LALPA TANA HUN HMANG CHU INCHHIR RENG AN AWM LO

Pathianin mihringte hi misual leh mițha te pawh tumah duhsak bik nei miah lovin nitin darkar 24 hun țha min pe țheuh a, A ṭhen a hmang sêng lo pawh kan awm a, a ṭhen a hmang kham lo pawh kan awm nual a, a ṭhen chu buai em ema insawi a thawhchhuah nei hauh si lo te kan awm a, a ṭhen erawh chu engkim a pawimawh zawng zawng ti hman vek pawh kan awm bawk.

Buaina chhuanlam mite reng reng chu a tlangpuiin mi thatchhia leh mahni hmasial an ni duh viau mai, Mahni tan chauhva hman, midang tan chuan englai pawha buai em em reng mai, Pathianin thilțha ti hmanlo tur khawpa buai tura a siam kan ni lo, a sual pawh a țha pawh ti hman tura nikhatah hun darkar 24 meuh min pe a ni.

Chhungkua ka hriat pakhat te chu eng lai pawha buai reng renga in sawi reng an awm a, Kohhranin tih tur an sawi pawn buaina chhuanlamin eng lai pawn an lang ve ngailo hrim hrim a, Pathianni inkhâwm te pawh buaina chhuanlamin an inkhawm lo fo țhin, an chhungte pakhat chu kan inah a rawn leng a, kei chuan thutak deuh si hian ka lo fiam leh pek a, "Pathianin hun hi a pe thlem bik deuh pawh a ni ange ti raw? Khawvel tawp thut pawh lo ni ta se vanram pawh an kai hman dawn em ni? Tiang em em a buai chhungkua mai hi ka lo ti a, min lo support ve hle mai.

Kan Pathian hian  second khat chauh  pawh chhun leh zanah te pawh hian ka hah ka chau ka buai pawh ti miah lova min vengin min kalsan ve ngailo, mi lian leh mi lalte angin ka buai pawh min tih sak duh lovin chhun leh zanah pawh eng lai pawha biak reng theih turin kawng min hawnsak reng a, keini erawh chuan mi  biak a duh hunah pawh ka buai tiin kan hawisan leh țhin.

Lalpa tan hmun awl siam rawh ti'n kan ka in hla kan sa țhin a, kan chhungril lam erawh chuan Lalpa tan hmun awl siam rawh  tiin kan sa a, A tan hmun ti awl lovin kan awlsak  ta zawk a

Kan buai reng țhin avang hian a lawm Lalpan mi rawn thlawh a mi rawl pawl hlim ve a duh chang pawha mi rawn biak pawh hre lova kan awm fo țhin ni, kan buai a, a tan hun kan neih ngai loh avang hian Lalpa aw hrelo leh kan țawngțaina te pawh chhan a ni lo tia kan mangan leh fo țhin, kan inchhungah a rawn mikhual duh chang pawn a tan hmun kan siam sak ngailoh avang hian hmun chang lovin beidawng takin kan haw tir leh fo țhin a ni

Kan Biblein " Mikhualte  lawmin awm fo ula tia min hrilh hi buai thu leh hla hlir chhuanlam in thunawnah hmangin kan mikhual duhawm Lal Isua hi kan lo hnar țhin. Kan Lalpa Isua'n a thih dawn pawh khan ka buai pawh ti miah lovin nang leh kei tan Pa hnenah ala țawngțai mawlh mawlh a nih kha.

Ni khatah dârkâr 24 hial hun țha min pek tawh pawn kan la buai reng fo hi chu e, Pathian pawh a beidawn luat avangin nikhatah hei aia hun thlem min lo siam sak loh hi chu inchhir chang pawh a nei rum rum țhin ang tih a rinawm a ni.

Ni khatah te hin Pathian tan kan hun chanve kan pe phallo a nih pawn, a chanve chanve tal han pek pawh a awm in a phu ve ti ru. Pathian tana kan tihsak pawh ni lovin kan tan vek a thilțha a la ni leh nghal a, thih hnu pawha van thlenna kawng leh lawmman lallukhum dawnna a la ni zui a nih chu.

Mi pakhat hi cancer-in a na a, chutichuan thi tawh mai tur dinhmunah a awm tawh avang chuan a beidawng ta em em a, A ṭhat lai hun chhung zawng zawng chu Pathian tan hmang lovin, a duhzawng thilte tihna in a hmang fo țhin a, Piangthar nimahsela a țhatlai huna Pathian tana hun a lo hman tawk loh avang chuan Vanram a thlen huna Pathian hnenah a thilțha tih sawi tur a neih thlem em avanga a hrilhhai tur zia te a han ngaihtuah a, Pathian tana hun a lo hman tawk loh avang chuan a inchhir ta em em mai a ni, a thih dawn khan ani chuan kaitho a din tir turin a chhungte a ngen a, chutichuan "Ka Lalpa tana hun ka lo pek tawk loh te kha ka va inchhir tak em aw..! a ti vawng vawnga. Pathian a fak tawpna turin harsatak chunin ka kut vawikhat chu ala beng thei hram a, pawi ti em êm chungin chat zui ta a ni.

Piangthar pawh lo ni ta ila, kan ṭhatlai huna Pathian tana hun kan hmamg tawk lo a nih chuan kan thih dawnah pawi ti leh inchhir em em in kan la awm dawn a ni,  kan ṭhatlai huna kan awm dan khan min la vaw let ang.

Chuvang chuan unau duhtak, nakin huna i inchhir loh nan Lalpa tan hmun awl siam țhin rawh, mi tu pawh Lalpa tana hun hmang țhin mi chu inchhir an awm ngai si lo,

Lalpa'n a thu malsawm raw se.🙏🏿🙇🏻‍♀
_________________________________________

ZINGAH TU NGE KAN BIAK HMASAK BER ȚHIN ?

Tin, zing takah a tho va, LALPA chu an bia a, an haw a, Rama khua an in chu an thleng leh ta a: tin, Elkana chuan a nupui Hani chu a pâwl a: tin, LALPA chuan ani chu a hre renga.

(I Sam 1:19)

Vawiin thleng hian ka țawngțai hmaa mi dang biak hmasak hi ka la duh lova, Pathian biak hmaa mi dang ka biak hmasak chuan ka inthlahrung țhin.

Thank you Father, thank you Jesus, Thank you Holy Spirit ti a lawmthu han sawi phawta, min vengtu Lalpa hming lam hmasak ber hi a mawi hle in ka hria a, mi dang biak hmasak ngaih chang a awm hian ka rilru ah nuam loh tihna ka nei țhin.

Zan mut dawn ah kan biak hnuhnung ber chu Lalpa nise, zing thawh ve leha kan biak hmasak ber pawh Lalpa ngei ni se, kan chungah a lawm ngawt ang.

Kan duh leh kan hmangaihte "BIAK" kan beisei aia nasa in min Hmangaih a, a thisena min lei a, van khua leh tuia min siamtu Lalpa Isua Krista chuan KAN BIAK HMASAK BER HI A BEISEI ngei ang.

_____________________________________

Pathian hi-Min veng tura ngen fo si hian min ven tawhna leh min kaihhruai tawh na lamah lawmthu erawh kan sawi tam tawk lo fo țhin, Kan mamawh leh  dil nachang ka hriat reng reng loh pawh min pe țhin si hian a tan keimahni hi kan in pe phal tha leh mang der silo, Kan mamawh kan dil a, mi pek loh in kan vui a, Mi tih sak tawh te lam chhut silo hian vuina tur kan zawng leh fo țhin

Pathian hi-Min hruai rawh ti reng chung si hian min han hruai dawn tak tak a, mihring mawina ram pel rak thleng erawh chuan kan zui țha leh ngam chuang siloa..😬I duh zawng min hrilh rawh ti chung si hian a duh zawng chu min han hrilh ta chenga kan ti leh duh țhin loa., kan vui leh roh bok sia..😔Ka hnenah thu sawi rawh ti si hian thu chu an rawn sawi ta chenga kan ngaithla leh peihlo a, Kan duh zawng kan dil fo a; a duh zawng, alawm zawng, a țha tih zawng erawh kan ngaihtuah ngailo.

Hetiang mi nilo tur hian theih tawp ichhuah ang u.--Pathian tana tlemtê pe a, nimahsela, a hnen ațanga tam tak dawn tum leh tlat lawi si. Pathian hmanrua ni tura taksa hlan ui em em, a tana hrehawm tawrh peih miah lo. A hnen ațanga dam leh hriselna dil leh chamchi thung si. Pathian hmangaihna nei tak tak mang si lo va, aman min hmangaih leh duat viau tura beisei leh tlat bawk si kan va tam si em..

________________________________

Thei kung mawi lai ber chu a par hun lai a ni a. Mahse thei kung tana pawimawh ber chu a rah awm dan a ni a. Thei kung ven him pawimawh ber hun chu a par lai a ni a. In mawi ber lai hunah in par mek hlawm a. Inven that in mamawh ber hun a ni.Tichhe tur che u hian setana bumna thil itawm tam tak in hmachhawn dawn avangin, hetih hunah hian nun in chen a nih vaih chuan in la tap leh dawn. I nunah harsatna a lo thleng a nih pawhin a danglam lo. Hei hi hringnun nihphung a ni, Hringnun hi tuifinriat ang a ni an ti thin. Tui inang reng hi mawi taka fawn chang te, rapthlak taka fawn chang te a awm thin. A fawn mawi lawmtu chuan a fawn rapthlak pawh a pawm tel tur a ni. A tha lam leh a chhe lama nun dan thiamte hi character rintlak nei an ni. He character tak hi a ni Lal Isuan min thlak danglamsak a tum chu ni. Pianthar hi harsatna tawh loh nan a ni lo va, harsatna tawk tlak mihring siam nan a ni.

MAHNI KRAWS PUIN ISUA ZUI A NGAI

Tupawh mahni kraws pua mi zui lo apiang chu ka zirtir a ni thei lo vang. (Lk 14:27) tiin Lal Isuan a sawi a.

Mi dang kraws ni lova mahni kraws pua amah zui zel turin Lalpan min zirtir a. Chuvangin, mi dang en a ngailova, a țul lova, mi dang en a țangkai bawk lo. Isua hnung zui hi nangman țha i tih chuan zui tawp mai la, mi dang avangin in tibuai miah suh aw.

Kraws chi hrang hrang pu a Isua hnung kan zuina tur țhenkhat te :

Mahni inkhawngaihna kraws te,                      

        

Mahni thiam lo na kraws te,
Mahni chaklo na kraws te,
Mahni tisa chakna kraws te,
Mahni insitna kraws te,

Mahni nupui/pasal te kraws te,
Mahni fate kraws te,
Mahni chhungkaw kraws te,
Mahni țhiante kraws te,

Mahni thinchhiatna kraws te,
Mahni thu duhna kraws te,
Mahni țha in tihna kraws te,
Mahni induhtawkna kraws te,

Mahni retheina kraws te,
Mahni beidawnna kraws te,
Mahni rilru hahna kraws te,
Mahni thatchhiatna kraws te pua, nitina a hnung zui zel turin Lalpan min sawm a ni.

Khing lo pawh mahni kraws dang a la awm țeuh ang, chung zawng zawng kraws, harsatna chu pua Isua hnung zui zela, a tawpa nunna Lallukhum khum phah ngei turin mahni hreawm pawisa lovin i zui zel ang u.

A TLUAN CHHUAK LALPAN A DUH

Chuvangin LALPA in Pathianin thu a pêk che u anga ti turin fimkhur rawh u; dinglamah emaw, vei lamah emaw in peng tur a ni lo.

In va luah tur ramah in awm a, in hmuingilna tur leh in chen rei thei nan LALPA in Pathianin thu a pêk che u kawng in zawn tluan chhuak tur a ni. (Deut 5 :32-33)

Vawikhat chu ka phone in software update tur a dawnga, update tumin download ka tuma, vawitam tak ka try a, mahse 99% ah a fail zel mai a. 99%-a a fail zel avangin a tam zawk download mah ila 1% ka download thei lo avangin ka phone software chu ka update thei lo.

Lalpan kawng zawh tur min pe a, Lalpan thupek min pe a, ding lamah emaw, vei lamah emaw peng bo lo tura fimkhur taka kal turin min beisei a. A tawp kan thlen hi Lalpa hian a duh a ni.

College kal inti ve si, Degree zir chhuak lo chuan amah leh amah a intimualpho tihna niin a lang. Zir uka, zir zo leh si lo tunlai hian kan awm ta nual niin a lang bawk.

A tawp thlenga zir chhuak turin, a tawp thlenga a kawng zawh turin, a tawp thlenga atana rinawm turin, a tawp thlenga Amah chauh Hmangaih turin Lalpan min beisei a ni.

Chuvângin, kan Lalpa duh dan hre chung zelin, kan nitin nun dan kawng tinreng ah, A KAWNG I ZAWH TLUAN CHHUAK ANG U.

PATHIAN NENA NGAIHTUAH DUN KA CHAK A NI

He thu hi keimah ngei pawh hian ka chak thei hle a. Min hmangaihtu Lalpa nena hmai chhana titi te, ka hlimna leh ka lawmna thu te, ka buaina leh ka rilru hah na te hi a hnenah thlen a, Amah, Lalpa nena zawi dûn hi ka chak ṭhin.

Unaute u, hmai chhana kan thu leh hlate sawi dun thei rih lo mah ila, a hnenah erawh engtik lai pawh in kan thlen thei reng a.

Lalpa nena i engkim mai ngaihtuah dûn i chak ve em ? I thinlung zawng zawng, i thil tih ṭhin te kha Lalpa hnenah i sawi ngam vek ang em ?

I nitin hun hman dante kha Lalpa hnenah i thlen ngam vek ang em ? Zan tina i hun hman dante, i chhungte hriat lova i thil tih te kha Lalpa hnenah i thlen ngam vek ang em ?

Ni tina ka mita ka hmuh ṭhin te, benga ka hriatte hi Lalpa nena hmaichhana sawi dûn ka va chak ṭhin tak em !!!

CHAW ṬHING HLIR KA EI/RING ṬHIN TA EM NI LE ?

Sam 119:11

Rawlthar hun lai te, tlangval hun lai te ka thlir leta, ka nitin hun hman ṭhin dante kha ka han herkir leh a. Zingah hma takin ka tho ṭhina, Biak In lam panin Pathian be turin ka kal ṭhin a.

