Babulon tan kum engzat nge a kin veleh ka rawn kan ang che u a tih kha?
Ans: sâwmsarih chu (Jeremia 29:10)

Q2. mipui hnêna tihhlum tûra an pêk loh nâna Jeremia țan tu kha tunge a hming?
Ans: Mahse Saphana fapa Ahitkama (Jeremia 26:24)

Q3. Sabengtung phûma phûmin a awm ang tia Lalpa'n a sawi kha tunge?
Ans: Judate lal Jehoiakima, Josia fapa (Jeremia 22:18-19)

Q4. Tu tan nge zar fel ka chhuahsak hun tûr chu a lo thleng dawn, tia Lalpan a sawi kha? a hming an la vuah tûr kha enge ni?.
Ans: Davida, ,'LALPA chu kan felna a ni' tih hi (Jeremia 23:5-6)

Q5. Nang chu ka tan Gilead ang, Lebanon tlâng chhip ang i ni; Mahsela thlalêr ka chantir ang chia, Luahtu awm lo khawpui ang mai hian. A tih hi tu chungchang thu a sawina nge?
Ans: Juda lal chhûngkaw chungchang thu (Jeremia 22:6)

Q6. Sala an hruaina hmunah, chutah ngei chuan a thi ang a, he ram hi a hmu leh tawh lo vang. Tia Lalpan a sawi kha tunge?
Ans: Juda lal Salluma, Josia fapa, (Jeremia 22:11-12 )

A KARAWL DAH KHAT RAWH.

1.  Kal la Heti hian LALPA chuan a ti. .............. chu i titliak a, a aiah ................  i siamsak zawk a nih hi.
Ans: Thing nghawngkawl, thir nghawngkawl (Jeremia 28:13)

2. ..................... chhûngin ................ Babulon lal Nebukadnezzaran hemi hmun ata a laka, Babulon thlenga a kalpui zawng zawng kha, he hmun ngeiah hian ka rawn thlen leh vek ang.
Ans: Kum hnih pumhlum, LALPA in bungbêl (Jeremia 28:3)

3.  He ram pum pui hi a chhia ang a, a ram ang; tin, heng hnamte hian .................. rawng kum sâwmsarih an bâwl ang.
Ans: Babulon lal (Jeremia 25:11)

4.  Tin, ................ hêng thu zawng zawng ang zêl hian ka sawi a: ............... bat ula, amah leh a mite rawngbâwl ula, in nung dawn nia.
Ans: Juda lal Zedekia hnênah, Babulon lal nghâwngkawl (Jeremia 27:12)

5. Tin, ............... chuan puithiamte leh LALPA ina ding mipui zawng zawng hmaah chuan ................. hnênah,
Ans: zâwlnei Jeremia, zâwlnei Hanania, (Jeremia 28:5, 7)

A BUNG LEH A CHANG ZIAK RAWH

1. Ka tihrisel leh ang chia, I hliam zawng zawng chu ka tidam ang; LALPA thu chuak chuan a ti; Hnawhchhuah' an vuah chia, Tuma ngaihsak loh Zion a nih hi, an tih che avângin._
Ans: Jeremia 30:17

2. Tin, LALPA ka ni tih mi hriat nân thinlung ka pe ang : ka mite an ni ang a, an Pathian ka ni ang: an thinlung zawng zawng nên ka hnênah an lo kir dawn si a.
Ans: Jeremia 24:7

3. Thi ta chutah suh ula, sun hek suh u; Kal bo taa erawh chu nasa takin tah rawh u, A lo kir leh dawn tawh si lo va, A pianna ram hi a hmuh leh dawn tawh loh avângin.
Ans: Jeremia 22:10

4.  Nangni lama ka rilru putzia chu ka inhre si a, in hun hnuhnung tawpah chuan beiseina pe tûr che uin thil tha lo ni lovin thatna ka ngaihtuah asin
Ans: Jeremia 29:11

5.  Hla taka awm Pathian ni lovin, Hnaitea awm Pathian êm ni ka nih? Tih hi LALPA thu chhuak a ni.
Ans: Jeremia 23:23

Sam 73:26 Ka tisa leh ka thinlung hi a chau ta a: Nimahsela Pathian chu kumkhuaa ka thinlung chakna tûr leh ka chanvo tur a ni.🙏🏻