Lehkha zir dawnah pawh ṭawngṭai hmasak phawt ka duh ṭhina. Bible ka chhiar tama, vawi eng emaw zat chu nguntakin ka chhiar chhuak ve ta ngei bawka. A bu chhung thu zawng zawng hi hriat fiah/chian tumin ka chhiara, ka zir ve ṭhin bawka.

Ka zin chang in ka thlen In te hnenah, Biak In awmna leh zing ṭawngṭai Inkhawm ṭan hun te ka zawt bawk ṭhin a. A thei hram chuan zing ṭawngṭai inkhawm a kal ve zel kha ka tum ṭhin.

Khati hun lai a ka zirte, ka hriatte, ka chhiarte leh ka dawnte khan vawiin ni thlengin ka Nun hi min la chawm reng fo niin ka hre ṭhina, chutih rual erawh chuan, CHAW lum aiin chaw dai (ṭhing) ka ring ngunin ka ei tam ta zawk ta em ni tiin ka in zawt nawn leh fo ṭhin.

Chaw ṭhing reng reng chu Chaw thar, chhumthar te ang a ni lova, a tuina pawh a nepa, mihring hriselna atan pawh duhthusam niin a lang lo.

Kan tisa chaw nitin vawi 2/3 kan ei ṭhin. Thlarau lam chaw hi vawi engzat nge kan ei ṭhin ? tih te hi ka rilru ah a lang lian hle a ni. Kan duh te, kan hmangaihte chu nileng leh zan tairek thleng pawhin biak kan ning ngai lo.

Chungte pawh chu nakin lawka kan hmelma mai turte pawh an la ni thei. Chatuan thlenga min hmangaihtu Isua chanchin te, A LOVE LETTER te hi nikhatah vawikhat tal kan chhiar ve ngai em le ?

Hmanna kan chhiar bak kha kan chhiar leh ta lo em ni ? Chaw chhum thar ei lovin chaw ṭhing hlir kan ei/ring ta zawk em ni ? Hriselna atan zing tin Chaw kan chhum thara, tlai tin chaw kan chhum leh bawk ṭhin. Chaw ṭhing leh chawhmeh ṭhing ring ngar ngar zawng kan taksa tan chhiatna a ni thei tlat.

Chuvangin, thlarauah mi hrisel tak kan lo nih ngei thei nan kan thlarau tan chaw ṭha, CHAW NUNG, BIBLE hi chhiarin, Nitin in Chaw thar lam zel i ei ṭhin ang u.

(Sam 119:11)

MI AWHAWM TAK KA NI TAWH ANG

Khawvel tehna chi hrang hrang ațanga teh leh buka kan awm chang hian kan buk a rit lova, kan tling zo ngai lo. Finnaah te, thiamnaah te, hausaknaah te, rosum thu ah te min han bûka, ka tling zo ve ngai lo !!

Hringnun khawvel ah hian mi awhawm tak chu ka/kan ni lo tih hi min hre chiangtu ai pawh in kei hian ka in hrechiang em em a. Mahse hei hian min hnem țhin.

Nikhat chu Nungturin ka la thi ve ngei anga, mithianghlimte lenna leh chawlhna ram nuam Paradise ah ngei chuan ka la chawl ve anga.

Khawvela min hmusittu te, Lal Isua ring duh lova hnarh tu te kha chatuan hrem hmun ah an kal anga. Meipui rapthlak taka nghaihsakin an awm anga.

Chu mi hunah chuan Van lam thlirin an rawn hawi anga. PA angchhunga thlamuang leh hlim em ema ka/kan awm lai chu min rawn hmu tawh anga, MI AWHAWM TAK KA NI TAWH ANG.

Tin, mitthi khuaah chuan na tak tuar reng rengin a awm a, a han vanvadak a, hla taka Abrahama a angchhunga Lazara awm nen a hmu ta a.

Tin, a au va, ‘Ka pa Abraham, mi khawngaih la, Lazara kha han tir rawh, a kut zung hmawr tuiah chiah sela, ka lei tihdaihna turin; he mei alhah hian ka na em em a ni,’ a ti a.
(Luka 16:23-24)

KAN MITTUI A TLA TAWH LOVANG, HMANGAIH REH TAWH LO NA RAMAH CHUAN

Sual avanga rumin chhing mittui far țhin mahse, rethei leh pachhiat luat avangin kan thinlung rumin mittui tla țhin mahse, thihna avanga rilru na ngawih ngawih in kan mittui sur țhin mahse, khawvel hreawmna leh lungaihna zanthim hian min delh reng țhin mahse,

Lal Isua kan rin a, a thupek te kan zawma, a duh dan anga kan khualzin kawng kan zawh tawp hun ah chuan Vanram kawtchhuah a Hmangaihtu Isuan min lo hmuak anga, PA angchhungah hlim leh thlamuang takin min chawlh tir tawh ang.

Chumi hunah chuan, An (kan) mit ata mittui zawng zawng a hrufai ang a; Thihna a awm leh thei tawh lo vang a, Lungngaih te, tah te, nat te pawh A awm leh tawh hek lo vang; Thil hmasate chu a ral ta,” a tih ka hria.
(Thup 21:4)

RILRU HAHTE TANA DAMDAWI ṬHA ṬHENKHATTE

Anin a ngaihsak thin che u avangin in manganna zawng zawng ama chungah nghat vek rawh u. (I Pet 5:7)

I rit phurh chu LALPA chungah nghat la, tichuan anin a tichak ang che; Mi fel chu engtikah mah tiihnghin a phal lo vang. (Sam 55:22)

Mi felte chu an au va, tin, LALPA chuan a lo hria a, An manganna zawng zawngah chuan a chhan chhuak ta a.

LALPA chuan thinlung lungchhiate chu a hnaih thin a, Rilrua inchhir apiangte chu a chhandam thin. (Sam 34:17-18)

An manganna zawng zawngah chuan ani chu amangang ve thin a, vantirhkoih, a hmaa awm mi chuan, anni chu a chhanhim bawk thin a: a hmangaihna leh a khawngiahnain a tlan ta hlawm a; hmasâng ni zawng zawngah chuan anmahni a puain anmahni a pawm thin. (Isaia 63:9)

Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u.

Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang.

Ka nghawngkawl chu a nuam a, ka phur pawh a zang a ni, a ti a. (Matt 11:28-30)

LALPAN HEI HI MIN PHÛT

"Amah nena Lendun"

Engtin nge kan leng dun ang? Tisa in kan hnênah Lalpa chu a awm lova, chuvangin, tisa in kan lengdun thei lovang.  Mahse, thlarauvin kan hnenah a awm avangin thlarauvin nitin leh zantin kan lengdun (inkawm) thei ang.

Tisaa i hmangaih kha i bulah a awm lo pawhin SMS, WhatsApp, FB leh phone call hmangin i be thei a. A call nghakin, a message nghakin hun i lo hmang fo ṭhin ti raw ?

A thu sawite i ngaihtuah zuia, a thu sawite a thlum viau phei chuan mi dang i manawh lo. Nangmah chauhin room ah te, khumah te i awm leh i mut laiin i nui😁😁😁thin ti raw.

Ngatinge i hlim em em ? I hmangaih ber thu sawi kha i thinlungah i ziaka, i chhiar nawn leh ṭhin vang ni ber in a lang.

Chutiang chiah chuan, min hnangaihtu Lalpa hian amah nena LENDUN hi min phut tlat a ni.

ISUA HNENA AWM TAWHTE NUN A DANGLAM ṬHIN

Tin, Petera leh Johana huaizia chu an hmuhin, lehkha thiam lo, mi mawl tak an ni tih an hriatin mak an ti hle a; Isua hnenah an awm tawh tih an hre ta a. (Tirh 4:13)

Khawvel ram bung hrang hrang a Chanchin Ṭha hril tura a tirhchhuahte kha han thlir teh. An hotupa ber chu Sangha mantu Petera a ni a. BA emaw BD emaw a zir lova, a pass lo bawk.

Khawvel thiamna lamah chuan Certificate an nei ṭha lo veka, chhuan tur an nei miah lovang. Ngatinge mi mawl rual, mi hmuhsit ho kha khawvel ram hrang hranga Chanchin Tha hrilhtu tura Lalpan a ruat tlat le ?

Zirna lama degree te, certificate te, BA, MA te, BD leh M. Th te pass mah ila, Thlarau Thianghlim ah kan graduate si lo chuan min hmangtu tur Thlarau Thianghlim chuan min hmang ṭha duh kherlo mai thei a ni.

Petera leh a ṭhiante chungchangah engnge mi'n an sawi ? "Isua hnenah an awm tawh" tih thu an hriaa. Isua Krista zirtirna College ah an GRADUATE tawh tih kha an hre chiang a, an thil tih te kha an tih tur âwm reng an tih ah mi'n an ngai niin a lang.

Keini hi kan nunah mi'n engnge an hmu ang le ? Kan che zia aṭang hian Kristian ṭha tak, Krista ke bula Graduate tawh a nih hi tiin mi'n min sawi thei ang em ?

Kan hmelah Krista chanchin ṭha hi a lang em le ? Kan kaah Krista chanchin ṭha a awm em le ? Kan kut leh ke te Krista chanchin ṭha in a control em le ?

Kan bula miten "ISUA HNENAH A NI HI CHU A AWM TAWH A, Ani chu a piang thar tawh a, a ni chu Thlarau Thianghlim hruaiin a awm tawh a" tiin kan nihna dik tak an sawi thei ang em le ?

Isua zirtirte khan an zir sang lo. Mahse, Thlarau College ah erawh an lo zir sang hle niin a langa, ISUA HNENAH AN ZIR TAWH TIH KHA AN HRE CHIANG EM EM MAI A NI.

Keini ho hi mi'n engtin nge min hriat ang le ? ISUA HNÊNA AWM TAWH TE CHUAN NUN DANGLAM AN NEI ṬHIN.

NU ENTAWN THLAK PI HANI-I

Bible a "Nu" hming lang zinga ka ngaihsan em em mai pakhat chu a duh huna nau hring thei lova, Fapa dila Pathian hnena taima taka ṭawngṭai ṭhintu Pi Hani-i hi a ni.

Lalpan a ṭawngṭaina a pawm saka, Fapa, Samuela a pe a. Hnute hnek a ban ( kum 3 a tling hman ang em?) ve leh Biakin ah a hruaia, a dam chhunga Lalpa rawng bawl turin a fapa chu a petu Lalpa tan a hlan let leh ta a ni.

A hnute hnek ban hun hi Bible ah a lang lova, kum 3 a pum hman tawh ang em  ? Engpawh nise kum 3 vela upa pawh chu lo nise la, Puithiam hna thawk thei tur khawpin engtin nge a Fapa kha Pi Hani-i khan a zirtir ṭhin ang le ?

Nu leh Pate u, i in enlet ang u. Fa engzat nge Lalpan min pek ? Kum engzat chhung nge kan Fate kan enkawl tawh ? Rinna kawngah kan hruai em ? Kan fate Isua krista Rinna ah an awm em ?

Pi Hani-i chuan hnute hnek a ban thleng chauh a fapa Samuela kha a enkawl a, mahse Puithiam hna thawk thlakin a chher chhuak hman tlat mai a ni.

Bible a Hmeichhe hming lang zingah chuan "Nu" hlawhtling ber tiin sawi pawh ni ila kan sawisual kher lovang.

Fapa a pai hma aṭang khan Fapa a hrin chuan a kawng zawh tur a thlan saka, chu mi kawngah chuan a fapa Samuela kha a kaihhruai bawk a. Pathian hnena pek let a tiam ang ngeiin phal takin a pe let leh a ni.

Bible chang chhiar tur :

Chutichuan heti hi a ni a. Hani chuan nau a pai a, tina hun a lo thlen chuan fapa a hring a; "LALPA ka dil a ni," tiin ahmingah Samuela a sa a.

Tichuan Elkana le a chhûngte zawng zawng chu LALPA hnêna an kum tin, inthawina hlan tûr leh a thutiam hlen tûrin an kal cho va.

Hani erawh chu a kal chho ve lo va: a pasal hnênah chuan, "Kei zawng naupangin hnute hnek a ban hma loh chuan ka kal chho ve lo vang e; chu mi hnuah chuan LALPA hmaa a inlan theih nan ka hruai ang a, chutah chuan an awm reng tawh dawn nia," a ti a (I Sam 1:20-22)

Tin, hnute hnek a bantir chuan, chhangphut epha khat leh uain saidawiûm khat kengin sebâwng pathum nena han hruai a, Silo khuaa LALPA inah chuan a kalpui a: naupang chu ala naupang hle a.

Tin, bâwngpa chu an talh a, naupang chu Elia hnênah an hruai a. Tin, ani chuan, "Aw ka pu, i nunna chalin ka sawi e, kei chu e ka pu, he mi hmuna i kianga dinga LALPA hnêna tawngtaitu hmeichhia kha ka ni ngei a.

He naupang dil hian ka tawngtai a ni a; tin, LALPA chuan ka dil chu min pe ta a: chuvangin kei pawhin LALPA hnênah ka hlan a ni: a dam chhûng zawng LALPA tana hlan a ni," a ti a. Tin, chutah chuan LALPA chu a bia a. (I Sam 1:24-28)

AN FAIREL A KANG THEI LO

Elija hmanga a sawi LALPA thu ang khan chhangphut bel chu a ruak chuang lova, sahriak um pawh a kang hek lo. (I Lal 17:16)

Chaw vawikhat ei tur an la nei a, a siamna tur thing a lo fawm lai chu Elijan a va tawnga. An chaw neihchhun chu siam saka, amah ei tir hmasa zawk turin a ngena.

Zarephath hmeithai nu tan chuan he DILNA hi lawm taka chhan a har ngawt ang. An chhungte pawh ni lovin an ei ai ei sak a tum hi mihring mihrinna chuan phal chi a ni hauh lovang.

Mahse, Pathian mi Elija thu sawi chu zâwm in a fapa nena an ei tur chu an mikhualpa a pe ta a.

An ei ai mi dang ei tir ngam, an puar aiin mi dang puar zawk se ti ngamtu, an mahni hlimna leh lawmna tur aia mi dangte hlimna leh lawmna tur zawk duhsaktu he Hmeithai hi a va entawn tlak tak em !

Tichuan, ei tur te Elija a pek zawh chuan an mahni ei tur a siam ta a. Vawikhat chauh ei tur an neih tawh kha mi pathum in an ei pawh in a tuk atan a la awm ta zel mai a. A tuk zingah an ei pawh in, tlai lama ei tur a lo awm leh zel mai a.

An fairel a kang lawk thei ta reng reng lo mai a ni.

Lalpan enge keini ho hi min phut le ? Engnge pe hmasa tura min ti ? Engnge zawn hmasak tura min ngen kha ?

Amah ei tir hmasak aiin keinin ei hmasak kan duh a, amah pek hmasak aiin keinin nei hmasak phawt kan duh ṭhin a. Atana hun hman aiin keimahni tan hun hman hmasak phawt kan tum ṭhin a.

Chuvangin, kan tisa Fairel te, kan thlarau Fairel te hi a kang hma thei bik niin a lang.

He Zarephath hmeithai nu fairel hi kan fairel nen chuan tehkhin rualah ka ngailo. Amaherawhchu, kan Gas te, kan buhfai etc te hi a kang ve lawk ngai lo chang kan tawng ve fovin ka hria.

Chuvangin, Zarephath Hmeithai nu Hriak ûm kang thei lova siamtu Pathian kha tuna kan biak mek Pathian hi a ni a.

Kan fairel te, kan account te, kan gas te, kan chini etc te a kang mai lo na turin kan laka Lalpan a phut chu i pe hmasa ang u.

KHAWIAH NGE I AWM ?

Huaisen takin kan awmna hmun dik tak kan sawi ngam ang em ?

Khawiah nge i awm ? tiin tunah hian Pathian in min rawn zawt thut ta sela, kan awmna hmun dik tak kan sawi ngam ang em ?

He thu i chhiar mek laia i awmna hmun emaw, vawiina i kalna hmun emaw, zanina i lenna hmun emaw te kha huaisen takin Lalpa hmaah i sawi ngam ang em ?

Kan awmna hmun ṭheuh thlir ila, en ila, zir chiang ila, KAN AWMNA HMUN ṬHEUH HI LALPA PAWLNA HMUN ATAN A THIANGHLIM TAWK EM ?

I awmna hmunah khan eng vanga awm nge i nih ? I awmna hmunah khan engnge i tih ? I awmna hmunah khan tuin nge hruai che a ? I awmna hmunah khan i hlim em ?

I awmna hmunah khan Thlarau Thianghlim a zalen em ? I awmna hmun kha Thlamuanna hmun a ni em ? Lungawina hmun a ni em ?

Inremna hmun a ni em ? In hmangaih tawnna hmun a ni em ? In lainat tawnna hmun a ni em ? Thlarau damna hmun a ni em ?

Chhiartu duhtak, tunah khan tisa leh thlarau ah KHAWIAH NGE I AWM  ?

KHAWIAH NGE I KAL DAWN ?

 (Gen 16:8)

Mi kawng kal lai mek te "Khawiah nge i kal dawn ? tiin kan han zawt a, "mi tam tak chuan, khawiah mah" tiin min chhang ṭhin.

"Khawiah mah" tia sawi chungin kan kal zel tho bawk ṭhin si a😂😂😂.

Khawiah nge i kal dawn ? tih zawhna khi "Hagar, Saraii bâwihnu, hnena Lalpa vantirhkoh zawhna a ni a.

Hagari chuan zep lovin, "Ka pi Saraii hnên ata ka tlân bo a ni," tiin a chhanga.

LALPA vântirhkoh chuan a hnênah, "I pi hnênah kîr leh la, a thu thuin awm rawh," a ti a.

Unau duhtak, KHAWIAH NGE NANG I KAL DAWN ? KHAWIA ṬANGIN NGE I LO KAL ?

Lalpa kal sanin setana i pan mek em ni ? Eng kawngah nge i kal mek le ? I kawng zawh mek kha kawng dik a ni em ?

Nitina i kal ṭhin na KAWNG khan vanram a hruai thlen che i ring em ?

Hagari angin, hawh u... Lalpa hnenah i kir leh ang u. Tichuan, mal sawmna tinrengin mal min lo sawm dawn nia.

ȚAWNGȚAI HI THLARAU TAN CHAW ṬHA A NI

Kei zawng rethei leh pachhe tak ka ni a, Nimahsela LALPAN mi ngaihtuah țhin a: Nang chu mi țanpuitu leh mi chhanhimtu i ni a; Aw ka Pathian, rei rial lul suh ang che, (Sam 40:17)

Sum neih loh avanga rethei leh pachhe tak, mahse Thlarau lama hausa si ringtu awhawm tak an awm țhin a.

Sum ngah leh hmelțha, thlarau lama pachhe ngawih ngawih, thlamuanna reng reng nei lova, nun tuihal leh rilțam em ema awm an awm bawk ṭhin.

Eng dinhmunah pawh ding ila, eng ang mi pawh nih ila, a tawpa kan mamawh ber chu #PATHIAN a ni tho tho țhin.

Chuvangin, kan mamawh kan dil te kan hmuh zel thei nan bang lova kan #ȚAWNGȚAI zel a țula, chutianga kan tih phawt chuan kan nun tuihai leh rilṭam in kan awm ngai lovang.

CHHANDAMA KAN AWM SETANAN A HLAU

"Mi dang mah a tidam thin a, mahni a intidam thei si lo. Israel lal a ni alawm tunah hian kraws ata chu lo chhuk ang hmiang, tichuan amah chu kan ring ang.

Pathian a ring alawm, amah hi a duh chuan tunah hian chhandam rawh se; ‘Pathian Fapa ka ni,’ a ti si a," an ti a. (Mt 27:42-43)

Rawngbawlna a țan dawnin kan Lal Isua chu setanan thlaler ah vawithum a thlema, a hneh lova, mahse tlawm mai a tum lova. A enthla zela, a zui zel bawk a.

"Misual te Chhandam in awm rawh se" tia Pathian programme ropui ber chu tihthlawhhlin tir lo dan a ngaihtuah char² a. Mahse, Isuan a ngam zel si.

A la tlawm duh chuang lo. Kalvari tlang thlengin a um zui a, Isua chu an khengbet ta !!! Setana a buai, a rilru a mangang. Kraws lerah kan Lalpa an khaikhan lai khan Isua aiin setanna a buai zawka, a rilru a hah zawk daih a ni.

A chhanchu, Isua a thih chuan, hremhmuna kal tur mipui tamtak in chhandamna an chang dawn si a. Chhandama kan awm tur a ngaihtuah in setanna chuan a tawp nan Bible chang kan tarlan hmang khian Isua a rawn beih leh ta a.

Thlalerah khan Ei tur te, lalna leh khawvel ropuina hmangin a thlem a, a hneh lova. Kraws lerah chuan, damna hmangin Isua a beih a.

"'Mahni pawh in tidam thei si lo" i van nep em em ve, lal i ni a, chhandamtu i nih chuan , Pathian Fapa i nih tak tak te chuan i thiltihtheih ziah hmang la, tunah khan kraws ler ațangin lo chhuk ta che.

I lo chhuk chuan kan ring dawn che a lawm. A rin Pathian chuan rawn chhandam sela, tichuan kan ring ang chu !!! tiin a beih ta chiam² mai a.

Mahse, Lalpa Isuan setana țawngkam  te, a thlemna  te, a tihel na te a ngaihsak lova, chhan pawh a chhang lo. Chhang ta se, lo chhuk ta se, intidam sela, NANG LEH KEI  HIAN VANRAM KAN THLENG PHA DAWN SI LOVA.

Amah kan rinna, Vanram kan kai theih nan a ni, Lalpan kamkhat pawhin a chhan tak loh ni. Kan dam nan a ka a chip a, kan dam nan a Pathuan nihna a kalsan a.

He tiang em em a min hmangaihtu hi kan hmangaih let ve dawn lawm ni. Vawiin, CHHANDAMNA A NI. Hlimin i lawm ang u, kan chhandamtu fakin zai i vawr ang u khai.

Lalpan mal sawm che rawh se.

TU NGE I DRIVER ?

He Pathian hi kumkhaw tlaitluana kan Pathian a ni dawn si a: Thih thleng pawha min hruaitu a ni ang. (Sam 48:14)

Khawvel motor driver ni lovin I NUNNA DRIVER kha tunge tih hi unau duhtak zanin hian ka zawt duh a che.

I pian aṭang khan tuin nge I NUN kha khalh a, tuin nge hruai ṭhin che ? Khawiah nge i DRIVER chuan a kal pui ṭhin che ?

Driver pahnih an awm a. Pakhat chu Thlarau Thianghlim a ni a, adang chu Thlarau sual a ni. Thlarau Thianghlim chuan Pathian Fate Nun a khalh ngil sak ṭhina. Thlamuanna leh rinawmna kawngah chuan a kal pui ṭhin.

Thlarau sual chuan khawvel leh a chhunga awmte thlahlelh a hmangaihtute NUN a khalh ṭhina. Engkim leng vek, engkim thiang vekna kawngpui (highway) ah chuan an NUNNA chu a kalpui ṭhin.

Unau duhtak, zanin hian tunge i NUNNA DRIVER ? Driver i thlan sual chuan i duhthlanna ngei chuan thihna ah a hruai lut ang che.

Driver i thlan thiam erawh chuan Thih thleng pawh in Vanram panna lamlianah chuan a kal pui che anga, a tawpah Thlarau chawlhna ram, Mithianghlimte lenna Khawpui ah chuan i Thlarau kha a khalh lut dawn a ni.

Chuvangin, DRIVER thlang uluk la, Nunna Kawnga kalpui ngei tur che Driver ṭha ber, Thlarau Thianghlim chu i damchhunga i NUNNA DRIVER atan lo ruai ang che.

LALPA ṬIH CHU SUAL HUAT

Lalpa ṭihtu chu mi rinawm a ni. Mi rinawm chuan sual kalsan harsa a ti ngai lo. Thlemna tawk fo ṭhin mahse a hmangaihtu Lalpan tan rinawm takin a awm ṭhin.

Kan tisa chakna leh duhzawng ang zelin thlemna kan tawng ṭhin. Zu in mi chu zu in turin a thlema, mi lerh chu lerhna in a thlema, mi hurh chu hurhna in a thlem a. Sex hmang sual fo ṭhinte chu Sex hman chakna in a thlem ṭhin a.

Eiru ṭhin chu eiru leh tur in a thlem a. Dawt sawi hrat te chu dawt sawi ṭhin turin a thlem ṭhin. Mi bumhmangte chu mi dang bum leh turin a thlem ṭhin.

Zu ka in ngai lova, zu in turin setanan min thlem ve ngailo. Zuk leh hmuam ka ti ve lova, tih chakna pawh ka nei lo. Ka tisa hian a mamawh lo bawka. Chuvangin, setanan ti ve turin min thlem ngai lo.

Min thlemna hmanrua te hi kan tisa chakna an ni ṭhin a. Tisa chakna chuan Pathian a dova, tisa chakna chuan Thlarau Thianghlim a do ṭhin.

Pathian dotu kan Tisa chakna te hi eng chen nge kan la hum tlat dawn ? Thlarau Thianghlim dodaltu tisa chaknate hi engtikah nge kan vuiliam ang ?

Tisa thil chu tisa miten an duh a, Thlarau thil chu Thlarau miten an duh ṭhin.

Tisa thil huat hi Pathian thawhpuina a ni a, tisa thil fak mawi erawh Pathian pawi sawina a ni.

Lalpa kan ṭih chuan sual kan haw tur a ni a. Kan fakmawi ve tur a ni lo. Sual kan huat lo chuan kan duhve tihna a ni a. Kan duh ve chuan Pathian kan DO tihna a ni.

Chuvangin, hawh u... Lalpa fak leh chawimawi nan sual tinreng i hua ang u. Chu chu Lalpa lawm zawng a ni si a.

THLEMNA

Pathian ringtuten thlemna an tawk ṭhin. Engvangin nge ? An rin Pathian dan bawhchhe turin leh setana thu zawm zawk turin.

Setana chuan a thu hnuaia a dah te chu an duh dan dana sual tinreng khawiha sual a phal saka, thilṭha an tih erawh a phallo thung.

Vanram kawng zawha kal mekte chu an tumram an thlen hma ngeia hruai bo/pen tumin an tisa chak zawngte leh an panna lai takte hmangin setanan a thlem ṭhin.

Setana thlemna chu engtin nge kan HNEH ang ?

Isua kha vawithum setanan a thlem a, Bible chang hmangin Isuan a chhanga, a hneh a ni. Setana thlemna Hnehna Damdawi leh ralthuam ṭhaber chu Pathian thu hi a ni.

Chuvangin, Bible chhiar tam ang u. Bible kan chhiar tam chuan kan hre tam anga, kan hriat tam chuan kan Nun a hrisel anga, kan Nun a hrisel chuan setana thlemna mai maite chu awlsam takin kan hneh thei dawn a ni.

Sam 119:11 hi chhiar ila, sual hnehna ralthuam ṭhaber kan hre thei ang.

Ka thinlungah Bible chang a awm/riak ṭhin avang hian setana thlemna chu awlsam tein ka hneh leh ṭhin.

Ka tlangval lai khan "Tuai" te min ti fo ṭhin. Ka haw lem lo. A chhanchu min teh dan a dik lova. Setana tehna ah chuan TUAI ka lo ni ṭhin.

Mahse, Lalpa ka ṭih avangin mi tih theih te kha ka ti ve thei ngailo a ni.

Lalpa Ṭihna thinlung i nei chuan engang a chance ṭha pawh nei la, sual ah i tluk ka ringlo.

A chhan chu, Mi rinawmte tan HNEHNA THU TIAMSA a ni.

LALPAN THINLUNG A EN ṬHIN

Nimahsela LALPA chuan Samuela hnênah, "A hmêl lam emwa, a san lam emaw en suh; ani hi chu ka duh lo a ni; LALPA hchuan mihring en dan angin a en ve si lo va; mihring hchuan pawn lam lan dan an en thin a, LALPA erawh chuan thinlung lam a en zawk thin a ni," a ti a. (I Sam 16:7)

Samuela chuan pawn lam lan dan angin, an hmel leh an fugure etc aṭangin a lo en/teh a. Hei ngei hi a ni tawh ang Lalpa thlan chu tiin hriak thih mai kha a lo tum a.

Mahse, Lalpan a khapa. Mihring en leh teh dan angin Lalpan a en lova, a teh lo. Lalpa chuan thinlung chhungril lam a en zawka.

A tana mi rinawmte leh mi felte chu a rawngbawltu atan a duh in a thlang ṭhin.