________________________________________________

SUAL AH SUAL ȚHA A AWMLO

.
 95018 22685 hi phone number dik a ni a, he number ah hian i call chuan mi pakhat in 'HELLO' tiin a lo chhang ang che.
.
SMS i thawn pawh in, a deliver anga, i miss call pawh in miss call tih a phone ah a lang anga, i whatsapp pawh in i message a lo hmu ang.
.
Phone number a dik chuan kan biak duh te direct in kan be thei a, a diklo chuan manganna ti zual tu mai ah a chang thei tlat.
.
He phone number tawpna hi 5 a ni a, a tawp ah 1 emaw  6 emaw, 7 emaw, number dang hrim hrim i dah chuan i phone tum tak i phone thei ngai lovang.
.
Pakhat a diklo pawhin i be thei lovanga , pasarih a diklo pawn i be thei chuang lovang.
.
Chuvangin, a diklo chu a diklo vek a. Pakhat diklo leh pasarih diklo kha a in ang reng.
.
Sual lian a awm lova, sual te pawh a awm lo. Sual țha a awm lova, sual țhalo bik pawh a awm lo.
.
Sual chu sual a ni a. Sual ah sual țha a awm ngai lova, a awm ngai lovanga, a awm thei bawk lo.
.
Sual chu sual a ni. Sual tamtak tih leh sual vawikhat tih a in ang reng. Vawikhat ruk leh vawi 9 ruk pawh a in ang reng. Ruk tam leh ruk tlem avangin sual lian leh sual te a awm lova, PATHIAN MITHMUHAH CHUAN A IN ANG VEK A NIA.
.
Chuvangin, sual ah sual țha a awm lova, sual chu sual vek a ni.

ENG DARTHLALANG AH NGE KAN IN EN ṬHIN ?

.
Elrel leh inngaihhlut avanga engmah ti lovin, mi tinin inngaitlawm takin mahni aiin mi dang țha zawkah ruat țheuh rawh se; (Phil 2:3)
.
Darthlalang pahnih a awma, pakhat ah chuan kan hmel kan hmu thei a, kan chala bawlhlawh kai te, kan make-up pherh leh pherh loh te kan hmu thei veka. Chu darthlalang chu #Darthlalang_Isua a ni a.
.
Lal Isua ah chuan kan tlin lohna te, kan chak lohna te, an mawi lohna te, kan fel lohna te, fiah em emin kan hmu țhina.
.
Darthlalang Isua ah chuan mi dangte chak lohna emaw, an sualna emaw, an fel lohna emaw a lang thei lova, keimahni tlin lohna leh fel lohna hlir a lang țhin.
.
Darthlalang Isuaa in en ṭhin te chuan nitin in ha an nawta, hmai an phifai a, kawr fai an ha a, an sam te an khui mam a, thawmhnaw fai in an in thuan ṭhin.
.
An tihsual te, an tihpal te, an in hre zung zunga, chungah chuan thiamthu sawi aiin thutpha chawi an hrat zawk ṭhin.
.
Darthlalang setana erawh chu a lang thlang thei a ni a. Tukver darthlalang ang hi a ni. Kan han ena, kan hmel a lang thei lova, mi dangte, pawnlam mite, khawlaia leng leh vak vel mi dangte hlir kan hmu zawk țhin.
.
Darthlalangah setana chuan mahni sualnate, fel lohna, chak lohna te, tlin lohna te kan hmu thei ngai lova, mi dang fel lohna te, mi dang țhatlohnate, mi sualnate hlir kan hmuh țhin.
.
Unaute u, eng darthlalang ah nge kan in en thin ?
.
Vawiin a țang chuan hawh u, Darthlalang setana chu paih bovin, kan in ah te pawh tar tawh lovin, kan room ah te tar tawh lovin, chutah chuan i in en tawh lovang u.
.
Darthlalang Isua ah chauh lo in en la, tichuan i rilru leh thinlung a lo thianghlim anga, I NUN A HRISEL ANGA, I HLIM BAWK DAWN NIA.

A HUN RUAT A LO THLENG THIN

Khatianga an nuṭa neihchhun in fam a chan taka khan hmanhmawh takin a farnute chuan Lal Isua hnenah mi an tir a, "I hmangaih kha a dam love" tiin.
.
Mahse, khami ni khan, "AW le, ka lo kal ang" etc pawh a ti lo niin a langa. A ngentu Mari te unau tan khan a thinrim thlak ngawt ang (?).
.
Kei chu ni ila, ka chhuahchhal nasa viau ang (?) hehe. Rawn kal hmanhmawh rawh aw tia an ngen laiin a awmna ngai ah Ni hnih a la awm leh a. A sawmtute rilru tur dawn chuan a thinrim thlak dawn lutuk ringawt mai a ni.
.
Marthii te khan Isua thiltihtheihna kha ataka han hmuh nghal kha an chaka, an rin Pathian zahngaihna a thara han chan nghal kha an duh bawk niin a langa, an hmanhmawh em em a, a awm pawh a awm a ni.