Han thlir vang vang la, Lalpan tlinga a puan rawngbawltu tam takte hi mihring tehna ah chuan an tling kher lovang. Pawn lam kan dan a ṭang chuan tla sa (disqualified) vek an ni ngei ang.

Mahse, thinlung tehtu chuan a teh tlinga. A thuhretu rinawm atan TLING ah a puang ta a ni.

Thinlung en ṭhintu Lalpa chuan pawn lam lan mawina aiin thinlung chhungril a rinawmna a duh zawk tih hria in "kan THINLUNG atan chauh" tiin i hlan ang u.

KA LAMA ṬANG LO CHU MI DO A NI - ISUA

Thlarau ah hian roreltu pahnih an awma, Pakhat chu Pathian a ni a, a dang chu setana a ni. An pahnih hian thlarau an ni a, an hnathawh dan pawh thlarau ah a ni.

Pathian Thlarau chu Thlarau Thianghlim a ni a. Chu chuan Pathian fate chu kawng dikah a hruai ṭhin a. An awmna leh an kalna hmun apiangah ISUA KRISTA thuhretu rinawm tak ni zel turin ringtute chu a ṭanpui ṭhin.

Krista kan ṭan chuan setana kan do tihna a ni a. Krista kan fak chuan setana kan dovin kan dem char char tihna a ni bawk ang.

Krista do tu chuan setana a ti lawm ṭhin. Krista nekcheptu chuan setana a thawhpui tihna a ni. Krista tana nung lova mahni tana nungtu chuan Krista tan sengkhawm hna a thawk lova, a tidarhtu ah a ṭang zawk tihna a ni ang.

Unau duh tak, tu lamah nge i ṭan ? Tu tan nge i Nun ? Tu tan nge i thawk ?

Isua lamah nge setana lamah i ṭan ? Sengkhawmtu nge tidarhtu i nih ?

KA KALSAN LO VANG CHE U - ISUA

Nu leh pate kara seilian lo, sual avanga nu leh pate hmun khata an awm dun theih loh avanga fahrah te leh nu leh pate, an nun a tawi avanga fahrah ta te tam tak kan groupah hian an awm niin ka hriaa.

In țhiante in awt ngawih ngawih changte, Ka Nu, Ka Pa tia in nu leh in pate in ko thei lo changtea in rilru awm dan turte ka ngaihtuah țhina, a ruka in mittui a hnam changte, a ruka in țah fo changte a tam ngawt ang.

Chutiang bawk chuan Pa tel lova fate enkawltu NU (nuthlawi/hmeithai) zahawm tak tak te, Nu ber tel lova fate enkawltu PA (pathlawi)  zahawm tak tak te pawh in awm niin ka hriaa.

Fahrah bik riauva in ngaih chang te, chanhai bik riauva in hriat changte, riangvai bik ta riaua i hmuh changte pawh i lo neih țhin mai thei e.

Mahse, hei hi in hriat ka duh. I pa aia hmamgaih zawktu che, i nu aia hmangaih zawktu che, i chhungte aia hmangaih zawktu che mi PAKHAT a awm tih hi.

Lalpa ngei chuan ti hian a sawi a. "Fahrahin ka kal san lovang che u" tiin.

Chuvangin, Pathian ngaih ah chuan i FAHRAH lo tih unau, i hriat ka duh a ni.

Unaute u, taksa thilah fahrah nih mahla,  Lalpa Isua innei phawt chuan thlarau lamah Fahrah i ni lova, Pathian fapa, fanu i ni.

Tisa lama nu leh pa nei, thlarau lama PA neilo tam tak ai chuan in awhawm zawk daih a ni a aw. Lal Isua neilotute hi an nia fahrah diktak te chu.

Isua ringtu leh chatuan nunna neitu te chu Van Pathianin a chawm țhina, an mamawh a pe țhina, a enkawl țhina, an tan ruahmana fel tak a siam sak țhin.

Lalpan fahrahte a kal san dawn lo. A hmangaiha, an hnenah a in lar țhin. I nun a fahrah chuan Isua pan la, a fa takah a lo siam dawn che nia.

KRAWS AH I KIR LEH ANG U

"Hawh u, Gilgal-ah i kal ang u khai, chutah chuan ram chu i din thar leh ang u," (I Sam 11:14)

Israel fate chu ral do turin an chhuaka, an hmelma te an hneh hnu in Gilgal ah kir leh in, tah chuan chakna pe ṭhintu Lalpa hming chu an lam ṭhin a. An hmelma te bei dan turte an rel leh ṭhin.

Vawiin ah hian keini tan chuan Gilgal chu Krista Kraws hi a ni e ti ila kan sawisual awm love.

Kraws ah chuan thiltihtheihna a awm tih kan hriaa. Taksa dan damna a awma, Thlarau tan Chatuan thlenga Nunna a awm bawk a ni.

Tah chuan Chhungkaw tan hriselna leh damna a awm a. Tah chuan Ram leh Hnam damna a awm bawk a ni.

Kan ram leh hnam, kan chhungkua leh mimal dam nan hawh u, Kraws ah kir leh in , chutah chuan i in din thar (siamthar) leh ang u.

PATHIAN RORELNA DIK LO THLENG RAWH SE -

Rev. L. H. Rawsea

Isua Krista rawngbawlna apiangah mipui tam tak an pungkhawm thin a. A chang
chuan chaw eina hun leh Pathian pawlna hun tha, fianriala tak ngial pawh a nei thei lo hialkhawpin mipuiin an chiam buai thin. Mipui zinga tam ber chu mamawh nei an ni.

Taksa lehthlarauva amah mamawhtu tak tak te an ni a. Chuti chiam chiama mipuiin kan Lalparawngbawlna an bawhna chhan hi ennge ni? Kan sermon duh ber kan sawi ang a. Kan ngaih pawimawh ber i lo hrilh ngei ang ti raw?

Kan Lalpa pawhin chutiang chuan a lo ti a ni.Pathian ram din turin a lo kal a, Amahah Pathian ram a thlen tak avangin Pathian ram
thuchah a puang thin.

A rawngbawl chhung zawnga a thuchah ki pui ber chu Pathian Ram chanchin thua ni. Lalpa thuchah laimu leh pawimawh a ni. A thuah chiang mah ila, a tak taka hman huna lo thlenin kan chiang tawk lo thin. “I ram lo thleng rawh se,” tih thu hi thupui lar tak anga lang; mahse kan chian loh tlan tak thupui niin ka hria.

Mizo Kristiante zinga a chian loh dan kawng thumin han sawi ila:

a) Lei pian lam ram, thih hnua kan chenna tur ni tlatin kan hria a. Vanram tih nenkan ngaih fin thin. Pathian ram kan tih hi Vanram khi a ni lo. Pathian ram tia Isua a zirtir thinhi he khawvel kan dam chhung ngei a kan chan theih leh kan chanvo a ni. Chutih rual chuanPathian ram hi tawp chin nei lo a nih hre reng ila.

b) Pathian ram chuan ramri a nei ve lo. Khawvel lalram chuan ram ri a nei zel thin.Pathian ram chu khawiah pawh Isua Krista lalberna a channa apiangah Pathian ram a dingthin. Pathian ram chu chi tin hnam tin tan a ni a. Khawii hmunah pawh a ding thei.

c) Pathian ram hi Kohhran a ni lo. Kohhran pawh Pathian ram a ni chuang lo.Nimahsela, Pathian ram dinna apiangah Kohhran a ding zel a, Kohhran chu Pathian ramthuchah kengtu leh Pathian ram zauna tura Pathian hmanrua a ni.

Pathian ram awmzia leh Pathian ram dinna tura kan hriat tur thil pawimawh :

1. Isua Krista Lalna Hmun Apiangah Pathian Ram Ding Thin
Pathian ram chu engnge ni? Isua Krista lalna, rorelna leh thuneihna a ni. Pathianramah thuneihna tawp neiin ro a rel thin. A thu ang zela engkim kal a ni. Mimal chhungkualeh ram an kalna hi Pathian ram chu a ni. Pathian lalna hmuna lo chuan a ram a ding ngai lo.

Lal ram reng rengah lal an awm ziah. Lal awm lovin lalram a ding thei lo. Pathian rama lalchu Isua Krista a ni. Pathian ramah Pathian a thu ber a, a thuneihna nek chep emaw, chopha emaw a awm thei lo.

“Pathian rorelna anga engkim a kalna,” tih hian a huap zau khawp mai. Kristianchhungkua kan tih fo te, khawtlang nun siamthat kan tih te, political education kan tih te,campaign, camping kan tih te hi a ngai lo tur. Envangin nge chhungkuain Pathian kan biak
ho theih loh kan tih chuan, kan chhungkuaah kan biak ho tur ‘Pathian’ a awm lo a ni mai.

Khawtlang siamthat ngai khawpin engvangin nge kan awm tak? Politics-ah pawh hian,“Pathian, Pathian” an han ti ve bawk naa Pathian rorelna dik taka awm a tul hunah erawhchuan lal dang rorelna a lo lang leh mai thin. Mi tam tak thinlungah, chhungkuaah khawvel alal tlat a, Krista lalram dinin a awm thei lo a nih hi! Isua Krista hi chuan lalberna chan a duh.

A thuneihna pum hmawm a duh. Chanpui a duh ve lo. Lalber a nih lo chuan lal loh law lawa duh zawk a ni.

2. Sual Leh Ramhuai A Che Nasa
Pathian ram dinna apiangah sual leh ramhuai a tlawm thin. He khawvel hi Pathianina duh taka a siam ni mahse, bawhchhiatna avangin sual a inluling a, ramhuai an ngampa hle.

Chu chu Krista’n hneh a, lak let a, Pathian ram din a duh a ni. Kan Lalpa hun lai khan ramhuai man leh tih retheih an tam hle thin. An kaw chhung atanga a hnawh
chhuah sak pawh an tam mai. Kan Lalpa rawngbawlnaa thiltihmak tak tak kharamhuai hnawhchhuak a ni.

Engvangin nge Isua’n thilmak a tih thin. Thlalerathlemna tawh tum kha chuan thilmak a ti duh hauh lo. Lung chhanga chantir turathlemna a hnial fithla a, biak in chhip zum atang tlak thlak a, Vantirhkohte kutaan lo dawma him lel mai a duh lo.

Engvangin a rawngbawlna thilmak tam tak atih si? Isua hian mahni in show nan thilmak a ti ngai lo. Mipui hip nana thilmak
ti a ni hek lo. A thiltihtheihzia entir tum lah a ni hek lo maia ti a ni hek lo. Pathianram a lo thleng ta tih chhinchhiahna a ni.

Rawngbawlpui duh takte u, in chhungkuaah ngei pawh khan Setanalalram hi a ding reng a ni lo maw? Lalram mawina hmuh tur a van awm lo em!

Sual hian nun luhchilh nasa hle. Kan khawi ngampa hle bawk a. Hmun ka penasa hle mai a. Mahse, Lalpa lalna hmunah chuan sual leh ramhuai an tlawm a,Lalram a ding a ni. Setana ram thiat a, Lalram thar dinin ram i la ang u.

3. Simna Dik Tak Kan Thleng Pha LoSimna dik taka sual simna hmunah Pathian ram a ding. Kan Lalparawngbawlna hmasaa a thuah kha kan hriat tawh kha. Pathian ram lo thlen thua tlangaupui a, Pathian rama lut turin a sawm a.

Ti tura a tuk erawhchu, “Simula, Chanchin Tha ring rawh u,” a ti. Pathian ram a lo thleng ta, lut turin inpeihila, i sim ang u hmiang. Kan ram hian sim a mamawh a niang a. Kan chhungkuateuh hian sim kan mamawh a niang a. Pathian rama lut lo, him lo, mualpho kantam thin hi. Sual zak kep chung leh sual nena inhne reng chung chuan Pathianram mi nih a thiang lo.Simna thu hi miten an sawi fo thin. Thu tha tak a nih pawh kan hria.

Mahse, sim chuang si lova ngaithla liam kan tam thin avangin simna hnu hma a
lang thei lo. Sim hi kan ngaih ang ngawt thil awlai a ni lo a niang. Thinlung thlaktihna a ni. Sual hliam tawrh vanga lungngaihna hi sim a ni lo. Sual huat a, sual
tihduhdahna leh tih chakna atanga tihduh tawh lohna lama rilru thlak thleng a ni.

Sual vanga kan lungngaihna hi simna a ni lo. Kan chin dan tha lo ban sanpawh a la tawk lova. Nun nei tura Lalpa hnena kir leh a tul thin a ni. Krista chukan thinlunga lal atan kan thlang thar leh thei ang em?

Kan chhungkua theuhvahkhan Krista lalzia kan puang thar leh thei em? Kristan lalna leh thuneihna pumhluma channa hmun apiangah Pathian ram a ding a, Setana ram thiahin a awm nghala ni. Pathian ram a lo thleng mek si.

Simin, Lalpa hnenah i kir ang u. Amen.

Cp from Ramhlun Venglai KṬP chanchinbu.

HMEL MAWINA RENG RENG A (ka) NEI LO

He thu i chhiar laiin Isua ni lovin nangmah zawk in en la, Isua chanchin ni lovin i chanchin leh i nihna zawk a ni tih hriain thinlung zawng² a i lo chhiar ka ngen a che.

Kan thu sawi tuin nge ring? LALPA kut chu tu hnênah nge a lan?

A hmaah chuan huan thil tiak no tak angin ani chu a chawr chhuak si a, lei ro atanga zung angin a puak chhuak bawk a ni: piahmang thatna leh hmêl mawina rêng rêng a nei lo va; amah ka hmuhin amah kan duhna tûrin mawina rêng rêng a awm lo.

Ani chu mihringte hmusit leh duh lohvin a awm a; lungngaihante nei mi leh natna hre mi â ni a: miten an hmai an huhsan ang chuan ani chu hmusitin a awm a, keini lah chuan ani chu kan ngaisâng si lo.

Ani chuan kan natnate phurin, kan lungngaihnat epah a phur ngei a: nimahsela keini chuan lungngaihna tlakbuakah, Pathian vuakah, tihretheihah kan ngai si a.

Nimahsela ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a:kan thlamuanna tûr thununna chu a chungah a tla a; a vuakna vualtea tihdamin kan awm ta.

Kan za hian berâm angin kan vâk bo va; mahni kawng kawngah kan peng theuh va; Lalpa chuan ani chuungah chuan kan za khawlohna chu a nghat ta a.

Isai 53:1-6

PATHIAN HI KAN RING TAK TAK EM? X-RAY NEI LAWK ANG AW

"Pathian chu min ṭanpuitu hnai ber a ni. Emgkim tithei, min enkawltu a ni.." han tih mai chuan tumai pawh hian kan Amen vek a, kan pawm em em ṭhin a, mahse a taka kan chunga beidawnna a lo thlen hian kan Amen dual dual a kha kan ring ngam leh tawh si lo va, kan nunah hlauhthawnna in kan khat leh ṭhin a ni.

Pathian hi engkim tithei, min ṭanpuitu a ni tih hi ring tak tak ila kan hringnunah hian beidawnna leh hlauhna te hi a awm ang em le? Awm hauh lovang le..! Ka maia Amen na hi chuan kan nun chhungrila thlamuanna a lo pe thei tak tak ṭhin lo a ni. Nun taka Amen petute tan erawh khawvela nun pawh an tan lawmna leh lungawina hlir a lo ni ṭhin.

Kan Bible ah Pathianin hlau suh u, mangang suh u tiin min thlamuan char char na kan hria a, mahse kan ring tak tak ngam si lo hi kan buaina ber chu a ni. Kan Pathian thiltihtheihna te hi han ngaihtuah chiang ve teh, Israel mipui sang tam tak pawh ama chawm vek a sin. Ram tuktin par ṭhatzia te hi han thlir ve teh u, chungleng sava te khi ama chawm vek leh cheimawi vek an ni a tih kha. Israel sang tam tak pawh rilṭama dah ngai lo tu khan nang leh i chhungte lek chu a enkawl thei viau dawn lo em ni? Tinge i beidawna i mangan fo mai le?

I beidawnna leh i manganna te khan i tan eng thilṭha chiah nge a chhuah pui le? Hlim lo taka hun hmanna, hlim lo taka hun i hman chuan i taksa in a tuar ang a, i thlarau nun thleng a ti chau vek thei a ni. Tichuan inhauhna tur awm miahlo chhungkaw buaina te a lo chhuak mai ṭhin. Isuan "Keimah lo in engmah in ti thei lo.." min ti a. A ti theitu hnenah thlen mai zawk ila, amahah innghat mai zawk ila a va ṭha dawn em..! Jeremia ziakah khan "mi au la, ka chhang ang che.." a ti a nih kha. Kan "ka" in Amen ṭhin mah ila, a taka kan pawm siloh chuan enge awmzia le?

Kan mangan lai hian min au rawh ti tu hi kan au ve mai dawn lo em ni? Pathianin a ti leh vek mai ang, lungngai duh suh ti theitu nun a va pawimawh em..! Chutiang tur chuan kan Pathian chakzia leh nihna kan hriatfiah a ngai bawk si. Sam ziaktu chuan lei leh a chhunga awm zawng zawngte hi Lalpa ta leh a siam a nih thu a lo sawi tawh a, chung aṭanga kan han ngaihtuah chet chet chuan Pathian hi rin loh chi a ni lo. Hahdam taka amah rin mai chi a lo ni zawk.

Mahse vawiin ni thleng hian ring ngam lo kan awm tam zawk a. Engvang ber nge ni ta ang le? Nangmah lo inzawt la, Pathian hi engvanga ring lo nge i nih le? I ka chuan awlsam takin ka ring a lawm i ti maithei, mahse harsatna a lo thlen veleh engvanga hlauva mangang ṭhin nge i nih le? Pathian i ring tawk lo tihna a ni thei ang em? Pathian hian engmah a ti thei tak tak lo kan tihna a ni thei ang em? Lo inzawt rawh le.

=========================

KAN PIANGTHAR IN TIH VE DAN HI A VA RIN DUAP EM..!

Tunhma kha chuan piangthar nih hi an zak a, a thar lo chuan thar lo tiin an inchhal ngam mai ṭhin a. Tun hunah ve thung chuan miin piangthar lo min ti ang tih hlauh vang ringawtin ka piangthar kan inti a, thar tak tak si lovin, thar awmin kan awm ve tawp a. Isua chhandamna pawh hrefiah chuang lovin, mahni leh mahni inbumna a ni va ni tak em..!

Tam zawk chuan "Aw Lalpa ka inhlan e.." kan tih avang hian piangthar emaw kan inti ringawt zel a, an fel tumna in an tlinloh a, a lo daisual palh veleh ka piangthar lo chu ka inti miah lo, ka thar tho nachungin tunlai ka awmdan ang anih chuan vanram ka kai pawh ka ring lo kan ti a, fel ve thawkhata kan inngaih chang chauhvin vanram kai kan inring ni awm tak a ni. A pawi khawp mai. Piangthar kan hriat dan a mak tawh lutuk hi.

Kan rama piangthar nia inchhal tam tak fel loh/ dai sual palh changa vanram kai inring lo te hi zawhna han zawt chiang ila, Isua hi a thi a, a tho leh, lal leh chhandamtu a ni tih chu kan ring vek. Kan pawm vek mahse tinge lal leh chhandamtu anih tih hrereng chung pawha meidil tlak hlauhna kan neih ṭhin le? Pathianin tuna ka awm ang tak hi chuan min pawm lovang tia hlauhna kan neih fo le? Kan ring kan tih Krista thisenin thil a tih theih zia kan la hriatchian loh vang a ni.

Miin tharlo min ti ang tih hlauh vang ngawtin kan insawi thar a, Isua thisen hnathawh ropuizia pawh hrefiah lovin, piangthar lo kan nihna kan inpawm duhlo hi kan tih sual lian ber pakhat chu a ni.

Krista thisen hi engvanga Pa hnena pek kher a ngaih chhan pawh kan hre lo va, engvanga dil nge a nih pawh kan hre hek lo. Piangthara inchhalte han inzawt ta ila, hre lo tam tak kan la awm zui. Engtinnge ringlotu te, ringtu ah kan lak luh theih ang? Mahnia fiah loh Pathian thu midang hnena kan sawi chuan kan mualpho ngei ang le..!

Isua thisen hlan a ṭul kherna chu Pathianin min dil vang a ni. Engvangin? Kan sual zawng zawng ngaihdamna turin a ni. Isua thisen a hmuh meuh chuan kan bawhchhiatna zawng zawng leh kan sualna zawng zawng chu a ngaidam ta a nih kha.

Chatuan atan kan tan ngaihdamna a siam tih kan hriat loh avang hian a lawm piangthara inchhal tam takin kan felloh/ daisual palha vanram kai lo turah kan indah hmiah ṭhin ni. Pathian kan chungah a thinur a, min ngaihdam loh kan rin avangin. Ngaihdama kan awmna turin Kristan ama thisen ngei Pa hnenah a lo hlan daih tawh kha kan tan a ni lo emaw kan ti ṭhin. Kan theihnghilh ṭhin a. Ṭhenkhatin kan hrelo bawk.

Vanram neitu in thiam min chantir tawhna leh kan inrem tawhna hre lovin a hmelma kan ni emaw kan ti a, hmelma hlauhin kan hlau a nih kha. A malsawmna i dawn zozai te kha han chhut teh. Hmelma te tunge malsawmna vur ngai? Pathian mah nise   hmelma chu malsawm a hnekin anchhia a lawh a nih kha. A hmelma chu i ni lo phawt mai. Piangthara inchhal, Krista hnathawh ropuizia hrelo kan tam. Hla thu chuan thisenah thiltihtheihna a awm a lo tih kha maw..kan sa ve ṭhin tho va, mahse a awmzia kan hre ṭhin lo a ni. Kan ngaihtuah peihlo bawk nen.

Pathian thuah hriatna kan tlakchham lutuk chuan boralna min thlen mai ang. Piangthar kan intih ve dan hi Pathianin a pawm ang em? Ama fapa thisenin a lung a tih awi nasat zia pawh hrelo piangthara inchhal te hi Pathianin a pawm dawn em ni?

Piangthar kan intih dan hi a duap lutuk. Nundan inthlak danglam a ni lo. A thu ah zawk a ni piantharna dik chu a awm ni. Thar lo chuan thar lo tih ngam hi a ṭha. Pathian thlarau tan kawng kan hawng zau zawk ang. Muhil der hi kaihthawh an har a nia. I infiah ang u.

=========================

THANGKAMTU THANG ATA KAN CHHUAK TA

"Thangkamtu thang ata sava a chhuak angin kan nunna hi a chhuak ta; Thang chu a chhe ta a, keini kan chhuak ta hlauh a ni.." (Sam 124:6-7).

Thangkamtu Setana thang kamah chuan min thlahtute chu man an lo ni a, chutichuan an chi leh kuangte zawng zawng chu Setana thanga tang vekte dinhmunin kan lo piang a. Tang miin a mahin a in chhanchhuak thei ngai lo va, chhanchhuaktu a mamawh a ni.

Chutiang bawkin keini Setana thanga tangte pawh hi chhanchhuaktu kan mamawh a ni. Judge in Thisen thianghlim min pek chauhvin saltang ho hi ka chhuah zalen ang a lo ti a ni. Chutichuan saltang te khultu tur chuan Judge lungawina tur thisen chu a rawn keng a, Judge awmna ah ngei chuan a rawn pe ta a ni. Judge in a lo sawi tawh ang ngeiin "Thisen min pek chuan ka chhuah zalen ang.." a lo tih chu thisen a hmuh chiah chuan Setana thanga tang ho zawng zawng chu a chhuah zalen ta a ni.

Judge hian saltang ho hi a man let thei tawh lo reng reng. Engvangin? A thutiam chu a bawhchhe theilo a ni. Saltangte rawn khultu chu Krista thisen chu kum khat atan lek a ni lo va, chatuan atana zalenna tur a ni. Chuvangin Judge Pathian pawhin saltang ho chu a man let thei tawh lo. Chatuan atan zalenna a pe hmak a ni.

Court ah chuan saltang nang leh kei atan thisen pek tawh anih avangin tanin Setana kut ata chu chhuah zalen tawh te kan ni. Setana hian min man let thei tawh lo. Kan chungah thuneihna a nei tawh lo. Tunah hian a mei chauh a ni tal kual vel mai mai chu. Mi bum tumin, i la zalen lo, Kristan a thisenin tanin ata a la khul lo che. Ka kutah i awm tiin a bum kual vel mai mai a ni. Chu chu mi tamtakin kan awih fo ṭhin a, la tang emaw kan inti ṭhin.

Aw le, Kristan a thisenin Setana kut ata a lei chhuak tawh che a, a khul chhuak tawh che a ni. I chungah Setanan thuneihna pakhatmah a nei tawh lo. Bum che bak tih theih a nei lo. A mei chauh a che thei tawh a, a lu chu tih sawm vek a ni tawh. Setana chuan Kristan a thisena a khul chhuah tawh i nihna hi a hriat a hlau ber a ni. Bum che tumin a mei hnawrin a hawl kual vel mai mai che a nih kha.

Mahse vawiinah hian thangkamtu ata sava a chhuah angin kan nunna hi Setana kut ata Krista thisen avangin a chhuak tawh tih i hria ang u. A mei hmawr bak a che thei tawh lo kan tih kha. Lo rapbet hmiah ang che. Krista thisen chu a rintlak em em a ni.

Setana thang chu tihchhiatin a awm vek tawh a, heng thutak ama thang ata kan chhuah tawhna hi kan hriat a hlauh avangin min bum kual mai mai a ni. Krista thisen zara Setana kut ata chhuah zalen tawh kan nihna hi sawi pung tulh tulh ila, tichuan Setana chu hnehin a awm zel ang. Setana thang ata min tlan chhuaktu kan Lalpa Isua Krista chu fakin awm rawh se.

=========================

KIR AN RÊL LO

Lalpa tan kan rinawm ve em? tih hi inzawt ta țheuh ila, rinawmna hrim hrim pawh Bible-ah a kûr ngeinguai a, kha lam kha chu chipchiarin sawi ka tum lutuk lemlo a, a rawngbawlna kawngah hian chauh chang nite chu kan nei vek ngei ang, nimahse chûng hunah chuan huaisen taka kan kan thlan tur diktak kan thlan thiam a țul țhin a ni..

Kan beisei van kanaan ram chu rinnain kan thlirna zawnah kan dingnghet em? Nge, kan Hawikir leh țhin? inzawt leh ta ila, Pu T. Romama hla phuah chuan," Ringtu hawikirte hmuh châng ni hianin, Chu ram chu ngaih a zual leh țhin e; hawikirte hmêl awm tawhlohna ram chu, Thlarau khawvel a nî, a êng reng e," a ti a. Amah Pu T. Romama ngei pawh hian hawikir țhin te avang hian vanram chu a ngai vawng vawng hial zawk zu nia. Chu hmunah chuan phatsantu an awmtawh dawn tlatlo a tinni.

Thuthlung hlui lam kan en chuan Israel fate Aigupta ram ațangin a hruai chhuaka kawng lakah an hel tlata an borala, ramtiam kanaan thleng phalo hnung tawlh a, Pathian thu awih duhlo tam tak kan hmu a, Numbers 16:32-33-ah khan thu awihlo hremna alo langa, Kora te, Dathana leh Abirama te chhungkua chu thawklehkhatah lei chuan a kâ a ânga, a lo khichat a seol-ah chuan an liam thla ta duak a, mi 250- lai an ni a, a rapthlak hle. Number:1-chhoah khan chhiarpui(census) hmasa neih a ni a, Levia chite tello paw'n nuairuk an ni a, Pathian thu an awih leh tak loh avangin thlalerah a tiboral ta a, chhiarpui vawihnihna an neih leh chuan, chhiarpui hmasa a mi kum 20-chin chu tumah an awm tawhlo a, thlalerah khan nuai têl fe an thi tihna a ni a, a rapthlak hle,,

Lota te chhungkua pawh vantirhkoh in," I nunna turin tlân chhuak rawh! I hnunglam hawi suh la,"(Gen 19:17) an ti a, a nupui chu hnun lamah a hawi kir a chi khâwnah alo chang ta a nih kha. Hei tak mai hi Thuthlung Thar lamah ISUA'N," Lota nupui hre reng rawh u," (Lk 17:32) a lo ti ve leh bawk a ni.. Ka sawi tum tak phawk chhuak turin khitiang khi sawi a țula ka'n ti ta duah a nia..