Chutih rualin Lal Isua erawh a hmanhmawh si lova. Ngatinge a hmanhmawh miah loh ? Tawite in chhang ta ila. Lalzara thihna kha thih hlenna tur a ni lova, Pathian mawi nan a ni zawk tih kha a hrechiang em em a.
.
Lazara thihna avangin Pathian Fapa chu chawimawiin a awm dawn tih a hria a. An dilna chhan a tuma, an ṭawngṭaina ngei pawh tihhlawhtlin sak a tum. Mahse, mihring duh hunah ni lovin a ropuina a lan tur hunah AN ṬAWNGṬAINA CHHAN SAK a tum a ni.
.
Tichuan, a uih vek tawh ang an ti hnu angah chuan A thiltihtheihna lan tir chu Lal Isuan a tum ta a. Van lam ah a vanvadak a, "Ka Pa, ka thu i ngaihthlak avangin i chungah ka lawm e. Kumkhuain ka thu i ngaithla ṭhin tih ka hre reng a ni; nimahsela mipui din vel avangin chu chu ka ti a ni, nangin mi tir tih an rin theih nan," tiin a ṭawngṭai a.
.
Minute khat chhungin thlan aṭangin Lazara chu a lo chhuak ta hlawlh mai a.Tichuan, a tuamna puan te an phelh sak a. Hlim takin an In lam ah an haw ta a ni.
.
Unau duhtak, kan timing set ah hian Lalpa hi a che duh vak ngailo. Kan duh hunah hian Lalpa hi a ṭuan a muang fo ṭhin. Kan nghakhlel ang hian min pe zung zung duh ngai lo.
.
A chhanchu maw, A HMING ROPUINA TUR LEH A HMING CHAWIMAWIA A AWM THEINA TURA A THILTIHTHEIHNA LANTIR HI LALPA DUHDAN A NI FO ṬHIN tih hi i hre thar leh ang u.
.
I ṭawngṭaina vawiin hian chhan in a awm nghal mai lo thei e. I dilna chhansakin i awm nghal mai lo thei e. Mahse, i beiseina ti bo suh la. Ṭawngṭaiin nghak fan fan rawh. Lalpa timing chu a dika, A HUN RUATAH A LO THLENG MAI DAWN A NI.

AWMA CHU KAN HNENAH A AWM

.
Pathian hi Oxygen ang a ni a. Oxygen hi mit in kan hmu thei lova, mahse a awm ngei a ni tih chu kan chianga, kan hre thei bawk.
.
Awma Nunga hi a awm chiang ngeia. A ringtu te hnenah a in puangin a in lar ṭhin. Awma chuan min Awmpui ṭhina, Awma chuan min kal pui ṭhina, Awma chuan min vengin min thlamuan ṭhin.
.
Awma awmna hmunah chuan thlarau zalenna a awma, muanna leh lungawina kim te a awm bawka. Awma in ro a rel lohna chhungkua ah chuan hlimna a awm lova, nun hi a i pik ngawih ngawih mai ṭhin.
.
Awma chuan mahni chauhva kan awm lai te hian min kawm ve a duh ṭhina. Awma chuan hun ṭha kan pek a beisei a. Awma chuan kan hmangaih let a phuta, Awma chuan amah ah kan awm ve reng a duh bawk.
.
Awma a awm chuan engkim mai a awm ṭhin.

KHAWVEL I PHUR CHHUNG CHU I HAH ANG .

Setanan khawvel hrehawm leh buaina, harsatna leh manganna, thinrimna, itsikna, in hauna etc zawng zawng phurrit a phur tir che a. I hah in i chau ngawih ngawih ṭhin ti raw ?
.
Kha tianga chauva, beidawng leh manganga awm tir che kha setana duh dan leh a lawm zawng tak a ni.
.
Mahse, khatianga nitin zantina khawvel phurrit phur reng kha Lalpa duh dan a ni lova. Lalpan a hmangaih che a, a khawngaih che a, chuvangin, chhawk zangkhai sak che a duh a. A hnen pan turin a sawm reng a che.
.
Khawvel hi kan phurrit atana Pathian in a siam a nilova, kan rapbet atana a siam a ni zawk.
.
Setana lawm zawng tih apiangin khawvel hrehawm an phur ṭhin. Khawvel phur ṭhin te chu an hah anga, an chau bawk ang.
.
Lalpa lawm zawng ti tu te chuan khawvel hi an rapbeta, an kepha hnuai ah an dah a, an kalna apiangah an rap zela, AN PHUR VE NGAI LO.
.
Khawvel rapbet tu nge i ni a khawvel phur ṭhin tu zawk! Khawvel phur ṭhin te chu an hah nitin zan tin anga, a rapbet tu te erawh an hlim nitin zantin thung ang.
.
"Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u.

Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang.

Ka nghawngkawl chu a nuam a, ka phur pawh a zang a ni," a ti a.
( Mt 11:28-30)