Thuthlung hlui lama mi ropui tak takte, rinawm leh fel taka awm hote kha hetah Hebrai ziakah rinna kawnga mi fak hlawhte zingah an tel ta hlawm a, harsatna tam tak karah rinna in ke an pêna, " Thil tiamte chu chang lovin; nimahsela, chûng chu hla tak atanga hmuin chibai an lo bûk tawh tawh a, leiah mikhual leh khualzin mai an ni tih an inhriattir tawh bawk a,"(Heb 11:13) . He lai thu hi a ropui ka tiin ka sawi ning thei mawlhlo a ni..

A sawi zela," An chhuahna ram chu lungkham sela chu hâwnna remchâng an hmu tawh ngei tur a ni," a ti a ni. Duh nise khawvela hawi kir lehna chance an ngah ve khawp ang le, mahse, hla tak ațangin Chibai anlo bûk tawh tlat a, an van fakawm ngai em! Hliam tinreng tuarin khandaiha sah hlumte chu anlo tuara Rom sawrkar ropui leh chak tak alo ding chhoa, khâng zawng zawng kha anlo tuar a, a hnu zel kum A.D tam tak thlengin Kristiante tih duhdahna rapthlak tuarin kan mi hmasate khan anlo tuar chhuak tawh a, hla tak ațangin ramtiam an hmu fiah tlat a tinni..

Ringtu tak tak tan hian 'khawvel hi awmna tlak a nilo' a lo ti hial mai. Keini pawh a hnung kan zuina kawngah hian hnungtawlha hawikir lehna chance țha kan nei nitin zantina, Kan piang chhuak hlawl kan awm mai mai hi hremhmun fa kan ni a, Degree pêk ngailo in Hremhmun lut turin kan fit sa tlap a, tum pawh a ngailo, chutiang ang deuh chuan a hnungzuiin thui tak ke pen mah ila, thlemtu a thawk na ve leh hlauha, Pathian fa pawh ni tawh mah ila, Hawikirlehna chance hi a tam em em mai si a.. Chutiang a awmtura beih kan ni rêng a, chu tak chu a ni. Kan tum Vanram hi kan chianglo fo țhin niin alang,

mi fakhlawhte'n hla taka ațanga chibai bûka an thlir ang kha kan hriat renga beiseina nen ka thlir tlat a ngai a ni.. "Leia thil awmahte in rilru nghat lovin," a tih ang khan,, Heng thu hi hla phuah thiam Pu F.C Thanzâwna khan," Dam lai khawvêlah hian lungawina kim rêng ka hmu lo va," tia a bul rawn țanin "Krista hmangaihtuten lungawina leh muanna chu an chang, Rinnain an kal zêl, ramte an la kir an rel lo; Kei pawh rinna dinga râl do thei turin, Thlarauvin min hruai zel ang che," tiin alo au chhuahpui ve a ni. kir an tumlo a thihchilh hmiah ngam zawk a, chu tak chu a van ropui leh zel em! Kîr hmang, phatsan leh thin kan ni em? A tawp khar dawn ila, hla siamtu vêkin," Min ngai lovin an lêng ramthianghlimah, kir an rel lo an kal zel e, Lei hi hnuchhawn ram a lo ni," a ti a, khing kan sawi takte nen khian a inmil fu mai, khâng kan mihuai kalta te pawh khan, khawvel hrehawm tak an kalsan ta kha an inchhirlo viau ang, Lei nun rêng an ngai tawhlo Beramno hmaah chanvo ropui tak nen tual an lêng tawh a, natna leh hrehawmna leh sual avanga rumna rêng a awm tawh lo a ni..

Thihna te ngei pawh chu a thi ve tawh dawn si a. A va nuam dawn em!

______________________________________

KAN MAMAWH ISUA.

I lan ṭhat ve deuh inbeiseiin Darthlalang hmah i neih ṭha tak i han inbel a, ka hmel a khuh mawi ve deuh lo maw? tiin make up tunlai ber ber leh manto ber ber chitin in i han in plaster a, thuamhnaw pawh mi neih aia țha țha Bangkok leh Singapore lam chhuak ngat Top Wear chhing ṭeng ṭawng, Levis Strauss leh Versace Branded ngat, Kekawr-ah Super Hipster leh Sleeded Beld to ber chi nen. I sam te lah chu eng rawng ber nge tih hriat loh khawpin i han streak kual vel a, Cell Phone ah pawh a changkang thei ang ber nen khawlai i han leng ve ṭhin.

Mahse, i rilru a nuam thei tak tak chuang lo, engatinge? i ṭhiante angin i hmel kha a ṭha ve tlat lova, i incheina te kha i pian phungin a mawi ve tlat lo. Buipui pangpar beh ang chauh i ni. An inchei dan leh an khawsak dan chiah chiah khan han induang ve ṭhin mah la i rilru-ah lawmna tak tak a awm chuang lo.

I nihna leh dinhmunah lungawina i hmu lova, i ṭhiante i han en a, khalh senloh Motor chi hrang hrang an neih laiin College/School/Office bana Sanpiau hawpna tur takngial pawh i haihchham a ni si, Khawvel hian a endawng bik riau che in i inhria a. Chan tawka lungawi hi i han tum viau ṭhin tak na a, i ngaihzawng duh em emin a han ṭhen zui che a, vanduaina hi i ta bik ang hrimin a inpha man zut a, i mut dawn apiangin Pathian hnenah hausakna te, hmelṭhatna te, lehkhathiamna te i han dil ve chiam a, Pathian lah chu tang ang maiin a reh vung vung mai bawk si. Zingah i han ṭhangharh a, i hmel lah a chhiat ngaiin a la chhe reng a, i chawnte lah chu Mualcheng Kawng chhova Buh ṭin 4 chu tlanpui thei tur awm ang hrimin a lian thur thur mai bawk si.

I beidawngin Pathian i dem a, duhsak bik neiin i hria a, inhnemna zawngin Zu leh Ruihhlo lamah i han tlan leh chiam a, Drug addict leh hmelchhe tak i nih bak chu engmah hlawhchhuah i nei bawk silo.

I ṭhenawmte nen i han inkhaikhin a, nang aipawh a ṭawngṭai peihlo ve leh chhawng chhungkua, Kohhran ngaihsaklo chhungkua an ni si. Pathian pawh ngaihsak miah lo zawk kha RCC Building chhawng sawm hnuaia Foreign Dunlop chunga an mut der der laiin nang erawh chuan rangva inchung pawp hnuaiah chaurau takin ek i thai lo chauh a ni mai si a, siamtu in a dahna che hi i tan zawng Amen a har a ni.

 Kan Bible-ah Lal Isua ngeiin, Ama hminga kan dil chuan kan dil chu kan hmu dawn a ni tih min tiam a, i duh i han thlen a, chhanna i hmu mai si lova, engtithei hawt lovin i han tau leh rih a, engmah tak tak i tau chhuak bawk silo. Pathian rorel dan hi fair i thei thlawt lo a ni ber. Amaherawhchu, kan Pathian hian mihringte rindan leh ngaihdan hian hna a thawk ngai kher lova, a thiltihtheihna hi khawvel mit leh bengin a hmuh leh hriat piah lamah a lantir chawk a ni. Hausakna i dil a, Sum leh paiin a rawn vur hluah che i beisei laiin hmuh theih hausakna nilovin, i thinlungah hausakna thurûk a pe che a, khawvel mi a hmelchhe ber pawh ni la, hmelchhe chunga lungawinain i thinlung a luah a, Zanriah thlak tur buhfai i neihloh lai khan Thlamuanna i nei tlat a ni.

Chuvangin, a dawngtu thinlungin a chunga thil lo thleng chu a dawnsawn dan zawkah malsawmna leh vanduaina chu a innghat fo zawk a ni.

Chuvangin, tuna i dinhmun kha Pathianin a hriatpui vek che a, midang tumah mawhpuh lova, i Amen theih kha Pathianin a phut tlat che a ni. Mitin hian kan nuihza tireh a, kan nun khua tinguai khawp harsatna kan tawk theuh a, a lak kian tumna lam aia kan dinhmun lawm taka kan Amen theih hun hi Pathianin min nghak tlat a ni. I rawngbawlpuite nena in inrem theihlohna te leh i harsatna leh manganna chi hrang hrangte kha ṭawngṭaiin lak kiansak turin Pathian i dawr a, a chhanna hmuh tur a awm silo.

Nimahsela i manganna leh harsatna chu Lalpa’n a hriatpui che a, i tawrh kha Lalpa’n rem a tihpui che a ni tia i Amen theihna zawnah khan lungawina kim chu a awm ngei ang. Lalpa Isua Krista hian i harsatna kha Ama harsatna ah a rawn ngai zel ang a, i chungah engpawh lo thleng se lawm chungin Lalpa rawng i bawl thei tawh zawk ngei ang le...

Amah kan Pathian neihchhun Lei leh Vana thuneihna zawng zawng neitu Lal Isua-ah chauh hian kan lungawina tur chu a lo awm dawn ta a ni.

Awle, thalaite mai nilovin Kohhran member tute pawhin harsatna, lungngaihna leh manganna ken nei ngei ang le. Kan manganna leh harsatna chunga roreltu chu Isua Krista hi a ni. A hnenah tlulut ila, A hnenah hian damna leh lungawina kim a awm alawm.. Lalpa ah tlu lut ila, theihtawpin a rawng i bawl tlat zel ang u. Lungawina kim neitu Isua Krista tan i inbuatsaih thar theuh ang u.

_________________________________________

HLIM LEH DAM TAKIN LE...

Enteh Țhiannu/Țhianpa, khawvel awm chhung chuan hlimni, lawmni, țahni, lungngaih Ni a awm lo thei lo asin! Ani taka bawhchhiatna a awm hnu kha chuan Hlimna awm tur chuan lungngaihna a awm ve angai asin! Thil reng reng hi a inbuk tawk tur chuan țhalo zawk a lo awm ve an ngai fo! Kawngchhuk awm tur chuan kawng chho a awm angai asin.

Hei hi ka hrilh lo phallo che, Isua'n a hmangaih em em che asin. Awih ngang lo mahla a ni tho tho. Pathian hian Hausa te chiah hnenah Hlimna hi neih phal ta se zawng Pathian lakah hian ka va hel nasa dawn em! Mahse le, a fair em em si a, Inngaitlawm apiang te hi a hlim hlim chu anni mai si Hausak leh retheih lam ani mawlh si lo.

Thuhriltu 11:9-10 țhalaite u, in țhat lai chen ula, I la naupang viau lai hian hlim rawh u, Amaherawhchu Pathianin in chungah Ro a rêl dawn tih hre reng ang che u. Engmah engto nei suh ula, In pang tinatu awm hek suh se, In that lai hun a rei dawn lo.

He Bible chang hi i chhiar fo țhin tiraw? Ania Sin, khawvel ah hian Hlimna zawngin kan phi ruai vek anih hi maw. Ngaihtuah mahteh, misual ber thlenga i hriat te paw'n hlimna zawngin an hmanhlel anih hi. Khawnge hrehawmna tur kan zawng te'ng ti reng reng an awm miahlo. Tv en la Internet khawih la ti hlim tu tur che hlir an rawn chhuah pek ang. Mahse, hei chiah hi ka hrilh duh che ani, Hlimna tluantling tak tak chu Pathian ah bak a awm tak tak meuh lo.

Khawvel finna a intlansiak muah muah lai hian lo ral mai hman i ni lo. Ni e, ka ti țhin, Pathian kan tih hian kan hrehawmna tur ni dawn ngat se chu tumah hian kan zui peihlo ang. Kan tana țha tur em em anih vang hian alom kan zawm angaih chhan.

Lo awm țha peihlo kual hman kan ni lo Mizo țhalai te hi, aw țhalai hei hi ka chah duh che ani. I thianpa khan, "Vawikhat pian ve manah Zu inloh te chu a/meizuk ve loh te chu a/Damdawi ruih chhin loh chu a" tiin a thlem che maw? Ngaiteh, i rilru kha han ti paukhauh la he ngaihtuah na hi lo seng ve zawk teh a hlawkthlak teh asin! I rilru in, "Thianpa, vawikhat pian ve manah sawi ve mai mai atan paw'n Zu hi ka'n inlo ve hrim hrim ang e/mei hi ka'n zu lo ve reng reng ang e/ Damdawi hi ka'n rui lo ve reng reng ang e" tiin i rilru in i țhianpa chu chhang la an thlemna lak ata chu fihlim chhin teh! I inchhir phawt chuan amak khawp ang.

He'ng zawng zawng hi i tana țha vek tur zu ni a! I hrisel anga, i sum a hek lo anga i lawmna a thlen em em zawk ang. Hei hi ka hrilh duh che a ni; Hrisel a, muttui em em a, chaw eitui ve em em pawp hi a hlutzia hre mawlh teh! Chaw eitheilo te mu theilo te hrisello an tam zia hi! I vannei teh asin, he'ng i muttui na tur ti buai thei tur te i chaw ei ti tuilo tur thil te i hriselna khawih pawi thei lakah hian inthiarfihlim ngam la. A tawpah chuan i hlim zawk tho tho dawn.

Țhiannu/țhianpa, I kawppui nen intihthiamloh vangin i nunna hlu tak kha lak i tum mai maw? I lungngai maw? Ekhai! Mangang mah suh che, Phu tawk te zawng tawng lo a fa kan awm hleinem! Ila tawng leh em em ang. I harsatna zual lai tak kha i hlimna ințanna tur ani thei asin. Han insangmar la, hrehawm ti tura piang i nilo a, hlim taka awm tur i ni tih inhria la insawi harh hram hram rawh.

He'ng zawng zawng thil țhalo pumpelh tur chuan mamawh tak tak i nei lo! Pathian hnaih bak mamawh i nei lo. Zui chawt mai teh, alo chhawk zangkhai em em ang che! A zuitu a tih beihdawn ngai ka la hrelo asin. thlasil a ni tan a, khawvawt leh boruak thianghlim a nawm zia hi tem char char teh. Ka rawlhruk leh hram duh che chu maw, zan rei alo nia i unau te an mu tawh a, thil țhalo tih ruk i chak maw? Khatih lai tak khan C.Luri hla Lawmthu sawina hla (i hnenah lawmthu kan sawi e) ngei mai kha i earphone khan han ngaithla la tunlai boruak nuam em em karah pawn boruak thiang em em kha han hip la streetlight eng paw riai karah dingin i kiang vela Rannung hram chiah chiah chu an thawm han ngaithla mah teh! Ka tiam a che, i dam sawng sawng ngei ang. Ania Sin, Hlimna chu kan kiang vela Pathian thilsiam kan hmangaih naah hian a lo bet nasa em em zu ni a. Chu chu anlo Biblical em em tlat asin.

Thil pakhat leh chu maw, i duh leh i mamawh thliar hrang thiam em em rawh, i mamawh hi neih a lei hmasak tum zel la pawisa chuang ila neih chuan i duh i lei chauh dawn nia. Duh nazawng lei duh reng reng bawk suh. I mamawh ni miahlo i lei buai i lei buai avangin a lawm i buai leh țhin. A hmazawnga i mamawh ni ngai lo kha a tello in i awm theihloh phah ang e. Sum hmangthiam hle rawh i inchhiar lo ang tih hi ka sawi leh hrâm bawk e.

Ka la sawi zo lo cheu, Engpawhnise, I tan leh ka tan Kha Kalhlen Ni taka Isua thihna kha a tawk em em ani tih hria la. I damna tak tak i mamawh tak tak chu Pathian hian a nei kim ani tih hre hrâm teh. Zoram inngahhna i la ni thei asin. Chuvangin Pathian leh kan ram tan Hlim takin la dam hram hram ang hmiang.


__________________________________________

*_ＢＩＢＬＥ  ＱＵＩＺ...📖🛐_*
*_1 Sᴀᴍᴜᴇʟᴀ 7-16_*

*_ℚႮᗅᝨⅈᝪℕ & ᗅℕՏᗯℰℛ❣_*

*_Q1. Amalek mite lal Agaga thattu kha tunge ?_*
_Ans: Samuela, 15:33._

*_Q2. Saula kha Israel-hote chungah kum engzat nge a lal ?_*
_Ans:  kum hnih a lal, 13:1_

*_Q3. Samuela fate hming sawi rawh.?_*
_Ans:  Joela, Abija ani,  8:2_

_*Q4. Lalpa bawm enkawltu Elazara pa kha tunge a hming?*_
_Ans: Abinadeba 7:1_

*_Q5. Saulan fa engzah nge a neih?_*
_Ans: {Panga,}  Saula fapate, Jonathana te, Isvia te, Malkisua, a fanute pahnih, Merabi, Mikali.   14:49_

_______________•______________
*_ᴀ ᴋᴀʀ ᴀᴡʟ ᴅᴀʜ ᴋʜᴀᴛ ʀᴀᴡʜ_*

*_1.  Chutichuan LALPAN chu mi ni chuan................ chu a chhanhim ta a; tin, ........... thleng rawkin an bei a._*
_Ans: Israel-hote, Beth-aven, I Samuela 14:23_

*_2.  ................ thenkhatte chu Jorda ralah .............. an tlan a; Saula erawh chu Gilgal-ah a la awm reng a, mipuite chuan khur zawih zawih chungin an zui a._*
_Ans: Hebrai mi,Gad leh Gilead ramahte, I Samuela 13:7_

*_3.  Tin, LALPA chuan ..............., in hmêlma lehlam lehlam mite kut ata a chanchhuak che u a, him takin in awm a._*
_Ans: Jerubaala te, Bendana te, Jephtha te, Samuela te a tir a, I Samuela 12:11_

*_4.  Tin, chung thu chu a hriat veleh chuan .......... .......... a lo thleng ta chiam mai a, nasa takin a thin chu a ur ta thut a._*
_Ans: Saula chungah Pathian thlarau, I Samuela 11:6_

*_5. Chutichuan Amon mi Nahasa chu a lo thawk a, ............. beih tumin a han ep a; tin, ..............chuan Nahasa hnênah chuan, "Kan hnênah thu thlung la, tichuan i rawng kan bawl ang e," an ti a._*
_Ans: Jabes-Gilead, Jabes mi zawng zawng, I Samuela 11:1_
______________•________________
*_ᴀ ʙᴜɴɢ ʟᴇʜ ᴀ ᴄʜᴀɴɢ ᴢɪᴀᴋ ʀᴀᴡʜ_*

*_1. Tin, Israelte Thahruia chu a daw lo vang a, a lamlet hek lo vang; mihring anga lamlet leh mai mi ani si lo va," a ti a._*
_Ans: I Samuela 15:29_

*_2. Tin, Saula chuan LALPA tan maichâm a siam a: chu chu LALPA tana a maichâm siam hmasak ber a ni._*
_Ans: I Samuela 14:35_

_*3.  A hming ropui tak avâng hian LALPA chuan a mite chu a hawisan dawn si lo va: a mite atâna siam che u chu LALPA lawmzawng tak ani si a.*_
_Ans: I Samuela 12:22_

*_4. Chutichuan tlâng hu an han thlen chuan, ngai teh, zâwlneihovin an tawk a; tin, LALPA thlarau nasa takin a lo thleng a, thu an sawi dual dualnaah chuan a tel ve ta a._*
_Ans: I Samuela 10:10_

*_5. Helna hi aienthiamna sualte nen a inang a, luhlulna hi milem biak leh Pathian lem biak tluk a ni. LALPA thu i duh loh avângin ani pahwin lal atân a duh ta bik lo che a ni," a ti a._*
_Ans: I Samuela 15:23_
_______________•_______________
*_ʜᴇɴɢ ᴛᴇ ʜɪ ʀᴇᴍ ᴅɪᴋ ʀᴀᴡʜ ʟᴇ_*

*_1. MAHZAIA._*
_->AHIMAZA_

2. RAOEORZ.
-> ZEORORA

3. ROATKBEAH
->BEKORATHA

4.ROITASATH
->ASTAROTHI

_______________🔚____________

KA THLARAU ZAWKIN LE

Jakaria 4:6

           
Juda te chu an sal tanna Babulon atangin Jerusalemah 538 BC ah an kir leh a. Babulon hovin 598 BC-a an tihchhiat tak temple thlakna tur Temple thar lungphum pawh an phum nghal mai a. Mahse, 520BC-ah Temple sak chu an chhunzawn thei ta lo a ni. Temple sak that hi engvanginnge chuti taka pawimawh a nih? A pawimawh chhan chu Pathian biakna hmun pui ber a nih dawn avang leh Pathian mi an rama kir lehte chunga Pathian malsawmna thar lo thleng tur chhihchiahna anih dawn vang a ni. Hetih hun lai kum 520 BC velah chuan Larsap Zerubabela chu Babullon saltang kir lehte tan Jerusalem leh Temple tungding turin Persia lal Daria khan a ruat a. Engtinnge bul a tan anga, eng hmanginnge, engtikawnginnge? a thawh ang tih a ngaihtuah nasa hle ang. A chhan chu hnam ropui tak takte, thlang lamah Aigupta chhak lamah Kaldai Babulon, hmar lamah Assuria leh Persia-te kara hnam te takte awm ve mai an ni a. Chubakah chutih hunlai leh tun thleng pawha ram leh hnam chakna hnar ber sipai rual an nei ve si lo. Tah chuan zawlnei Zakaria hnenah Pathian thu alo thleng ta, “Chakna nilovin thil tihtheihna ni lovin ka thlarau zawkin le” tiin. Ram leh khawpui tungding turin lang theia chakna leh thiltihtheihna zawng zawng aiin Pathian thlarau hruaina a pawimawh zawk tih chu Pasthian thu a lo ni ta.
           
Awle, Kohhran hote Pathian ram zauhna kawngahte kohhran rawng bawlna peng hrang hrangahte hma nasa takin kan sawn a, a ropui hle a ni. Amaherawhchu kan khawtlang dinhmun kohhran chhungkua ngei pawh zah zo lova hmelmapa in tan a lak nachhan hi engvangnge? tih hi rawngbawltute tan zawhna pawimawh tak a ni. Tunlaiah chuanTemple tundin leh hranpa a ngai lova, kan thinlung chhungril bera Pa chibai kan buk nate, thlarau leh tihtakzeta fak leh chawimawinate, fianriala Lalpa pawlna nunte hi kan tundin a siamthat ngai lai tak a ni tih tunlai ringtu nun hian a tilang chiang hle a ni. Heng tungding tur chuan Judate hnam ropui tak takin a hual vel khup ang khan tunlai hunah min dip theitu thil tam tak a lo awm ta. Damchhung khawsak ngaihtuah luatnate, abikin thalaite tan kan khawvelchangkan nate hi min daltu lian tak a lo ni ta. Mahse kan tih a ngai miau si a. Hemi kawng zawh tur chuan Pathian aw, thlarau aw, Eliza’n Horeb tlang puka Lalpa aw dam diai a hriat ang kha hriat ve kan mamawh ta. Engtinnge kan hriat tak ang le. Kum 1940 chho vela mihlim nu pakhat chuan
heti hian a sawi a, “Sawma, vawiin ka thil hmuh chu ho i ti maithei a. Losul haw hma deuhin kan vauah lungpui tlawhchhanin ka fianrial a. Ka han men chuan  lungpuia hrui zam hnah zawng zawng chuan min lo en thuap mai a, ka zak deuh a, ‘Aw, in va zahawm tak em! Halleluiah’ tiin hreh deuh chungin ka haw san ta ni” tiin. Pa pakhat pawhin, “Ka vau-a luite ka kan laiin lui tuite chu hlim taka zaiin an lam del del niin ka hmu a, lui tui ka’n kan a; tumbu vui ka hmu a, lak tuma kan kit chu a tlu ri chuan ‘Halleluia’ ti hian ka hria a” tiin a sawi a. Heng hi thil hote niin kan ngai mai thei a, mahse a ho lova, Pathian lama thlarau mit meng leh thinlung varte tan engpawh mai hi thlarau aw lo chhuahna a chang thei thin.
           
Mihring tupawh hian zir tan nih hi kan duh lova, mahse kan dam chhung hian zir tan nih mai loh chu engdangmah kan ni thei chuang lo tih i pawm ang u. Chuvangchuan Pathian aw hre turin inbuatsaih ila, chumi tur chuan Pathian thuril pui pui hriatte, mihlim kan tih ang leh thlarau mi kan tih ang chi va nih kher a ngai lo, kohhran ruala ke kan pen zel a; Pathian thu kan hriatsate awih thar mai hi kan mamawh ber chu a ni zawk e. Chu chu a thlarauva, thlarau mi nihna alo ni zawk a ni.

THLARAU TUIPUI

Tin, chumi chuan tehna hrui kengin chhak lam hawia kalin tawng sângkhat a teh a; tin, tui chu mi dai kaitîr a, kheimit thleng a ni a. Tin, tawng sângkhat a teh leh a, tui chu mi dai kaitîr leh a, tui chu khup thleng a ni a, tin, tawng sângkhat a teh leh a, mi dai kaitîr leh a, tui chu kawng thleng a ni a. Tin, tawng sângkhat a teh leh a, tin, ka dai kai rual loh, luipui a lo ni ta a, tui chu a lo sâng zel a, a dai a dai kai rual loh, ahleuha hleuh tham luipui a lo ni ta si a.                                                     Ezekiela 47 2:5
         
Tirhkoh Paula chuan ringtute chu kan thlen chin atanga hma sawn zel tur kan nih thu min hrilh a, amaherawhchu hma kan sawnna kawngah hian kan ke pen chin leh kan thlen chin zelah hian kan dinhmun hi kan inchhut fo a tul awm e.
         
Kan pianthar tirh chuan thil reng reng mai hi a nuamin ka tui thin a, mahse hun alo rei deuh a, hrehawmnain min han tlakbuak tan a, kan thlarau dai chin chu khup thleng vel alo nih chuan klan la paltlang thei a, kan ke pen erawhchu a sak tan tawh thin. He hunah hi chuan mihring kan muangchang a, mahse kan tih tur leh rawngbawlna kan la hlen tha khawp mai.
         
Hun alo rei leh deuh a, chu thlarau tuipui chu kawng thlenga dai alo ngai ta a, thil tih reng reng hi hmalam pan a har em em vek mai hi alo ni a, nun te hi alo beidawngin khawi lam nge a thuk lohna lai? luipui daikai awlsamna lai tiin kan van ruai a, daikai turin hun pawh kan duh rei a, a chhan chu thil awlsam kan zawn thin vang a ni. Amaherawhchu a awlsam alo awm lova, kan dai kai tho alo ngai thin.
         
Chumi zawhah chuan daikai rual loh thlarau luipui tak takah chuan kan luh alo ngai a, hetah hi chuan inpumpekna tak tak alo ngai ta, a pumpuia inpe tan lo chuan daikai rual a ni tawh lo. He mi piah lamah hian chu tuipui chu i hmuh thei rengin alo sang zel ang a, a hleuha i hleuh hial alo ngai ta! Tin, he tuipui hleuh ngaiah hian i zuang luh tawh chuan kir leh pawh harsa tak a ni. Chumai bakah he hmun hi chu tlakhlum theihna a ni a, ringtu tam tak pawh an lo tlahlum fo tawh thin. Luipui len avang chuan i thla lo phang mahse, hlauhnain tuam vel che mahse i tlakhlum loh nana chak tak leh huai takin, chhel takin i awm a ngai a, rinna nghet tak nena hmalampanin, hah leh chauh pawh sawi thei tawh lovin, tirhkoh Paula sawi angin i ban i phar anga, i duh loh lamah chuan kaihin i awm tawh ang. Chumi hunah chuan Lalpa chakna hmachhuan chung zelin Pathian ram lo thleng tur chu hnunglam thilte theihnghlihin hmalam pan zel a tul tawh thin.  Aw, ringtu i kawng kha chhut ngun rawh. Engchinahnge i tan le?

INDO NUN

" indona chu LALPA indona a ni si a".(I Sam  17:47)

Kan thupuia kan hmuh ang hian "Indo nun" tih a ni a. Rev. H. Killuaia chuan a fakna hla ah chuan "Indona zawnga rapthlak ber ka nun hi, Leh lam leh lama nek sawrin a awm a; Van in dona aia nasa zawk a ni, Hruaitu Krista ni suh se ka tlawm ngei ang," a lo ti a. Indo na ah chuan tu nge min bei tu leh tunge kan hmelma tih te hi ngun taka kan ngaihtuah chian a țul hle mai.
           
Kan nun ah hian nun insual thil țha tih duhna leh sual ti țhin duh nun insual reng mai hi a awm vek a ni. Thil țha tih duhna chu rilru ah a lo awm a, mahse thil țha tih thei na nun chu a awm si lo. "țhatna tih ka duh hi ka ti lo va; sualna tih ka duh loh hi ka ti zawk si țhin a" tiin Tirhkoh Paula ngei pawhin a lo sawi a, a nun a lo buai em em a, Mi rethei ka va ni tehlul em! He thihna taksa lakah hian tuin nge min chhan chhuak thei ang?" a lo ti thlawt mai a ni. He lai thu hi Paula hian a Kristian hma nun nge a sawi a, Kristian a nih tawh hnu nun em ni a sawi? Tiin zirtute pawh an in țhen phawk a ni. A enga pawh ni se he mihring nun ah hian Famkimna hmun kan thlen hma hi chuan nun indona hian tawp ni a nei dawn si lo. Kan Lal Isua ngei pawh thlarau hruaia a awm lai khan diabola'n a chak lohna lai ah a rawn thlem chat chat a nih kha. (Mat 4:1-10). Sualin a thlem loh rawngbawltu an awm dawn em ni ?
           
Indona hmunah mi a awm chuan hmelma in an rawn bei a, a hneh theih na tur chuan eng anga țan lo lak tur nge tih te leh inhumhimna hmun a mamawh zia te, a hriat chian a țul a. A hmelma a hneh theih na tur pawhin eng anga beih let tur nge tih te, a hneh theih na tur a tan a pawimawh ralthuam te a lak khawm zung zung a ngai a, theih tawp a hmelma a beih leh ve na ah hnehna a chang țhin. Chutiang ni lova indona hmun ah a awm mai mai a, in thlah dah tak leh mu thlu mai mai te a, a awm chuan hmelma in awlsam takin an rawn hneh mai dawn a ni. Chuvang chuan kan nun a tisa thiltih awm zawng zawng te, kan tisa duh zawngte chu  Krista Thlarau a kan tih hlum zel chuan kan lo nung zel dawn a ni.
           
_________________________________________

HARHNA HI....

                    

Pathian Thlarau Thianghlima harhna hi Zoram hian kan dawng nasa hle mai. Thil lawmawm tak chu a ni, mahse harhna tih hming a put ang chiah hian kan harh hluai ringawt zel em? Sual atanga harh a, a bak ringtu nun kawng zawh zel tur a awm tih te, harhna piah chiah ah hian nun nghet kan neih a ngai tih hi kan hre chiah em? In ngaihtuah chian a va tul em.

Keini veng leh kohhran te ngei pawh hi harhna hian min nuai zing ta malh malh hle mai, engatinge harhna hi kan tih fo mai le? Kohhran rawngbawl tu leh kohhran mipui te hi kan va harh nasa in kan va harh zing em, chumi in a kawh tak ber ni a lang chu, Pathian thu ah kan muthlu nasa hle tihna a ni. Ringtu leh rawngbawltu harh thar fo mai te hi a chhan dik takah chu kan inthlahdah a chumi ațang chuan kan harh thar leh țhin tihna a ni, harhthar reng mai hi thil lawmawm ni tho mahse a lawmawm dan hi a lawmawm chiah lo niin a lang.

Ringtu te nghet taka ding a, harh thar fo ngai lo turin leh rinna a nitin thang lian deuh deuh turin i in buatsaih ang u.

Lo share leh ve zuai, muttui suk suk zing thawh nuam vek u le....

PATHIAN THU

                PATHIAN THU

           
“Pathian thu hi a nung  a thil a titheia khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hial in a chhun thei a, thinlunga ngaihtuah leh tumte hi a hre nghal thei a ni”
           
Pathian thu kan hriat theih leh kan hmun theih awlsam ber chu Pathian lehkhabu thianghlim (Holy Bible) hi a ni. Chanchințha Johana ziakah chuan “A tirin thu a awm, thu chu Pathian hnenah a awm, thu chu Pathian a ni” ti te in min hrilh bawk a. Pathian chu a thu ah a awm a, mihringin thu kan sawi ang leh thu kan ziak ang mai hi a ni lo tih a hriatchian theih awm e. Hemi a nih avang hian Pathian thu chu thiltithei tak leh Amah ring duhlo tan chuan hlauhawm tak a ni tih kan hriat a țul hle bawk.
           
Pathian thuah mihring ten suala kan tluksan thu te, Amah pawh ngaihsak lova kawng danga kan pensan tak thu te min hrilh a, kan chan tur pawh hremhmun a nih thu min hrilh bawk a, chumi atangin a fapa thisen ngeia min tlan thu te min hrilh bawk. Lal Isua nunna chu kan nunna a ni a, a thianghlimna te, a felna te, kan tan sual laka min tlantu ( I Korinth 1:30)  a nih thu te min hrilh a, kan chanvo a ni tih hria a lawm tak a kan pawm mai a țul a, keimahni lamah danglamna te, hlim ruk riau na te zawng lova Pathian thu in kan nihna a min puan saka lo awih mai hi kan tihtur a ni a, Pathian in min hrilh ngei a ni tih hria a lawm tak a ‘AMEN’ lo tih mai hi kan tih tur a ni. Khawilai Evangelist Speaker-in min hrilh ai in a rinawmin a nghet zawk a, a chiang zawk bawk.
           
Mahni thu awm Pathian kan nei a, hei vang hian ramhuai te pawhin Pathian thu hi an hlau a, natna pawh in a ngam hek lo. Kohhran Upa in damlo a tawngtai chuan Pathian thu in a dam ang; a tih avangin damlo chu a dam mai dawn a ni, a daw ve ngai si lo. Amah ring duh lo te tan hremhmun a buatsaih te hi a tak a ni tih kan hriat a, hmangaihnaa khat Pathian ni mahse a thu awi duh lo leh a fapa nunna engahmah ngai duh loa; nunna neih nan hmang duh lo te chu a hrem ngei dawn a ni tih min hrilh hi kan Pathian hian a hmangaihna vangin a sut leh dawn hauh lo, a hlen ngei ngei dawn, “Ka ka a thuchhuak chu thiltih nei lovin a lo kir leh lovang” ti tu hi kan Pathian a ni a.


_______________________________________

PIANTHARNA

                    PIANTHARNA

Sam 51:5, Numbers 21:8-9., Johana 3:14-16.
           
Mihring thu awihlohna Genesis Bung 3-ah kan hmu a, hemi avang hian mihring lo piang chhuak tawh phawt chu sual saa piang, Setana fa kan lo ni a, chuvang chuan kan pianthar a ngai a ni.
           
Thuthlung hlui hi kan tan entirna a ni. Israel fate, an natna lak ata chhhanchhuak tur leh an harsatna ata chhanchhuak turin Pathianin Mosia chu dar rul a khai kan tir a, chu dar rul khai kan en apiang chuan damna chu an chang țhin. Chutiang chiah chuan bawhchhiatna suala tlu tawh, Setana fa nihna nei tawh hi min hmangaihtu chuan kan tan damna, chhandamna, vankainun chu kan neih theih nan a rawn buatsaih leh ta a ni.
           
Keini mihringte kan lo dam nan, chhandamna kan lo chan ve theih nan Pathian chuan a fapa mal neih chhun chu kan tan, khawvel tan a rawn pe a, kan tuar ai a tuar a, kan thih ai arawn thi a (bawhchhiatna avanga thi tura tih kan ni si a), a tho leh ta a, chu a thawhlehna nun chu min rawn pe  a, amaherawh chu tihtur kan nei ve a ni. Lal Isua Krista kan aia min awhsaktu; a thihna leh thawhlehna chu kan rin a ngai ta a ni. ‘Ring la, i nung ang’. ‘A ring apiang an boral loha, chatuana nun an neih zawkna turin’.
           
Engtinnge kan  rin ang? Ring thei kan ni em? Entirnan, Bus hnungah i bet/uai a, i ban a kham hun hun chu i tlak hun a ni ang. Amaherawhchu Bus chhungah chuan i chuan ve thung chuan nangmah kha hah tawh lovin hahdam takin i duhna hmun chu i thleng tawh zawk ang. Keimahni rinnna, keimahni atanga chhuak hian kan ring thei lo. Han ring ve viau țhin mah ila, hruiah kan uai a, kan ban a kham hunah kan thlah a, kan tla leh mai țhin ang hian kan peih loh hun hunah kan thlah san leh mai țhin. Chuvangchuan amah ațanga chhuak rinna, aman min rawn hriatna, aman min rawn chhinchhiahna hi kan chang zawk tur a ni. Chumi rinna nei tur chuan thlarua thianghlim puihna kan mamawh a, kan dil angai a ni. Kan thurin “Thlrau Thianghlim, Pa leh Fapa ata lo chhuak chuan mihringte chu chhandamna changtuah a siam a, an sualzia leh chungpikziate a hriat chiantir a, Krista hriatna kawngah an rilru a tivar a, an duhthlanna chawk thovin, Isua Krista chu an Lalpa leh chhandamtua pawm tura ngenin,  pawm thei turin a pui a,…” a rawn ti a, hetiang chiah hian kan rina; ka pawm theih nan thlarua thianghlim puihna chu kan mamawh ta a ni. Thlarau thinghlim chu I neih ve theih nan țawngțai ang che.

_____________________________________

LALPA TANA HUN HMANG CHU INCHHIR AN AWM LO

Pathianin mihringte hi misual leh mițha te pawh tumah duhsak bik nei miah lovin nitin darkar 24 hun țha min pe țheuh a, A ṭhen a hmang sêng lo pawh kan awm a, a ṭhen a hmang kham lo pawh kan awm nual a, a ṭhen chu buai em ema insawi a thawhchhuah nei hauh si lo te kan awm a, a ṭhen erawh chu engkim a pawimawh zawng zawng ti hman vek pawh kan awm bawk.

Buaina chhuanlam mite reng reng chu a tlangpuiin mi thatchhia leh mahni hmasial an ni duh viau mai, Mahni tan chauhva hman, midang tan chuan englai pawha buai em em reng mai, Pathianin thilțha ti hmanlo tur khawpa buai tura a siam kan ni lo, a sual pawh a țha pawh ti hman tura nikhatah hun darkar 24 meuh min pe a ni.

Chhungkua ka hriat pakhat te chu eng lai pawha buai reng renga in sawi reng an awm a, Kohhranin tih tur an sawi pawn buaina chhuanlamin eng lai pawn an lang ve ngailo hrim hrim a, Pathianni inkhâwm te pawh buaina chhuanlamin an inkhawm lo fo țhin, an chhungte pakhat chu kan inah a rawn leng a, kei chuan thutak deuh si hian ka lo fiam leh pek a, "Pathianin hun hi a pe thlem bik deuh pawh a ni ange ti raw? Khawvel tawp thut pawh lo ni ta se vanram pawh an kai hman dawn em ni? Tiang em em a buai chhungkua mai hi* ka lo ti a, min lo support ve hle mai.

Kan Pathian hian  second khat chauh  pawh chhun leh zanah te pawh hian ka hah ka chau ka buai pawh ti miah lova min vengin min kalsan ve ngailo, mi lian leh mi lalte angin ka buai pawh min tih sak duh lovin chhun leh zanah pawh eng lai pawha biak reng theih turin kawng min hawnsak reng a, keini erawh chuan mi  biak a duh hunah pawh ka buai tiin kan hawisan leh țhin.

Lalpa tan hmun awl siam rawh ti'n kan ka in hla kan sa țhin a, kan chhungril lam erawh chuan Lalpa tan hmun awl siam rawh  tiin kan sa a, A tan hmun ti awl lovin kan awlsak  ta zawk a

Kan buai reng țhin avang hian a lawm Lalpan mi rawn thlawh a mi rawl pawl hlim ve a duh chang pawha mi rawn biak pawh hre lova kan awm fo țhin ni, kan buai a, a tan hun kan neih ngai loh avang hian Lalpa aw hrelo leh kan țawngțaina te pawh chhan a ni lo tia kan mangan leh fo țhin, kan inchhungah a rawn mikhual duh chang pawn a tan hmun kan siam sak ngailoh avang hian hmun chang lovin beidawng takin kan haw tir leh fo țhin a ni

Kan Biblein " Mikhualte  lawmin awm fo ula tia min hrilh hi buai thu leh hla hlir chhuanlam in thunawnah hmangin kan mikhual duhawm Lal Isua hi kan lo hnar țhin. Kan Lalpa Isua'n a thih dawn pawh khan ka buai pawh ti miah lovin nang leh kei tan Pa hnenah ala țawngțai mawlh mawlh a nih kha.

Ni khatah dârkâr 24 hial hun țha min pek tawh pawn kan la buai reng fo hi chu e, Pathian pawh a beidawn luat avangin nikhatah hei aia hun thlem min lo siam sak loh hi chu inchhir chang pawh a nei rum rum țhin ang tih a rinawm a ni.

Ni khatah te hin Pathian tan kan hun chanve kan pe phallo a nih pawn, a chanve chanve tal han pek pawh a awm in a phu ve ti ru. Pathian tana kan tihsak pawh ni lovin kan tan vek a thilțha a la ni leh nghal a, thih hnu pawha van thlenna kawng leh lawmman lallukhum dawnna a la ni zui a nih chu.

Mi pakhat hi cancer-in a na a, chutichuan thi tawh mai tur dinhmunah a awm tawh avang chuan a beidawng ta em em a, A ṭhat lai hun chhung zawng zawng chu Pathian tan hmang lovin, a duhzawng thilte tihna in a hmang fo țhin a, Piangthar nimahsela a țhatlai huna Pathian tana hun a lo hman tawk loh avang chuan Vanram a thlen huna Pathian hnenah a thilțha tih sawi tur a neih thlem em avanga a hrilhhai tur zia te a han ngaihtuah a, Pathian tana hun a lo hman tawk loh avang chuan a inchhir ta em em mai a ni, a thih dawn khan ani chuan kaitho a din tir turin a chhungte a ngen a, chutichuan *"Ka Lalpa tana hun ka lo pek tawk loh te kha ka va inchhir tak em aw..!* a ti vawng vawnga. Pathian a fak tawpna turin harsatak chunin ka kut vawikhat chu ala beng thei hram a, pawi ti em êm chungin chat zui ta a ni.

Piangthar pawh lo ni ta ila, kan ṭhatlai huna Pathian tana hun kan hmamg tawk lo a nih chuan kan thih dawnah pawi ti leh inchhir em em in kan la awm dawn a ni,  kan ṭhatlai huna kan awm dan khan min la vaw let ang.

Chuvang chuan unau duhtak, nakin huna i inchhir loh nan Lalpa tan hmun awl siam țhin rawh, mi tu pawh Lalpa tana hun hmang țhin mi chu inchhir an awm ngai si lo,

Lalpa'n a thu malsawm rawh se.🙏🏿
_________________________________________